Gwelulu ota ki ipelwa poshituthi shongongola mUukwaluudhi

0
128

Nuusita Ashipala
ONALUSHWA

Omukwaniilwa gUukwaluudhi, Tatekulu Shikongo Taapopi, ota popi kutya oye li komalwilo ngele tashi ya kelongekidho lyoshituthi shomagongo shoka tashi ka kala ko konima yoomwedhi mbali. Oshituthi shika okwa thanekwa shi ka kale ko momasiku 26 gaMayi, notashi tetekelwa kuulalelo wowina mboka tau ka ningilwa mOvenduka momasiku 14 Apilili, osho wo uukwawo tau ka kala ko mu-3 Mayi 2018 kombala yoshilongo shUukwaluudhi.

Pethimbo a li ta popitha poshigongi shelongekidho lyoshituthi, omukwaniilwa okwa ti omalongekidho ga kwata miiti oge li metifa.
Omumvo gwa zi ko oshituthi shika osha li sha dhanenwa mUukwambi mewiliko lyElelo lyUukwambi.
Ombala oyi li tayi opalekwa ngashingeyi, ashike omukwaniilwa okwa tsu omuthindo kutya ayihe oyi na oku enda nawa. Ooliiltela 1 626 dhomagongo odhi li nale dha tsa ongolo mombala. Omunashipundi gwElelo lyUukwaluudhi ta gandja wo eindilo opo aakulukadhi ya tsikile nokufala omagongo opo aantu ya ka ikonde ko koshikunwa shika oshitoye noshi holike koyendji.

“Ngele itatu opalekeni ombala, otatu ka sa ohoni oshoka uuyuni oko wu uka huka,’’ omukwaniilwa Tatekulu Taapopi ta ti.
Dhika okwa li e dhi popi konima sho a nothelwa ko kutya ope na iikandjo yimwe inaayi thikitha oontenga dhawo dhomagongo. Omukwaniilwa ta gandja wo elombwelo opo aantu ya ka kale yi idhenga oonguwo dhopamuthigululwakalo.
“Omagongo ngashingeyi oshinima shoshigwana ashihe, ihaga nwinwa we kuukololo,” Omukwaniilwa ta popi ngaaka.
Omunashipundi gwelelo lyUukwaluudhi, Tatekulu Nekongo Shomeya ta tsikile ko wo nokuhiya mboka ye na iilongomwa yopamuthigululwakalo ya kale ye yi thikitha pethimbo lyoshituthi shika.

Kansela gwoshikandjohogololo shaTsandi, Junias Amunkete okwa lombwele aantu kutya oshituthi shika otashi tu dhimbulukitha wo ketindi hoka twa za. “Oku ekelahi omuthigululwakalo goye oko wo oku ekelahi uuntu woye,” osho a li a popi ngaaka. Okwa ti omuthigululwakalo nagu kalekwe po, ye ta yelekanitha oshilongo shaa na omuthigululwakalo nolweendo lwa tumba lwaa na mpoka lwa thinda.
Okangundu taka longekidha oke li ki itula mo, noka kwatelwa komeho kuKansela gotango shoshikandjohogololo shaTsandi, Leevi Katoma taya kwathelathana naangoka a li nale ominista yi na sha nomakwatathano nuungomba, omusamane Joel Kaapanda.
Omuplesidente gwaNamibia, omundohotola Hage Geingob okwa koleka kutya ota ka tuma aakalelipo ye, omanga omukokoliplesidente gwaNamibia omundohotola Sam Nujoma, okwa koleka kutya ota ka holoka.

LEAVE A REPLY

Please enter your comment!
Please enter your name here