Omapu ga yoololwa moongongo naGolden Bigs oye enyakwa lyoSecond Division yaShana

0
38

Shipi Elago
Oshakati

Omapu oga li ga zi mumwe noongongo Olyomakaya ga za ko moliha yoSecond Division yaShana konima shoGolden Bigs a li a kutha omasipa pokati koombwa noku ulikila oosipana onkwawo ndhoka ha ya dhana nadho moliha ndjika kutya ye ke shi okatana.
Golden Bigs okwa li e ya muudhano wehuliloshiwike lya za ko e na uumbanda oshoka Khuse FC okwa li shili ta fudha e li pothingo ye, nokapuko okashona oka li taka vulu oku etitha andola a kanithe oliha kuKhuse FC.

Ashike lago enene Khuse okwa li a ndopa okusindana po uudhano we naVietnam Rangers konima sho oosipana dhika dha li dhi ithigi othika 1-1, naashika osha li sha patulula omwaka gwiitsa pokati koosipana dhika mbali naKhuse okwa li e na oku igandja koodhimbo dhaBigs oshoka nando a ka ninge iinyengandunge yi thike peni ita vulu we oku adha mo mEpangelo ngaashi Golden Bigs yi shiwike mokati kaayambidhidhidhi yawo.

Golden Bigs okwa li a dhenge Brave Lions 2-0 niizemo mbika oya li oyo ye mu pe oshihani sholiha ndjika nando ku na uudhano wumwe opo oliha yi thike pehulilo.

Ngashiingeyi Bigs oku na iitsa 49 omanga Khuse ngoka a li e mu endja mo e na iitsa 44 nuudhano mboka wa hupa ko otawu vulu owala oku mu pa iitsa yi li 47 ngele okwa sindana uudhano we wa hugunina, onkene ita vulu we oku adha mo muBigs.
Ashike olugodhi otalu tsikile koosipana dhoka dhi li pevi lyoliha, sho oosipana dhoka tadhi kambadhala okukola okambwa esiku lyomilema opo dhi tale ngele otadhi hupu okakuya koliha.

Pescanova FC, Onelago United FC noVietnam Rangers oye li muudhigu wu vule oonkondo dhawo noya pumbwa okutsa nokuthininika ya tale kutya otaya zi mo montopo moka ye li ngiini.

Ashike nando ongawo oshili osho shoka kutya yatatu mboka taya ka hugunina ye na iitsa iishona poosipana oonkwawo oye na okugwa mo moliha ndjika.

Pescanova oku li a kuutumba kiitsa 20, omanga Vietnam nOnelago ye na kehe gumwe iitsa 21.
Young Brave oku li nale a gwa mo moliha oshoka oku na iitsa 15 nuudhano mboka wa hupu ko ota wu ke mu pa ashike iitsa 18 ngele okwa sindana, mbyoka ita yi mu kwatha nando osha.

Esindano lyaGolden Bigs olye mu tula mokangulu koku tegelela oshoka natango ke shi ngele ota kala moliha ndjika nenge ota shuna koliha hoka a li a lalekwa ko oomvula mbali dha piti,oshoka oku na natango oku ka dhana omaudhano ngoka taga ka pongolola kutya otayi nenge ahawe.

Bigs oku na oku wayimina osipana ndjoka ta yi sindana kOmusati,Otjozondjupa, noKunene moka tamu ka za owala oosipana mbali ndhoka tadhi ka wayimina oliha yoFirst Division, oosipana dhika odhi na oku ka ninga omaudhano opo ku tothwe mo oosipana mbali dhoka tadhi ka za mo niitsa oyindji.

LEAVE A REPLY

Please enter your comment!
Please enter your name here