Oonkwandambi ndhoka taku fekelwa dha yakwa kuNelongo dha shunithwa kooyene

0
562

Nuusita Ashipala
ONGWEDIVA

Oongombe dhi li 12, ndhoka taku fekelwa dha li aniwa dha yakwa komukwatakanithi gongundu yoSWAPO mOshana, Samuel Nelongo, odha li dha mono ooyene mEtine lyoshiwike sha za ko.

Oonkwandambi ndhoka taku tengenekwa dhi na ongushu yooN$59 000.00, omwa kwatelwa oonzinzi heyali nuutana wu li utano nodha li dha gandjwa kooyene komukuluntu gopolisi mOshana, Rauha Amwele.

Amwele ta ti ope na wo oongombe dhi li ndatu nadho dha adhika moongombe dhaNelongo momasiku 12 Febuluali ashike inadhi mona ooyene sigo okeluwa ndika.

Ombundu otayi tindi okulota oshoka ope na ishewe oongombe mbali nadho dha adhika moshigunda shaNelongo, ashike omakonaakono otaga tsikile oshoka ope na uudhigu wokukwatathana naSakaria Thomas ngoka oye e li mwene gwadho, a yambukile mOnampulugu.

“Ope na ishewe oongombe mbali dha li dha adhika moshigunda muka, ashike mwene gwadho ina hala okupatulula oshipotha,” Amwele ta ti.
Nelongo okwa li a tulwa miipandeko shi na sha nuulunga woongombe iikando iyali muule ashike woomwedhi mbali.
Okwa li a mangwa po oshikando shotango momasiku 12 Febuluali nokwa li a pewa ombooloha yoshimaliwa shi thike N$2500 mompangu yamangestalata mOndangwa. Oshipotha osha li shu undulilwa komeho.

Okwa li a tulwa natango miipandeko momasiku ga-5 gaMaalitsa, ompangu oya tula iipotha kumwe nokwa tegelelwa a ka holoke mompangu momasiku 09 Apilili omvula ndjika.

Ngashingeyi ota tamanekelwa iipotha yi li ine yi na sha nuulunga woongombe.
Otaku tengenekwa oongombe dha li dha yakwa koohambo pokati ko 2016 no2017, nodha li dha falwa kuunapelo woongombe dhe u li kOmangeti.

Amwele ta ti oongombe odha li dha dhimbululwa kiihako osho wo kuupapa wokomakutsi.
Ta gandja wo uuyelele kutya aakonaakoni sho ya talele po ohambo ye oshikando shotango, oongombe oye dhi adha dhi na uupapa. Ashike sho ya ka shuna ko ishewe, oya adha iihako ya lundululwa osho wo uupapa wumwe wa kuthwa ko komakutsi goonkwandambi.
“Uupapa oko wa li komakutsi osho wo iihako sho osho she tu kwathele tu mone ooyene yoongombe ndhoka,” Amwele ta ti.
Taku fofotwa wo kutya oongombe odha li mohambo yamumwayina Gideon Abner, oshoka Nelongo ina likola ohambo nando.

Alpheus Johannes, gomOshipumbu shOmugongo, okwa li a kanitha oongombe 15 momumvo 2016, noonzinzi ntano nuutana utano owa li wa adhika kOmangeti moshigunda shaNelongo. Hilba Shilongo, a za mOnempengu okwa li a kanitha mbali, nayimwe oya monika ngashingeyi.
Ongombe yaTomas Gabriel nayo oya adhika wo kohambo hoka. Ooyene yoongombe ndhoka dha monika oya gandja olupandu lwawo kaanambelewa yopolisi yaNamibia oshoka oya adhikile ya hupula nale.

LEAVE A REPLY

Please enter your comment!
Please enter your name here