Opolitika yokalamauka nayi hule

0
32

• Apostle Marson Sharpley

Okukondjitha epangelo lyokatongotongo kasha li nande ashike ehokololo lyokuhungila, ashike iiningwanima yoshili. Pethimbo sho shiti a li ta tekele mbundje mokukondjitha uukoloni, aantu oyendji oya li ya tanga omagulu gawo, yo yamwe taye tu pilukile po wo, ashike ngashingeyi otwa dhiminathana po ngaashi osho shi na okukala.

Kepupi lyaagundjuka, shimwe shoka sha li tashi hokitha pethimbo lyomathimbo omalulu, osho shoka kutya otwa li hatu lesha olundji, otwa li hatu tompathana, tse natango otwa li hatu kutha ombinga miigongi oyindji nomomadheulo ga yooloka. Nomasiku getu gomondholongo otwa li wo twe ga ningi omasiku goku ilonga noondholongo otwa li twe dhi ningi iiputudhilolongo yetu. Iigongi yuudhano wokatanga kokoompadhi osho wo oateletika kawa li hawu kala kokule nomatompathano kombinga yemanguluko.

Onda itaala kutya ngele otwi itula mo okuhalakanitha omashongo ngoka ge tu palamena ngaashi okwaaha shuwa okulesha, uuthigona, omahepeko gopaukashikekookantu, omiyonena osho wo okudhengela ondhi peiho, nena otwa pumbweni okuhungila. Onkene otu na okuza momitumba, oshoka ngashingeyi otu li owala omitumba moombelewa, natu zeni mo e tatu yeni poshitaafula.

Omashongo ngoka ga yaga kegonga ga palamena Namibia oga pumbwa oonkundathana dhomuule, ano tadhi pitilile nokuli oongamba dhuukwamuhoko, okwaa tsa kumwe komaitaalo gopambepo osho wo okukandula po onkalo yaNankali kohi Nangombe kombanda. Etumba ndyoka twa li tatu longitha okukondjitha omutondi sho twa li tatu kondjele emanguluko, olyo wo natu elele uuna tatu kondjitha eliko. Omahilathano ngoka ge li pokati ketu otaga kenyaneke go otaga shunitha wo oonkambadhala dhepangelo mokukaleka po onkalo yi shi okunuwa omeya moshilongo.

Namibia onkee natango e li ta tumbalekwa muuyuni, ashike natu kotokeni kutya mboka taye tu tumbaleke otaya vulu wo oku tu pilukila po, ngaashi twa mono nkene twa kuthwa oonkatu ngele tashi ya kondjele yomahupilo ya ningilwe omvula ya za ko. Ope na ehangano lyuukumwe waEuropa ndyoka tali undula opo aakalelipo yawo yi inike komulungu nomuplesidente gwetu Hage Geingob kombinga yiinima mbyoka ye wete kutya nayo wo oye ya guma. Iinima ngaashi evi osho wo okunkondopaleka aantu yomoshilongo oya simana kaaku na we, nomanga tatu tyapuleni iituthi ya yooloka, kape na oshidhila shoku tu keelela tu yi mbotholeni mo e tatu yi popi wo twa manguluka.
Ashike olundji ohatu iyadha tatu yi naadhoka dhaafele hadhi tu ziilile unene kointaneta, oonkundana ndhoka hadhi piti kohi yoshipalanyolo tashi ti “Onkundana Kamana”, nolundji ohadhi kala tadhi popi oonankali yokegulu shi na sha niiningwanima yomegumbo lyepangelo. Shika osho naanaa okalamauka kopapolitika.

Okalamauka kopapolitika haka oko naana haka nwetha mo aatoolinkundana ya kale ye li olwaamambinga uuna taye tu pe mo mokambundju koonkundana dhawo. Okalaumka haka oko ke li katokote mokunyateka kehe shoka tashi longwa komupelesidente Hage Geingob pamwe naaleli wo yamwe ya hogololwa manga taya kambadhala okukandula po omaudhigu ngoka ga kehe siku ge li komeho getu.
Oshike tashi eta okalamauka haka? Okalamauka hoka otaka teya po shoka twa kondjele pethimbo lyuukoloni. Ashike shika oshi li uupyakadhi womuuluyi.

Okalamauka kopapolitika haka oko taka ningi aantu ya kanithe einekelathano, okuza tuu pamuthika gwegumbo sigo opamuthika gopashigwna. Ashike nashi kale sha yela kutya uuna wu na omulandu gopapolotika ngoka gu na iiyimati tayi tyapulwa ashike kaantu yamwe, nena otatu ka huulila mopolotika yokalamauka. Sho ohashi eta nee aantu yamwe oyo ashike ye li moombelewa oonene dhomoshilongo.

Odhoshili, oshi li oshitopolwa shonkalamwenyo okukala wu hole iinima tayi nyanyudha omeho, okukala wu na oonkondo osho wo okukala naanona yetu ye na kehe shoka ya pumbwa, yo taya longwa moosikola dhingi.

Ashike epulo ndyoka lya pumbwa eyamukulo olyo ndino kutya, ano naanaa sho aantu ye li monkalo yokukondjela iipundi yopapolitika, shika otashi ningwa medhina lyaamboka kaaye na omawi nenge pamwe kehe gumwe ota kondjele ashike omagadhi ngoka haga endele pamwe
noombelewa oonone dhopapolitika?

Onga gumwe gomoonakulwa aakulu yekondjelomanguluko nondi li wo oshilyo shongundu yetu tayi pangele, otandi tindi thilu okukutha ombinga moohapu dhaafele ndhoka tadhi ulike ondhino yaaleli yetu.

Otashi ende mbela ngiini opo omuntu a tote oohapu kutya oshilongo otashi lelwa komunyekadhi goshilongo? Onkene ookuume, natu shi uveni ko kutya shika osho nee hashi ithanwa okalamauka nosha nika oshiponga oshoka otashi tula oonkambadhala dhaantu mboka ye li wo oshitopolwa shonkalamwenyo yetu muudhigu.

Ondi na etimaumbwile kutya kehe ominista, omunapolitika nomukuluntu miilonga kehe oku li a kutha ko oongaku mokugwanitha po oshilonga she. Eeno, okwaa tsa kumwe opo taku kala, ashike kehulilo lyesiku, natu hanganeni. Tseni otu li moshilongo oshiwanawa.

LEAVE A REPLY

Please enter your comment!
Please enter your name here