Osekundosikola yaNuuyoma ya dhana uudhano womuthigululwakalo

0
52

Komutoolinkundana
OSHIKUKU

Osekundosikola yaNuuyoma moshitopolwa shaOmusati moshikondolongo shaOshikuku oya li ya dhana uudhano womuthigululwakalo mEtitano lyomasiku 9 Maalitsa. Uudhano mbuka ohawu dhanwa konyala omumvo kehe. Oshituthi shika osha li sha longekidhwa kaalongi moshikondo shomalaka gOshi-Afulika mewiliko lyatate Simon Shiwanda natate Edward Shikesho. Enenedhilaadhilo lyuudhano mbuka okuhwahwameka
omuthigululwakalo wOshiwambo okupitala moondjimbo, oongano, nosho wo momatangumuno gwOshiwambo.

Oshituthi shika osha li sha patululwa negalikano lyopaShiwambo kekanda lya za mondondo 12C Katombela Fredrick, ngoka a hambelele nokupandula oonkwengu dhokuuzilo, dhokuumbugantu, dhokuumbangalantu nosho wo dhokuninginino, opo nee ta galikana a taalela kuuzilo. Shika okwe shi ningi nelalakano kutya kuuzilo oko ku na aathithi mboka ye na elago, yo oyo haye tu pe iipalutha. Shiwanda okwa ningi etaambeko lyaayenda, nokwa kunkilile aalongwa, aavali nosho wo aalongi ya dhiginine omithigululwakalo dhawo.

Konima yetaambo lyaayenda ekanda lya za mondondo 11C, Abel Martin olya mwenyeke ewangandjo nokunyanyudha ookatalekonawa, sho lya pewa ompito opo li itotomone. Konima yaashoka, oonekandangala lyombandje ya za mondondo 12B, Jona Emmanuel naKanana Alfeus, osho wo 12G Sheetekela Chris naFillemon Shilengitha, oya thamuna mo nawa esimano lyomuthigulukwalo mwa kwatelwa okuyogwa omupya, oku ka tala omvula kEwale, osho wo esimano lyoondunda dhOshiwambo.

Moshituthi shika omwa li wo mwa kwatelwa ethigathano lyuudhano womuthigululwakalo, moka ongundu kehe okutameka kondondo 8 sigo 12 ya li ya dhana iidhano iyali yomuthigululwakalo gOshiwambo. Mpaka opwa li iiti tayi teka. Ondondo 12C oyo ya li ya patulula ondambo, noyo ya toola po oondola N$400 dhehala lyotango. Ondondo ndjika oyi na iifume niindefa yi shi okutembula, uunona otawu nuka wo tawu dhana wa pandeka. Kombiga yoonguyo dhomuthigululwakalo, oto hala wu tye, omo wa shitilwa.

Ondondo 12H oyo ya sindana ehala etiyali noya pewa oondola N$300, omanga ondondo 11D oyo ye ya pehala etitatu noya sindana oondola N$250. Ondondo 12E oyo ya etelele okano, ano ye ya pehala etine. Ondondo ndjika oya toola po nee okapandi koondola N$150. Oongundu ndhoka dha sindana ngaashi 12C nondondo 12H, oya pata ondambo. Poshituthi opo wo mpaka opwa li tapu landithwa oondya dhOshiwambo ngaashi oonashimbondi shamundjulu, oondunga, oonyandi, uusila, omahuku, onzoye, ookahadha, omagungu, oofukwa nosho wo omakunde noshingali. Oondya odha li dha telekeka, na ondjuhwa kehe oya li tayi tondoka nehandja lyayo. Kakele koondya, poshituthi mpaka opwa li wo tapu landithwa omagongo nosho wo omalovu gyiilya. Konima yuudhano aalongi opamwe nookatalekonawa yomomudhingoloko gwaShikuku oya kala ya gondja, yo taa hapula nokutilahi oshindjola.

LEAVE A REPLY

Please enter your comment!
Please enter your name here