OShana otayi tsikile noku iyupika komeho gekopi lyoThe Namibian

0
47

Shipi Elago
ONGWEDIVA

Osipana yaShana yokatanga kokoompadhi oyi li ya kutha ko oongaku moku ilongekidhila ekopi lyoshifo shoThe Namibian. Ethigathano ndika oli na ko ashike oshiwike shimwe opo li galukile mondambo, shoka shi li omukalondjigilile aluhe pethimbo lyiituthi yoPaasa.
Olyomakaya ga za ko osipana ndjika oya li ya dhana uudhano wopambili nosipana yOshana Second Division 11 ndjoka ya folomwa po kaadhani dhingi ya hogololwa moosipana dha yooloka hadhi dhana moliha yaShana.

Ontsi oya li ya tsima nomomeya sho omakondombolo ngaka ga li taga kondjele ehete pokapale koIndependence Stadium mOshakati.
Oshana U/20 ndjoka yi li kohi yewiliko lyaMesiasa gwokatanga kokoompadhi mOshana pethimbo lyongashiingeyi, Samuel Shaama ngoka a tseyika nawa nedhina Bongo oya li ya tameke tayi ponoka ya fa epeya, moka iikando oyindji ya li tayi keelelwa posheelo shokoola yOshana Second Division x11.

Okuponoka kwawo okwa li kwe ya etele oombwayelo konima naamati yoSecond Division oya li ya tula mo okoola yoshiyakela mominute lela dhopetameko noyendji mboka ya li pokapale oya li ye wete kutya osipana yo U/20 otayi pewa nambwa shinyanyalitha.
Ashike hoka aantu oyendji ya li ya fala omeya hako taku hangwa, oshoka uumati wosipana yopashitopolwa owa li wa tameke tawu dhana wa fa itawu ka mona we etanga, na owa li wa tameke okungongolitha etanga komwiidhi wo tawu matuka uukodhi tawu ka lala.
Nando uumati owa li tawu lu wa mana mo osipana yoSecond Divison x11 oya li tayi ulike ya kindja nokonima oya li ya tula ko ekumba ndyoka lya li lya tilitha aayambidhidhi yoShana U/20 oshoka omatanga agehe ngoka ga li ga thangelwa omukwati oga li taga thikile mOkashako.

Oshana U/20 oya li ishewe ya ponoka okuzilila kolulyo lwokapale nomudhani gwawo gwokomeho okwa adhika naana e li pehala ewanawa nokwa li a thangele etanga monete nokuninga eyalulo yimwe muyimwe.

Oosipana dhika mbali odha li nee dha tameke okwiitula ookoola sho Oshana Second Division tayi tula mo yo Oshana U/20 otayi tula mo naashika osha li sha eta eyalulo lyi kale 3-3, ashike aamati yoSecond Division oya li ya kondekele uumatyona wo U/20 koshikololo unene tuu sho wa li tawu monika wa loloka no ku tula mo ookoola mbali dhoshiyakela moominute omulongo dha hugunina nokusindana po uudhano mbuka nookoola 5-3.

Ashike omudhewuli gwosipana ndjika Samuel Shaama okwa ti osipana ye kayi shi okatana nota yi ka longa nuudhiginini opo yi ete ekopi ndyoka yi ihula okusindanana mo 2016.

Aamati ayehe mboka ya hogololwa oye li aadhani haya dhana moosipana dhomoSecond Division yaShana yo ayehe oye enda miiputudhilo yokuzula aadhani mbyoka hayi ithanwa ooAcademy, onkene okwa ti oye na ontseyo ya gwana na ka pu na omalimbililo otaya ka gandja uupyu hwiyaka koZambezi.

Sam Nekwaya ,omukwatakanithi gwoNFA mOshana ngoka a kala nosipana yoThe Namibia U/20 ethimbo nuule okwa li u ulike enyanyu lye nkene osipana ndjika yi li yi na uukwatya wulimbilika okuyeleka noosipana dhilwe dhoka ya kala nokufala kekopi ndika.
Omugongo omuposi okekuya dho oombata okakuya kaake po, ondjodhi yOshana opo yi tse Oshana oshi na okukandula po omayinda ngoka ge li mondjila yago molupe lwoHardap nOshikoto dhoka tadhi ka tya pwaka nOshana mongundu yaC.

LEAVE A REPLY

Please enter your comment!
Please enter your name here