Oshiwike shokudhinda iipyu niitala sho Namibia a gwanitha omimvo 28

0
17

Uukuluntu kawu shi okumena ooniga, nomuntu kehe a valwa momumvo 1990 ke shi we okanona, ashike omukuluntu, tashi vulika e na nale negumbo lye naakwanegumbo lye te ya sile oshimpwiyu. Namibia wo oku li ta gwanitha oomvula omi-28 dhemanguluko, okuza sho a li a zi muupika wepangelo lyuukoloni momasiku 21 Maalitsa 1990. Onkene oshiwike shika osha kala oshiwike shokutula koshiviha oonkatu ndhoka twa katuka opo tu adhe pondondo ndjika tu li monena.

Ngashingeyi kali shi ashike ethimbo lyokutala kondjokonona, ashike otu na okutala kutya epandela lyoshilongo shetu otatu li simaneke noku li yambula po pamukalo gwa tya ngiini. Emanguluko lyopapolitika olya simana, nomontalelo moka omo wo natu taleleni nokusimaneka omamanguluko goludhi lwi ili.

Ethimbo olya thikana tu tale kutya emanguluko lyopamahupilo otatu li adha taku longitwa omukalo gunipo. Otu na okulwa twa tula ombunda moshihwa uuna tatu tidha emanguluko ndika. Shika osha simana unene kutse mboka twi itaala kutya emanguluko lyopapolitika olya li lyi na oku tu patululila omiyelo dhiinima oyindji, omauthemba osho wo emanguluko ekwakugumwa.

Onkene kehe omuntu okwa pumbwa oku ipula muule kutya ye okwa pondola shike monkalamwenyo ye sigo oompaka. Naashika nashi kale tashi vulu oku etwa montaneho yaayehe. Uuna tatu landula ondjila ndjika, natu gandje wo olupandu kuyakwetu mpoka ya longa sha shomupondo, tatu simaneke omithigululwakalo dhayakwetu opo tu kandule po uukwamuhoko.

Ngele tashi ya kiikundaneki tayi kundaneke ya manguluka, otu li lela twa londa koshitayi shopombanda, oshoka otu li otse aatango menenevi lyetu. Muuyuni natango onkee tu li tatu shi enditha nawa oshoka otatu dhenge mo niilongo mbyoka yi na uudemokoli wa mena omidhi niikundaneki oya li yi na okukala yi li memanguluko enene.

Ashike nando ongawo, ihagu imi gwaa na shipele, natse otu na wo uudhigu waaleli oyendji taya ti kutya oshikuki shetu inashi gwana na itashi vulu okukandula po omukundu gwaantu yamwe ye na ofulundundu omanka yamwe taya hupu shokadhila.
Omukundu ngoka ogwe etwa unene kepangelo lyokatongotongo, ashike ngashiingeyi natango Namibia sho lya manguluka ope na mboka taya li oompanda mbali, taya lungu taya itapula osho wo okudhengela ondhi peiho. Omvula ndjika nayi kale omvula yokulonga nuudhiginini. Otatu ku halele evalo eti-28 lya sheywa Namibia!

LEAVE A REPLY

Please enter your comment!
Please enter your name here