Taya lalakanene okuthela okalambo omahepeko taga ningilwa oomeme

0
43

Maria Namupala
EENHANA

Omolwa edhimbuluko lyesiku lyoomeme muuyuni, engungo lyoomeme ya za miitopolwa ine monooli yoshilongo oya li ya gongala mondoolopa yEenhana oshiwike sha zi ko opo yi ikunde nkene ye na oku ikaleka kokule nomahepeko ngoka haya ningilwa.
Esiku lyoomeme lyopashigwana muuyuni ohali dhimbulukiwa aluhe momasiku 8 Maalitsa omumvo kehe, moka aakiintu haya gongala nokwiikunda iipambele mbyoka ya guma oonkalamwenyo dhawo.

Gumwe gomwaamboka yu unganeke esiku ndyoka li dhanenwe mondoolopa ndjoka , Magano Goases, okwa tumbula kutya esiku olya tamekele okudhimbulukiwa mo 1945, sho iigwanahangano ya zimine li kale tali dhimbulukiwa muuyuni awuhe, shika ta ti osha landula oshigongi shaakiintu 15 000 moNew York, America, moka ya holola omaiyuvo gawo shi na sha nonkalo yawo osho wo uuthemba wawo.

Goases ta ti aakiintu oyendji moshilongo nomuuyuni oya taalela omashongo ogendji, ngaashi okuhepekwa momagumbo, moondjokana, okwaahe na iilonga, oluhepo oshowo okwaahe shi uuthemba wawo onga aakiintu nolundji oyendji otaya thindilwa kongudhi kaalumentu.
Pethimbo ta gandja oshipopiwa shesiku omupeviminista muuministeli woohi noonzo dhomefuta Sylvia Makgone, okwa ti esiku ndika olya nuninwa aakiintu ya kundathane uupyakadhi nomikundu ndhoka ya palamena.

Makgone ta ti otaya lalakanene okuhulitha po omahepeko goomeme, ta ti oyendji oya pumbwa okunkondopekwa, yo ya kale taya manguluka mokupopya omaudhigu gawo uuna yi iyadha monkalo tayi nyengathana.

Mesiku ndika tse aakiintu otu na okukala tatu tala uupyakadhi twa taalela moonkalamwenyo dhetu esiku kehe. Ando olyo esiku moka tu na okukala tatu kundathana nkene tu na okukutha po omashongo ngoka twa taalela. Ano natu simanekeni esiku ndika”, ta popi ngaaka.
Magkone ta ti iimbuluma tayi longelwa oomeme nuunona moshilongo otayi yemateke notayi nyanyaleke, ta ti ndyoka olyo limwe lyomomashongo ga pumbwa okukondjithwa .‘‘Omakwatonkonga otaga lopotwa taga indjipala unene, omadhipago nomahepeko goludhi kehe ngoka taga ningilwa oomeme, ayihe mbika oya pumbwa okuhulithwa po naashika otashi ningwa uuna tu na elongelokumwe notatu gongala oku ikunda ayihe mbika’’, Makgone ta gwedha po ngaaka. Ta tsikile ko ta pula oomeme ya kale taya gongala miigongi ngambika yo taya ikundu iipambele mbyoka ye ya guma, ta ti yo onga aakiintu moshilongo oyi imanga kumwe mokukondjitha nokushunitha pevi omahepeko taga ningilwa oomeme momidhingoloko dha yooloka.

LEAVE A REPLY

Please enter your comment!
Please enter your name here