Ulla Pirkko Nenonen – Omutumwa a kala ethimbo nuule moNamibia

0
46
WINDHOEK, 09 May 2016 - European Union (EU) Ambassador to Namibia Jana Hybaskova (L) toasts with Deputy Minister of International Relations and Cooperation Peya Mushelenga during the 2016 Europe Day celebration held at National Art Gallery of Namibia (NAGN). (Photo by: Joseph Nekaya) NAMPA

• Dr Peya Mushelenga

Aantu yamwe oye na uuntu womuntu komitima, noonkalamwenyo dhawo ohaye dhi egeke manka opo ya kwashilipaleke kutya onkalamwenyo yaantu yalwe oyi li monkalo tayi nuwa omeya. Gumwe gomaantu mboka ye na uukwatya wa tya ngeyi oUlla Pirkko Nenonen, ngoka a manene ondjenda dhe momasiku omu-09 gaMaalitsa 2018. Okwa valelwe momasiku 31 gaMallitsa 1933 nokwa li a hiti enongelo lye koImatra High School moka a li a mana momumvo 1954. Okwa tsikile nokutidha elongo sigo oponkantu yopombanda, moka a li a mono onzapo muuteolohi okuza koUnivesiti yaHelsinki mo 1960.

Okwa li a landula moompadhi dhaakadhona aagundjuka yalwe, nokwa li e ya moSouth West Africa. Mokuthika kwe ina kwataakwata na okwi ilongo elaka lyOshimbulu, nokwa tameke okulonga pokasitola kongerki kokunyanyangidha iinyolwa. Okwa ka longa kosikola yaKahao yokuzula aalongi, ndjoka konima ya ka shashwa a tayi pewa edhina Ongandjera Secondary School, shika okwa li e shi ningi okuza momumvo 1963 sigo 1979. Okuza mo 1980 sigo omo 1982, Nenonen okwa ka longa kOshigambo.

Nonando a li i ilongele uuteolohi, ka li ha tila omuti ineegu londa, okwa tameke okulonga oshilongwa shOmwaalu. Okwe shi longo nuudhiginini nokwa li te shi dhenge komutse tuu shili. Manga aalongisikola oyendji ye li momafudho, Nonenen efudho okwa li he li uvu ngokatana komiilya, oshoka okwa kala nokugandja ootundi dha gwedhwa po, ta longo aalongwa ye mboka a li e hole tagu pu mo.

Okuza mo 1983 sigo 1993, Nenonen okwa longo onga omukwatakanithi pokati kongeleka yevaangeli moNamibia naandjoka yokoFinland. Onga amushanga gomakwatakanitho ngaka, okwa li oye omukuluntu gwevaangeli ndika, oshilonga shoka hashi pewa omuntu omwiinekelwa. Nonenen okwa li oye omukulukadhi gotango okupewa oshinakugwanithwa shi thike mpo. Okokutya tuu shika osha li she mu pe oonkondo, oshoka onkatu ndjika oya li ontine ngele tashi ya kuukuluntu welelo lyongeleka. Ashike Nonenen okwa fa owala haye a li a pewa oonkondo dhi thike mpoka, okwa kala lela omupiya gwakalunga i ifupipika.

Molwonkalo ye yuuntu itoo yi pewa lwaali, Nonenen okwa li a igilile mbala aaNamibia nonkalo yawo. Aantu oyendji oya li ye mu indile opo a ninge omuthikameni guunona wawo. Onde mu konakona wo iikando oyindji ta zi kOpuwo ta yi kiitopolwa yokonooli hoka a li ha yi komafumviko, kOpuwo oko kwa kala ku na olukalwa lwe okuza mo 1994 konima sho a yi moshipundi shevululuko, shoka tashi ulike kutya okwa kwatela po onkalo yuukuume wa kola naantu oyendji.

Omukulukadhi nguka gokawi kombili ka talala nawa oye oshiholelwa oshiwanawa uuna tashi ya kaapiya yaKalunga, nokwa li omwiiyambi omuvuliki. Okwa kala mOpuwo uule woomvula dhi li 11 moka a kala nokutolokela Aadhemba ombiimbeli, ko oko nee nde mu mono lwahugunina momumvo 2012. Nonando a li ta monika ta kulupa, okwa li natango ta tindi okundonyoka.

Nenonen okwa kala nokugandja omayakulo ge moNamibia uule woomvula 54. Shoka tashi mu eta opo a kale omutiyali momusholondondo gwaatumwa mboka ya gandja omayakulo gawo moNamibia, a thigwa po ashike kuMartti Rautenen, a tseyika nawa Nakambale, ngoka a kala mo oomvula 56. Okwa kala wo e na ehalo opo a fumvikwe moNamibia.

Ulla edhina lyomoScandanavia tali ti yambapaleka. Pirkko otashi ti kalunga kopombanda. Nonando ka li a yambapala ngele tashi ya komaliko, Nonenen okwa li a yambapala ngele tashi ya kiiyimati yiilonga ye. Aalongwa ye oyendji otaya gandja omayakulo gawo moNamibia. Nonenen okwa li a simanekwa nokuholike. Otatu ke mu yuulukwa sigo aluhe. Menee hyvin! Olet onnistuneesti päättänyt kilpailun!
• Dr Peya Mushelenga ominista yomahumithokomeho goondoolopa niitopolwa yokuushayi.

LEAVE A REPLY

Please enter your comment!
Please enter your name here