Uusiku woondjimbo dhopambepo ehuliloshiwike ndika

0
52

Pinehas Nakaziko
OVENDUKA

Ongundu yaahiki yoongalo dhopambepo yedhina Franklin naDee’A, otayi ka imba oongalo dhawo dhoGospel pamwe naahikingalo ya yoolokathana, poshituthi shoVictoria Fest, shoka ya longekidha yoyene poZoo Park Amphitheatre Olyomakaya ndjika.

Franklin ngoka oye gumwepo gwomaayimbi yongundu ndjika okwa ti ongulohi ndjika otapu ka tya pwaka, naayehe mboka ye hole oongalo dhopambepo otaya ka nyanyukwa okupulakena oongalo dholudhi nduka, mwa kwatelwa ishewe oongalo dhoKwaito, uuhokololo, oRap, Soul noJazz.

“Oshituthi shika otwe shi lukila oalbuma yetu ndjoka twa li twa pititha omvula ya za ko yedhina Victory, nelalakano okutaandelitha oongalo dholudhi lwopambepo moshilongo okuya muuyuni auhe, netumwalaka lyOmuwa,” Franklin ta ti ngaaka. Okwa gwedha po ta ti oshituthi kasha na naana naahikingalo mboka taya ka imba, ashike elalakano okutaandelitha etumwalaka lyOmuwa, nokutaandelitha oongalo dhoGospel. Kumboka taya ka holoka otaya ka nyanyudhwa noonkondo, komainyanyudho ngoka taga ka dhana onkandangala, notaga ka kala ga dhenga mbanda.

“Shika natango okuhwahwameka etseyitho lyoalbuma yetu ndjoka ya pita nale, noku ilongekidhila esiku lyokuyitseyitha noku ulika oalbuma oyo tuu ndjika yedhina Victory komasiku gokomeho muAfrica,” Franklin ta ti ngaaka. Okwa gwedha po ishewe ta ti natango yo otaya ka imba koUnited States of America (USA) nelalakano okutsyeitha oalbuma ndjika. Ashike poshiindingili shika shoVictory Fest otapu ka kala ishewe aahikingalo ngaashi Maranatha Goroh, D-Naff, Pride, Abner Mumbala, Maanda Gabriel, Adoration Choir naEsperance Luvindao , mboka taya ka mwenyeka uusiku owo tuu mbuka. Ongundu yoFrankline naDee’A oya li ya holokele moongalo sho ya li ya eta po oalbuma yoVictory omvula ya za ko, ndjoka ya li yi na ehwata lyoongalo 15. Moalbuma muka omu na oongalo ngaashi Chop O Life naHe Saves, adhihe ndhoka dhi na uuvidio wawo. Oshiindingili shika otashi ka tameka pohamano yokomatango, nuutekete otawu kotha oodola dhaNamibia 100, puAntonio’s Art naMono Music Shop moshilando.

LEAVE A REPLY

Please enter your comment!
Please enter your name here