Yamwe yomomalenga gaNdonga ya tsu mo dhawo

0
372

Maria Namupala
OLUNO

Konima sho omalenga gahetatu mElelo lyOshilongo shOndonga ga kuthwa miilonga komukwaaniilwa Immanuel Kauluma Elifas omumvo gwa zi ko, oshigwana shaNdonga osha kala sha topoka moongundu mbali ndhoka itaadhi tsu dhi thithe, nopokati mpoka opwe ya omavundakano nomatompakano.

Omalenga ngoka ga kuthwa miilonga oga kala taga ningi iigongi mpaka naampeyaka, molwaashoka ogi itaala kutya oga kuthwa miilonga shaa li paveta, noye li ya tegelela elombwelo okuza kunkeyama ye mwene ngaashi a li e ya ganithile miilonga.

Olyomakaya ya zi ko engungo lyaakwashigwana pamwe nooyene yomikunda oya li ya gongala mosaala yiigongi pOluno opo yi ikunde ondjila ndjoka ye na okukatuka, nonkene ye na okukandula po omukundu ngoka gwi iteyela mOndonga gokwaa tsa kumwe nokwaahe na ombili mokati kaakwashigwana oshowo aaleli yopamuthigululwakalo.

Ngoka a li a popitha engathithi Vilho Sheetheni Kamanya okwa tseyithile aakwashigongi kutya moonkundwa dhawo oya tokola opo ya tote po ombelewa yimwe ompe yoshilongo hoka taku kala taku gandjwa omayakulo, molwaashoka oye wete kutya mboka ya tulwa mombelewa ngashingeyi itaya longo muuwanawa woshigwana yo itaya gandja omayakulo ngoka ga pumbiwa niishewe otaya longo shaa li paveta molwaashoka natango inaya langekwa nokuganithilwa miilonga.

Okwa ti ombelewa ndjoka otayi adhika ontega nohotela yaPunyu pOnethindi, notayi tameke okugandja omayakulo Omaandaha goshiwike shika, hoka kwa tegelelwa aakwashigwana ya longithe omayakulo gawo agehe.“Otwa hala owala oku shi yeleka mpaka nena kutya tse onkene kaatu na uumbanda onga omalenga gomukwaniilwa, e tu hogolola ye mwene, omatumpakano nomangwangwaneko ngaka otaga etwa po owala koohandimwe, mboka yaa shi oompango nooveta dhopamuthigululwakalo, nongashingeyi otaya longitha nayi edhina lyomukwaniilwa molwaashoka okwa kwatwa kuunkundi no iha vulu we okuninga omatokolo kuye mwene, ota longithwa owala ,” Kamanya ta ti.

Oshigongi shoka osha li sha kalwa komwaalu gooyene yomikunda oyendji, moka yamwe ya holola kutya kayu uvitile ombili omavundakano ngoka gi iteyela mOndonga, unene sho aakalimo yamo ya halakana yo kaye na elongelokumwe nonande ye li omuntu gumwe.Taya popi kutya itaya mwena nokuthuwa sigo iinima ayihe ya shuna kolutenda. Ooyene yomikunda yamwe oya yelitha kutya konima sho elelo ndyoka lye ya ko aakwashigwana otaya mono iihuna molwaashoka ihaya pewa we omayakulo ngaashi nale, unene oofuto dhiifendela, oompangu nayilwe oya hulithwa po manga, yo kaye na ombili momikunda molwaashoka aantu oya topoka nayi. Oshigongi osha tsu kumwe opo ya kwashilipaleke kutya ombili oya kalekwa po taya popi kutya Ondonga opo tayi kala sigo ondongolondongo.

Omalenga ngoka oga kwatela mo Kashona kaMalulu, John Walenga, Joseph Asino, Fillemon Nambili, Vilho Kamanya nayalwe, oya tula mo oshipotha kompangu yopombanda mOshakati, hoka kwa tegelelwa shi ka kale sha pwilikinwa mbalaOonkundathana ndhoka twa ningi naamushanga gwelelo pethimbo ndika Nepando Amupanda, okwa ti oshigongi shoka sha li ko Olyomakaya kasha li paveta, noshi li ompinge nooveta dhelelo lyopamuthigululwakalo, molwaashoka omalenga ngoka oga kuthwa miilonga nokage na uuthemaba okulongitha edhina lyelelo lyoshilongo shaNdonga.

LEAVE A REPLY

Please enter your comment!
Please enter your name here