Young Chiefs a mona osipana yokatanga komokambamba

0
47

Shipi Elago
ONGWEDIVA

Ongundu yoontana dhanelende dha za mOshakati noNgwediva oya li ya toto po osipana ompe yokatanga komokambamba, ndjoka tayi ithanwa Young Chiefs Netball Club ya yama kosipana yokatanga kokoompadhi yomOshakati.

Pethimbo sho a li ta kuthile ko Kundana Olyomakaya ga za ko pomadhewo gawo mOshakati, Helenah Simson okwa ti osipana yawo oya li ye yi toto po konyala iiwike iishona ya piti na oye li ya pewa epitikilo koYoung Chiefs opo ya dhane kohi yedhina ndika.

“Otwa li twa mono kutya monooli omu na ooKalaba oonshona dhokatanga komokambamba, nando omwaalu gwaadhani otagu londo pombanda esiku kehe, onkene otwa li tu wete kutya oshi li shu uka opo tu ete po osipana ndjoka tayi kala nokukutha ombinga momawudhano gwopashitopolwa nokudhana momakopi omanene ngaashi iitopolwa yilwe,” Helenah ta ti.
Okwa ti nando osipana yawo oyi li ohanana lela noya pumbwa eyambidhidho, kayi na omudhewuli oshoka pethimbo ndika oye li ashike taya idhewula kuyo yene.

“Otwi ipyakidhila nokukonga omukwashilipaleki ngoka ta kala noku tu sila oshimpwiyu miipumbiwa yesiku kehe momawudhano getu okuza ngaa komatanga, uuhiya, iizalomwa yomokapale noyo ku idhewula osho wo omalweendo,” Helenah ta tsikile.
Osipana ndjka tayi kala nokutseyika nedhina Young Chiefs Netball Club oyi li wo metifa okuhogolola olutu ndoka talu kala noku lela osipana ndjika oshoka paehapu dhaHelenah oya hala osipana ndjika yi kale kadhenga ngele otashi ya momawudhano gwooKalaba monooli nomoshilongo ashihe.

Okwa ti osipana oya thikama po moshipandi shoontana dhaNelende lyUugwanga dhi li 20, ndhoka dhi li pokati komimvo 20-39.
Olwaala lwosipana ndjika otalu kala olumbulawu nolutokele ngaashi naana ndoka halu longithwa kosipana yokatanga kokoompadhi.
Ndokosho Tabita oye Kapteina gwosipana ndjika na ota hiya aadhani yokatanga komokambamba moshitopolwa opo ye ya wayimine opo osipana yi kale ya manga ya pama.

Okwa ti otaya ka ishangitha moliha yokOndangwa, omanga wo a ti otaya ka kutha ombinga momakopi gwomoshitopolwa.
“Oosipana dhuudhano wokatanga komokambmba monooli odhi li tadhi yalulwa nolundji uudhano mbuka ohawu dhanwa ashike pamuthika gwoosikola, nuunona mboka hawu zi moosikola kawu na we ompito yokukutha ombinga oshoka itaya vulu we okudhana moosikola po kapu na ookalaba moka taya vulu okudhana,” Tabita ta ti.

Osipana ndjika oyo yotango okukala yi ithikamena yokatanga komokambamba mOshakati, kakele koosipana dhomahangano niiputudhilo ndhoka dhi li mo ngashiingeyi ngaashi osipana yoNampol, UNAM nosho woMedipark, ndjika oyo awike okalaba inayi yama kehangano nenge koshiputudhilo shontumba nondi wete onkundana ndjika otayi nyuwitha omakutsi goyendji mboka ye hole uudhano woludhi nduka moshitopolwa.

LEAVE A REPLY

Please enter your comment!
Please enter your name here