Aanafaalama naya longithe omikalo dhilwe dhokungambeka okapuka

0
17

• Esther Ndumi

Uupuka womaludhi nomaludhi owo tau etitha opo Africa a kale ta kanitha etata lyiilikolomwa ye yomomapya. Uupuka mbuka ohau yonagula wo omapya kiitopolwa yimwe mbyoka opo tayi putuka muuyuni. Opo Africa a vule okupalutha aakalimo mboka taya indjipala esiku kehe, nena aanafaalama oye na okumona omikalo dhokukelela okapuka. Kaanafaalama aashona, omikalo dhokukelela okapuka inadhi kala tadhi pula mondjato unene, dho nadhi kale wo tadhi ningwa pamikalo ndhoka tadhi gamene omudhingoloko. Omapekaapeko otaga ulike kutya ngashingeyi omikalo dha tya ngeyi otadhi vulu okulongithwa.
Oshikondo shIigwanahangano shi na sha niikulya nuunafaalama, omasiku ga piti osha li sha pititha omushangwa ngoka tagu wilike nokukwathela aanafaalama aashona mboka mokukondjitha okapuka. Okapuka haka oke li miilongo yi vule po-30 yAfrika nota ka tyakaleke unene epungu, ndyoka olyo lyi li oshikwiila sha kehe esiku miilongo oyindji.

Omushangwa tagu popi kutya oshihwepo aantu ya longithe omikalo dhopaushitwe, osho wo uunongo waakalimo yomiitopolwa, shi vulithe okulongitha omiti. Tagu ti omiti nadhi longithwe ashike pethimbo aantu ye li monkugo yi na onkambe, oshoka ohadhi vulu okuyonagula omudhingoloko nokukutha evi ongushu.
Aanafaalama aashona moAfrika ohaya teya oopelesenda 80 dhiikulya menenevi. Onkene osha simana ya kale ya homata uunongo wokukondjitha okapuka. Nonando oyo ye li ya talika omeho shaashi oyo shikwetepo mokupalutha aantu, naya ndungikwe kutya oya pumbwa okulongitha omikalo ndhoka itadhi kutha omidhingoloko dhawo ongushu, dho inadhi kala dha nika oshiponga. Omapangelo naga kwashilipaleke kutya aanafaalama oyu uvite nkene sha nika oshiponga okulongitha ashike omiti odho adhike okupombela okapuka.

Omiti dhokupombela okapuka
Uuna okapuka ka tokola okuyonagula po iilikolomwa yawo yomomapya, aanafaalama aashona oyendji ohaya ligamene kokulongitha omiti, dhika omiti dhoka dha longwa kaantu nohadhi dhipaga nokukeelela okapuka. Elongitho lyomiti ndhika otali tana unene miilongo ngaashi Cameroon, Ethiopia, Ghana, Kenya naNigeria. Mo 2017, Nigeria okwa longitha oshimaliwa shi thike poomiliona US$400.
Omiti ndhika odha simanekwa shaashi ohadhi dhipaga shili okapuka. Shika ohashi kwathele aanafaalama ya yungule nawa lela, nokuvula okulanditha yi imonene mo iiyemo. Pamukalo gwa tya ngeyi aanafaalama mbaka ohaya vulu oku igamena kondjala. Ashike omiti dhika, unene tuu ndhoka oonkulu, odhi na ombiliha nodha nika oshiponga. Onkene odhi na ashike uuwanawa wopakathimbo.
Ashike ngele oto shi talele monakuyiwa, hago naana omukalo tagu kandula po uudhigu, uupuka ohau kolonda, omiti dhika ohadhi yonagula po woo omidhingoloko osho wo uundjolowele waanafaalama. Okokutya wo tuu elongitho lyomiti dhika kali na engambeko lyasha. Omiti ohadhi zilwa olundji muukende wontumba hoka ihaku kala uuyelele kutya odhi na okulongithwa ngiini.
Omapekaapeko ngoka ga li ga tala ekwatathano pokati kelongitho lyomiti neteyo lyiilikolomwa miilongo yi li ine- Ethiopia, Nigeria, Tanzania naUganda, otaga ulike kutya mpoka pe na elongitho lyomiti, ope na wo iilikolomwa oyindji. Ashike oga mono wo kutya otashi pula ondilo molwomikithi nuundjolowele tau nkundipala, osho wo ethimbo lyokulonga tali kana oshoka aantu ohaya ka kwatwa komauvu gontumba.
Omikalo oompe dhokungambeka okapuka
Ope na omikalo omipe, ashike itadhi ti elongitho lyomiti otali ekelwahi thilithilu, ashike otadhi longithwa ashike uuna pe na omatompelo ga kola. Omikalo dhika otadhi tsu aantu omukumo opo ya longithe omikalo dhoka inadhi nika oshiponga, ngaashi omikalo dhopaushitwe. Mpoka to vulu okulongitha aatondi yopaushitwe yokapuka opo u ka kondeke.
Otaku vulu okulongithwa omaludhi gamwe gomiti ngoka ihaga yonagulwa kokapuka. Okukuna iilikolomwa ya yooloka omumvo kehe opo okapuka kaa ka ikilile iilikolomwa yontumba. Osho wo okulongitha okanka kamwe hoka haka hili okapuka, ko taka kakatele ko.

Omandiki ogendji ngoka haga ningi omapekaapeko muAfrika otaga popile omikalo ndhika. Endiki lyoInternational Centre of Insect Physiology and Ecology olyo limwe lyomomahangano ngaka. Okuza nkene lya totelwe po mo 1970, olya kala nokuninga iikonga noku andjagakaneka oopolohalama dhokukelela okapuka. Olya kwathela woo iilongo ngaashi Kenya, Mozambique naZambia opo yi kale neteyo lya pama.
Omikalo ndhika otadhi ulike tadhi ke shi pondola mokukelela okapuka. Omashongo ogo ngano kutya aanafaalama yetu oya pumbwa oku uva ko omikalo dhika noku dhi longitha oshoka otadhi kaleke po omidhingoloko dhetu, nokukale ka po uundjolowele wetu. Aanafaalama oya pumbwa iikwa niipangitho opo ya vule okulundulula omikalo dhawo. – The Conversation

• Esther Ndumi Ngumbi omupekaapeki nomukonaakoni omukuluntu koUnivesiti yaIllionois..

LEAVE A REPLY

Please enter your comment!
Please enter your name here