Aayelele pOndera otaya etitha oonkondo

0
34

Maria Namupala
ONDERA

Omupevipelesidente Nangolo Mbumba oshiwike sha zi ko okwa li a kutha olweendo lwowina pamwe naanambelewa ye, opo ya talele po aayelele mboka taya adhika pofaalama pOndera moshitopolwa shaShikoto.

Mbumba shika okwe shi ningi oshikando shotango, konima sho i inekelelwa oshilonga shuupevipelesidente komutse goshilongo omundohotola Hage Geingob oomwedhi dha zi ko. Osheendo shawo osha li sha kwatela mo woo ngoloneya goshitopolwa Henock Kankoshi osho wo aanambelewa yoondondo dha yooloka.

Mepopitho lye okwa ti oku uvite etumba molwaashoka aayelele mboka oyi itula mo mokulonga noonyala dhawo, ta ti okwa nyanyukwa okumona nkene taya ilongele kuyo yene, kaaye li momitumba ya tegelela epangelo liya yambidhidhe.

Ofaalama yOndera otayi adhika omukaakena gookilometa 70 okuza moTsumeb, naakalimo yaahoka oya li ya tulululwa kepangelo okuza pOshivelo mpoka oyendji ya li taya mono iihuna omolwonkalo yoluhepo noyokwaahe na iilonga.

Aakalimo yaahoka oye na iikunino ya yooloka moka haya kunu iilikolomwa ya yooloka, Mbumba ta ti yamwe yomaagundjuka oya pewa iilonga mofaalama moka taya longo nokwiimonena iiyemo.

Aayelele mboka oya li ya tulululwa mo 2013, nomagumbo oga li taga ihilile po 130, kakele Mbumba okwa ti omwaalu ogwe ende tagu indjipala oomvula noomvula, oyendji oya li haya kala pooha nopolisi mpoka, noya kala taya hupu shokadhila.

Mbumba ta ti okwa mono kutya onkalo yawo oya lunduluka molwaashoka otaya kambadhala oku imonena iikulya, iilikolomwa yawo ohaye yi landitha po yo taya imonene okashona ya vule okukwatha aanegumbo yawo.

Kakele kwaashoka omupevipelesidente okwa ti oku uvithwa nayi kuyamwe molwaashoka inaya hala okulandula ooveta noompango, ta totha mo kutya okwa lopotelwa kutya yamwe otaya ikuthile evi shaa li paveta, moka taya ithanene mo woo aapambele yawo oyendji ya za koombinga noombinga dhoshilongo.

T ati okwa konekwa yamwe taya longitha omaliko gepangelo ngoka taga adhika mofaalama moka pambambo yo yamwe taye ga yonagula noku ga hanagula po, te ya pula ya kuthe onkatu yokudhiginina iinima mbyoka, ye yi kaleke po yo yi longithwe komapipi tage ya.

Mwene gwomukunda mpoka Msx Naibeb okwa ti otaya gandja olupandu kepangelo molwa iilonga mbyoka lye ya longela. “Otwa li hatu kala pomudhingoloko gwOshivelo mpono twa li owala tatu mono iihuna, epangelo olya li lya kutha onkatu sho lye tu kongele ehala mpoka tatu kala pamwe naakwanezimo yetu, otwa li twa tutwa po nokufalwa kOndera hono tu li sigo onena ndjika,” Naibeb ta ti ngaaka.

Okwa yelitha kutya pOshivelo mpoka ya li haya kala nale oyendji yomuyo kaya li ye na omalukalwa, noya li owala haya kala momalukanda yo taya hupu shokadhila. Okwa ti aakwashigwana ethimbo limwe oye hole owala okunyenyeta ihe ihaya pandula epangelo mpoka lya longa nawa, ta ti yo otaya gandja olupandu lwa shewa kombelewa yomuprima gwoshilongo , oshowo ndjoka yomupresidente sho haya gandja aluhe omayakulo kuyo, nokuya sila oshimpwiyu mushoka ya pumbwa.

Okwa ti pOndera itaya monene po unene iihuna oshoka oye na omeya ge li popepi, oy ena woo oshikunino mono haya longo mo iiyimati niikwamboga, mbyono hayi ya kwatha noya tota po okambo kawo kombaanga hono haya pungula iimaliwa yawo uuna ya mona eteyo ewanawa moshikunino shoka ya tulilwa po kEpangelo.

LEAVE A REPLY

Please enter your comment!
Please enter your name here