Ehangano lyaanafaalama moMangeti otali tsikile niilonga

0
44

Maria Namupala
OLUNO

Oshitunda shaNdonga moka mwa ka la mwa tukuka omananathano nomavundakano, nonkalo ndjoka oya kala ya guma yamwe yomaanafaalama mboka ye na iimuna yawo yi li mOndonga. Ashike omunashipundi gwehangano lyaanafaalama lyoMangetti, Ismael Shailemo, kuyele oshiwike shika okwa yelitha kutya ehangano lyawo otali tsikile niilonga yawo mbyoka li inekelelwa koshigwana.

“Otatu dhimbulukwa nawa kutya iilyo yewiliko lyehangano lyetu oya li ya tulwa miilonga kelelo lyopamuthigululwakalo ndyoka, elelo olya kala nomaupyakadhi moka iilonga niinyangadhalwa oyindji ya kala ya nayipala, niilonga yimwe oya kala ya thikama yi tegelele onkalo yi hwepopale, ko ku opalekwe shoka sha pumbwa oku opalekwa,” Shailemo ta ti.

Okwa gwedha po kutya iilyo yehangano lyawo inayi gumwa unene koshinima shoka nonande ye na oofaalama dhawo shili moshitunda, ta ti ehangano otali tsikile niilonga yalyo, yo taya kala taya gandja uuyelele nomathaneko kaanafaalama.

Ta ti otaya kala ya hiya oshigongi muule wethimbo efupi, yo ya tsakanene naanafaalama mesiku tali ka tseyithwa konahiya. Okwa pula ya longele kumwe yo taya takamitha iimuna yawo nokukaleka po oofaalama dhawo.

Shailemo ta ti molwaashoka ewiliko ndyoka li li koshipundi pethimbo ndika olyi li pokuya pehulilo, otaku ka unganekwa omutumba gowina opo ku hogololwe ewiliko epe ndyoka tali nana nokufala iilonga yehangano pombanda nokomeho.

Okwa ti ehangano pamwe nomahangano galwe gaanafaalama moshilongo ogi ilongekidha okutula uukuni kumwe nokuninga iigongi moka taya gandja omapukululo kaanafaalama nokwiikunda nkene ye na okuyambula po oofaalama dhawo, nankene ye na okuyakula iimuna yawo uuna ya adhika komikithi nenge nkene ye na okuyi kalekapo noku yi tekula.

Okwa pula aanafaalama ya kaleke po omahala guulithilo, yo taya kambadhala okukonga oonzo dhilwe ndhoka tadhi ya kwathele moofaalama dhawo. Okwa yelitha kutya oyendji yomaanafaalama mboka kaye shi omikalo ndhoka taya vulu oku eta po, opo ya kale tayi imonene oshimaliwa ya vule okupalutha iinamwenyo yawo mbyoka ye na mofaalama dhawo, ta ti olundji ngaashi oongombe ohadhi si komikithi molwaashoka kapu na omiti dhoku dhi panga.

Ehangano lyoMngetti Farmers Association olya totwapo moomvula dhonale mewiliko lyomukwaniilwa Immanuel Kauluma Elifas, nelalakano lypokukalekapo omahala gomaulithilo oshowo oku ga gamenenapo , go ga adhike komapipi tage keya ga vule okulongithwa.

LEAVE A REPLY

Please enter your comment!
Please enter your name here