Khuse onkene ta ti pii mekopi lyoDebmarine

0
48

Shipi Elago
Ongwediva

Khuse FC okwa li a ningi iinyengandunge ehuliloshiwike lya za ko konima sho a li a pititha mo Tigers FC mekopi lyoDebmarine.
Oyendji oya li ya tala ko uudhano mbuka onge olugodhi pokati ka Ndaafita naGoliath oshoka oosipana ndhika mbali odha li dhi na iiviha ya yooloka na ka pwa li ngoka a li a tsu ondjodhi kutya iizemo ota yi kala tayi tengele muuwanawa waKhuse, osipana onshona yo kayi na naana edhina ngele tashi ya mondjokonona yokatanga kokoompadhi moshilongo.

Khuse na Tigers oya li yi ithigi othika yimwe muyimwe omutenya gwOlyomakaya ga za ko pokapale kEtosha mOshomeya, naashika osha li sha eta opo uudhano mbuka wu ye kokutsikinika.

Osipana ndjoka hayi yambuka mEvululuko mOshakati sho ya mono Tigers e na omaka koompadhi inayi shi toka we lwaali onkene oya li ya longitha ompito ndjoka oku undula mo Tigers mekopi sho ya li ya tula mo ookoola 4-2 nokuhulitha po olweendo lwaTigers mekopi ndika.
Omudhewuli Samuel”Bongo” Shaama ngoka e li a talika ko onge Mesiasa gwokatanga monooli onkene e li ta ulike uupyu , ye ta ulike woo kutya ye ke shi okatana miilonga yokudhewula sho ta tsikile nokukula oonkoshi omayego naKhuse FC ngashiingeyi okwa thinda kedhingoloko lyoosipana 16.

Young African ngoka a li wo a kumitha aatali yokatanga kokoompadhi omvula ya za ko okwa li a kankamekwa komukwaniilwa gwomakopi moNamibia Black Africa, konima sho oosipana dhika mbali dha li dhi ithigi othika 2-2 mokapale noBlack Africa oya li ya pondola okupititha moo Young African mekopi ndika noopelenti 10-9.

Gwonale oku li mondjila sho a tile oshilongo hu oosa hu oondigolo, nando oosipana dhimwe odha li tadhi ligola kenyanyu, oosipana dhilwe odha li dha shuna kegumbo niipandi yookoola mbyoka ya pewa koosipana oonkwawo.

Omaheke Nampol noReal Fighters odho dhimwe dhomoosipana dha ninga ondjokonona mekopi ndika okudhengwa shinyanyalitha nodha li dha shuna kegumbo dha humbatithwa iipandi yookoola, Omaheke Nampol oya li ya mokagulwa 12-0 koAfrican Stars, omanga Real Fighters a li a dhengwa mo kuEleven Arrows 11-0.

Chiefs Santos ngoka a ningi esiku oye Simon yaMalombo moliha okwa li ii kuthile onyambi ye kuReho Madrid sho a li emu pe ntano monola.

Oosipana dhokevi lyiimpungu odhi li ta dhi shi enditha nawa muudhano mbuka oshoka Young Chiefs naye oku li a katuka onkatu okuya kedhingoloko lyoosipana 16 konima sho a li a dhenge mo Citizen konima sho oosipana dhika mbali dha li dhi ithigi othika 2-2 mokapale , naChiefs okwa li a pondola okusindana po uudhano mbuka noopelenti 6-5.

Oyendji oye li nale ya ligamena kedhingoloko lya landula ko oshoka oko hoka omambalangandja taga ki ikwata konima sho uusipana uushona wa li wa pewa iimbale wo wu shune hoka wa yambukile.

Khuse FC oku li ta ka pwatula oosipana odhindji omutse okuya medhingoloko lya landula ko ngele ota tsikile nomufolomo moka e li,otwa tegelela uudhano uuwanawa medhingoloko ta li landula sho olugodhi lwo ku tala ngoka ta ka ninga enyakwa lyuudhano mbuka ta li tsikile.

LEAVE A REPLY

Please enter your comment!
Please enter your name here