Natu dhimbulukweni Ota Benga nuukoloni waatiligane

0
26

Komutoolinkundana
OVENDUKA

Uuyuni uudhigu tuu shili onga tau tumbwa, omasiku hamale, ano Etiyali lyomasiku 20 gaMaalitsa lya ka dhilongela, Namibia okwa li a tsima ontsi yaantu taya tyapula oshithidhimbulutho shemanguluko lyoshilongo shetu, komalungula, aantu oyendji oya li yi ili poothingo, unene tuu aaluudhe naatiligane, mpoka pwa li pe na omatompathano kutya uusama otawu pewa lye ngele tashi ya kuukoloni nethindilokongudhi lya kala nokuningilwa oshipa oshiluudhe. Momasiku 20 gaMaalitsa, olyo wo esiku Ota Benga, okamatyona ka li mepipi lyokamukondapweyu, ka li ka yugwa onkalamwenyo yako moCongo nokufalwa kiikunino yiinamwenyo koAmerika osho wo koEuropa. Benga okwa li i ifala kegumbo lyiiti iitokele momumvo 1916. Okwa li a kalekwa moshikunino shaBronx, moAmerika, moka a li a shigakanitwha pamwe noondjima dhomaludhi gi ili nogi ili.

Benga haye ashike a li a kuthwa muAfrika a falwa kiikunino yiinamwenyo kondje yomafuta, ashike ehokololo lye oli li endhidhiliko enene noonkondo tali fumvula nkene aakolonyeki ya kala taya hepeke aAfrika. Ope na omahokololo goshili, osho wo omathano galwe taga koleke iilonga yuuhwapindi yoludhi nduka, moka Aafrika oyendji ya li ya kwatwa po ombambyona (ngaashi naana aakolonyeki ya li ye wete taya kutha omuntu momilema dhaAfrika) opo a ka ningwe onga omaulikilo kiilongo mbyoka ya li tayi tyakaleke Afrika nokakulumbwati moomvula dha yi. Yamwe oya li ya kwatwa po ombambyona medhina lyuungomba, twa dhini okutumbula Saartjie Bartman, omukiintu gwaantu yoludhi lwaayelele ngoka a li a kuthwa puushindalongo South Afrika noku ka ulikwa koEuropa. Sho sha li she mu kuthitha moshilongo a valelwa mo noku na mo omidhi otashi kumitha, oshoka a li e na omatako omanene, naatiligane oyendji oya li ye wete sha fa kaashi li mondjila omuntu a kale e na omatako ga folomwa momukalo nguka.

Konima shi Baartman a li a mana oondjenda dhe, mepipi lyoomvula 26 moEuropa, omudhimba gwe inagu fumvikwa ngaashi osho shi na okukala, ashike aatiligane oya ungaunga nago e tagu kala ogo tagu ulikwa mookefe dhomaulikilo niipindi. Dhoshili odho ndhika kutya aaEuropa uutako wawo uushona, onkene kuyo osha li oshikumithi mokumona omuntu e na etako tali ihilile mondundu nokuli. Kuyo shika osha li ye wete uulema wontumba nenge wongandi. Epulo tali pwatula omutse oli li nee mpano kutya ngeno okwa li onyokokulu oye ta ningwa noku ulikwa a fa oshihongomwa opo osha zi monzimbololo ngeyi, ngeno oto shi taamba ko tuu? Ashike nani mpa lya tuka opo tuu lya nambele, oshoka ngele oto tala nawa, aaEuropa oye li oyo taya tsuwa uumwele opo omatako gawo ga ninge omakuluntu, ano ga thike pungoka ya li ye wete inaaga opalela aantu.

Omanga tse moNamibia tatu vulu okukala tu uva ehokololo lyaBaartman, lya Benga epe lela momakutsi getu. Ehokololo lyekwatopombambyona lyaBenga nokudhaadhigilwa koshikunino shiinamwenyo koBronx olya tameke mo 1902, sho Samuel Verner, ngoka a li ti iyithana omupashiyoni muAfrika, ngoka a tseyika nawa kutya okwa li gumwe gomookatekoti mokuningila aaluudhe omahepeko, a uvu onkundana kutya momumvo 1904 otaku ka kala omaulikilo gopaipindi koSt. Luis. Enenedhiladhilo lyomaulikilo olya li okutanga noku eta puuyelele enongeko, endungiko osho wo ekwathelo lyAmerika okukutha Afrika momilema dhamemekukwee yo ya ete oonte dhuuyelele ngaashi ye wete sha opala. Onkene opwa li tapu kongwa aantu ya za moAfrika mboka ye na uukwatya wu li elala naantu yalwe ya kale ya ulikwa momaulikilo ngaka. Aafrika mboka aafupi momutholomo, osho wo mboka ya li haya hupu moku enda taya nyanga oyo naanaa ya li ya pumbiwa pompito ndji. Aafrika mbaka oya li haya ulwa omalaka taga nyanyaleke. Momumvo 1904, omunawino gumwe kamana okwa li a popi kutya: “Aaluudhe, osho wo aantu yamwe mboka yaa na oshipa oshitiligane oye na uuluyi itaawu yelekwa naamboka waatiligane, na itaya vulu okulonga iilonga tayi longwa kaatiligane.”

Hasho oshikando shotango Verner a li a kutha aaludhe moAfrika e ke ya ulike miikunino yiinamwenyo koAmerika. Okwa li a kutha uumati uyali koCongo, noku wu gandja kuyimwe yomoongulu dhomaulikilo koAmerika. Uumatyona mbuka kape na we nando okamwe ka li ka galulilwa koCongo.

Omathimbo ngoka kapwa li oongamba moAfrika ndhoka dhi li po ngashingeyi, naantu oya li miitopolwa yawo shi ikwatelela komihoko, moka ya li haya hupu muukongo, okulima omapya gawo, osho wo okutakamitha iimuna yawo. Oshilongo shaCongo okwa li ehala lyokuti olunene, sha kwatela mo iilongo mbyoka paife hayi ithanwa Democratic Republic of Congo, Congo Brazaville, Uganda, Burundi, Ruanda naCentral Africa Republic, – ano evi alihe lyomilonga ominene hoka ngaa hatu ti okomatale, hoka kwa zile aantu haya ithanwa aaBantu.

Aaluudhe mbaka kaya li haya zala iikutu yoshinanena, ashike oya li haya zala iikutu ya longwa miipa. KuVenter nayakwawo, oya li ye wete kutya Congo ehala ewanawa notali vulu okumonika uungala nuunamwenyo uupe tau vulu okukonaakonwa. Venter okwa li a pewa oshimaliwa shi thike po US$8,500, shoka paife shi thike piimaliwa yaNamibia Oomiliona 2, 7 opo a ye koKongo ye a ka longe iilonga ye. Euvathano olya li tali ti Venter na ye koKongo e ta zi ko naantu taya landula: “Omukwaniilwa gumwe nomukulukadhi gwe, aakulukadhi yaali ye na uunona uushona, osho wo aagundjuka ye li yane.”

Konima yoshiwike shimwe sho a thiki moKongo, Venter okwa li a shanga omukanda tagu ti kutya okwa mona po omuntu gumwe. Ta ti Benga okwa adha a kwatwa po kaantu yomuhoko gulwe. Ashike omapekaapeko oga ulike kutya pehala mpoka Verner a li a adha Benga, ohali ithanwa ngashingeyi Bassongo, nolya li ehala mpoka hapu landithwa aapika. Bassongo ehala lya lukilwa omulonga gumwe ngoka gwa taakana moshilongo shoka nena hashi ithanwa Central Africa Republic. Verner okwa li a ti okwa adha Benga a kwatwa po ombambyona nokwa li a hala okuya naye koAmerika.

Momasiku sho ga li 11 Mayi 1904, Verner naBenga naantu yalwe yahetatu oya li ya kakanya ombautu e taya piti momulonga gwaKasai. Oya thiki moNew Orleans, USA, momasiku 25 June 2016. Omusholondondo gomadhina otagu ulike kutya okamati hoka ka li mo okashona oka li ke na oomvula 12, omanga Benga a li e na oomvula 17. Ashike osha ka monika kutya okwa li omushona lela, ano Venter ina gandja oomvula dhoshili.

Omaulikilo oga li ga ningwa moAmerika miikunino yiinamwenyo, moka aantu ya li haye ya okutala. Okwa li haya thanekwa. Oshikando shimwe aantu 40 000 oya li ye ya okutalela po oshikunino shika. Uuna Benga a kuthwa mo mokakololo hoka a li ha tulwa a fa oshinamwenyo, okwa li ha ponokele aantu ti igamene yemwene, nosha li hashi pula aalumentu ye li yatatu opo ye mu shune mo nokuli.
Oshifo shoNew York Times- shoka ngashingeyi sha simanekwa koyendji – osha li sha shanga ngeyi:

“Katu uvite ko kutya omolwashike aantu ye wete sha puka okukaleka Benga mokakololo kiinamwenyo. Benga ke shi omuntu e tu fa, ngele okwa yi kosikola ota ka kala owala e na uuvu wokomwenyo. Benga oku na uukwatya wa fa womalupe gawo ho a zi, uuluyi we owa fa uuluyi wiinamwenyo yaahoka a zi.”

Benga okwa kuthwa mo ashike sho ongundu yimwe yaasita ya li yi li ompinge noshiningwanima shika, okwa li a tumwa koshilando shimwe moka a ka kala ha zi megumbo. Okwa li a tameke okulonga uunona uushona nkene ye na okuyaha uudhila, osho wo okunduluka po uuta wanangongo. Uusiku oya li haya gongala pomulilo mpoka ha kala te ya ningile ko ondaanisa. Momasiku 19 Maalitsa 1916, uunona sho wa li wa kotha, Benga okwa li a kutha okandjembo okashona e ti iyaha. Opo ike a sila mpoka.

LEAVE A REPLY

Please enter your comment!
Please enter your name here