Nujoma otaka patulula uudhano waadhani mboka ya tsilika omakwa mOkahao

0
49

Kefas Shipi Elago
Okahao

Omukokoliplesitende Dr Sam Shafiishuna Nujoma okwa tegelelwa a ka patulule uudhano womanyakwa gwokatanga kokoompadhi modoolopa yaKahao mboka wa thanekelwa pethimbo lyiituthi yaPaasa.
Omugandjimulombo gwuudhano mbuka Alexander Anguwo naangoka e li omunashipundi gwaMan of Action Annual Sports Tournament okwa li a koleke kutya Omukokoli oye ta ka patulula uudhano mbuka pambelewa mEtitano tali ya pomugoyi gongula okuzilila pokapale kaShaanika Nashilongo mOkahao.

Kakele kOmukokoli ngoka ta ka patulula uudhano mbuka, Ngoloneya gwoshitopolwa shaMusati omusimanekwa Erginus Endjala oku li wo gumwe gomawiliki mboka taya kkala poshituthi shepatululo opamwe naMayola gwondoolopa yaKahao, omusimanekwa Immanuel Amutenya.
Omukwaniilwa gwoshitunda Onekuni Tatekulu Johannes Mupiya oku li wo gumwe gwomaapopi yesiku.

Okwa ti aawiliki yoondondo dha yooloka oya tegelelwa wo ya ka kale poshituthipatululo shuudhano mbuka shoka tashi kwatelwa komeho koshipalanyolo tashi ti “Enawapeko lyonakuyiwa yaanyasha okupitila momawudhano noonkuluhedhi.”
“Uudhano mbuka otwa li twe wu toto po omumvo gwa za ko nelalakano okugandja esimaneko ku Eddy Wilbard “Man of Action” ngoka a li a longo nuudhiginini okupendula po omaudhano moshitopolwa shaKahao notwa li twa longitha uudhano mbuka onga omukalo gokugongela oshimaliwa shoka sha li sha thanekelwa omapendule po gomawudhano moshitopolwa moka twa li twa longo nuudhiginini notwa li twa gongele N$ 65 000,” Alex ta ti.

Alex ta tsikile ko ta ti ashike oya hala oshiketha shika shi koke oshoka itaya lalakanene ashike omawudhano ashike oya hala wo okukwathela okunawapeka oonkalamwenyo dhaamboka itaya vulu oku ikwatha moshitunda shaNgandjera.
Ta gandja oshiholelwa kutya ope na uunona hawu piti nawa oosikola ashike omolwompumbwe yoshimaliwa uunona mbuka ohawu iyadha wu li pevi oshoka aakuluntu yawo itaya vulu okufuta oosikola onkene ngele oshiketha shawo osha koko nena otaya kala wo nokukwathela mpaka naampeyaka.

Oosipana ndhoka tadhi ka kutha ombinga otadhi ka dhana pamikunda ngaashi naana sha kala hashi ningwa monakuziwa pethimbo aakokokele mboka taya ka dhana ya li aanyanyamagulu.

Omudhani kehe ta kutha ombinga muudhano mbuka na kale e na omimvo 30 nenge dhi vule po.
Alex okwa ti omwaalu gwomikunda ndhoka tadhi kutha ombinga ogu li nale gwa pitilila pwaadhoka dha li dha kutha ombinga omvula ya za ko, ta totha mo omukunda ngaashi Uukwalumbe, Ekwa lyaMutshemo, Oshiteyi, Oluteyi, Eendombe,Etilyasa, Okahao, Uukuuvu, Ombwata, Otamanzi, kutya odhi li dha ulika nale ehalo okukutha ombinga muudhano mbuka.

Okwa ti kakele komaudhano otashi ka kala oshikando shotango okugongaleka aantu yomoshitunda shaNgandjera okupitila momaudhano shoka tashi tsike ombepo yuukumwe gwo nomahewa omakulu taga mono woo ompito okutsakanena, oshoka aantu oyendji oyi ihanena nevi lyomapendafule nolundji ngele oye ya kevi lyiimpungu ohaya kala ye na iinakugwanithwa oyindji onkene oompito dhomatsakaneno odha ninga oofupi noofupi.

Omukunda kehe tagu kutha ombinga ogwa tegelelwa gu etelele okapandi koondola 2200 opo yi pitikwe yi kuthe ombinga muudhano mbuka.
Otonamende ndjika nando oya li ya totwa okusimaneka omukokele Man of Action , ka li a vula okukala po pepatululo lyuudhano womvula ya za ko molwa uunkundi, omupya omunene okwa li wo a thigi po uuyuni mbuka oku uka pehuulilo lyomvula ya zako 2017.
Uudhano womvula ya za ko owa li wa sindanwa po kOkahao Veterans konima sho ya li ya dhenge mo Infantary 1-0 medhingoloko lyahugunina.

LEAVE A REPLY

Please enter your comment!
Please enter your name here