Omuhikihiya gwotango omukiintu ta ka fudhila ohiya kekopi lyoThe Namibian

0
34

Shipi Elago
Ongwediva

Uudhano woshifokundaneki shoThe Namibia mboka tau tameke ngula kondoolopa yaKatima Mulilo otau ka towalekwa sho omvula ndjika wu na omuhikihiya omukiintu opamwe naakwatheli ye yatatu nayo aakiintu.
Nando uudhano mbuka owa kala wu na aakiintu haya yelula uupandela monakuziwa, shika otashi kala oshikando shotango omukiintu ta ka fudhile ohiya.

Shangula okuli omudhani omukulu gwosipana yoBrave Gladiator ngoka a tamekela uudhano we kosipana yuukadhona wu li kohi yomimvo 20 ndjoka a li e yi wayimine pethimbo a li e na omimvo 17.

Shangula nando a li e hole oshitalenti she shokudhana okatanga kokoompadhi, okwa li e na okuthiga po uudhano mbuka ombaadhilila konima sho a li a mono onkatu yuuhikihiya kongongahangano yuudhano muuyuni, oFIFA, ngoka ita pitika omuntu a kale omudhani ye omufudhili gwohiya, naashika osha li she mu ethitha opo a thige po okatanga ongomudhani nokuninga omuhikihiya.

Pethimbo Shangula a li mekwatathano naKundana ongula yOmaandaha ga za ko okwa li nale e li mela lyondjila okuya koKatima Mulilo nokwa li a holola enyanyu lye sho a li u ulikwa opo a ninge omufudhili gwohiya gwotango omukiintu mondjokonona yekopi ndika.
Okwa ti ota ka kambadhala opo a tule miilonga oompango nomawutho gaFIFA miilonga kape na ewongaawongo, nota ka gamenena po okatanga kokoompadhi ngaashi tashi vulika.

Okwa ti oku li u uvite etumba sho e li ta ka hika uudhano mbuka opamwe nuukadhona uugundjuka uuNamibia moka yaali taya ka kala nokuyelula okapandela omanga gumwe ta ka kala omuyakuli omutine.

Ta ti aahikihiya oye li ya simana unene tuu mekoko nekalekepo lyokatanga kokoompadhi noyo ye li eshukamugongo lyomaudhano agehe oshoka ngele kaye po nena omaudhano itaga wapa okuya komeho nando esiku limwe.

Shangula oku li omvalele yaKahao moshitopolwa shaMusati noku li ngashiingeyi ha kala moshitopolwa shaKhomas.
Olivia Amukuu oye gumwe gomuukadhona uugundjuka tau ka kwathela Shangula mokuhika omawudhano ngaka noku li omuyeluli gwokapandela, Olivia okwa kala ethimbo ele nokuyelula okapandela ashike okwa kala ha longo pamwe naahikihiya aalumentu nangashiingeyi oku li u uvite uuntsa sho taya ka kala taya longo pamwe nuukadhona uugundjuka uukwawo.
Ota tsu wo omukumo uukadhona uukwawo opo wu kuthe ombinga momadhewo ngoka tage ya pe ontseyo ya gwedhwa po noonzapo dhokufudhila oohiya.

Ta ti omaudhano itaga vulu okuya komeho ngele ka ge na aahikihiya ya pyokoka.
Okwati oshi li sha simana opo aahikihiya ya pangelwe koshili nuuyuuki ngele otaya wilike omaudhano oshoka ngele omuhikihiya ke na uuyuuki nena ota shi dhipaga po ombepo yomaudhano.

LEAVE A REPLY

Please enter your comment!
Please enter your name here