Omwiihupuli a mbomo moTexas, a kwata uukolokoshi we mokavidio

0
117

Olopota yopolisi otayi popi kutya omulumentu gomimvo 23, Mark Conditt, ngoka a li a tangananeka omutse nokumboma omahala gi ili nogi ili uule wiiwike yi li itatu, okwa li i ikwatitha okavidio kongodhi ye yopeke.

Omulumentu nguka a li e na oomboma dhokumboma moTexas okwa li a ningi okavideo koominute 25 kongodhi ye yopeke, ndjoka ya li yi itsuwa konima shi wo naye a li i ihupula e ti ihanagula po thiluthilu nomboma.

Mark Conditt, 23, a za moshilando lwa Pflugerville, okwa gandja uuyelele wi ihwa po kutya kombinga yoomboma dhi li heyali, ntano ndhoka dha topa, yimwe oya li yi itsuwa manga inayi topa, nonkwawo oyo ndjoka a li a topitha konima sho omiya dhaShinana dha li dhi mu li mokashoko mEtitatu lyoshiwike sha za ko.

Ashike nando ongao, okavideo oka ndopa okugandja kutya elalakano lyokulonga iikumithilonga mbino olya shike.
“Ina popya sha nande shi na sha nuukulo, ye okwa tya thilu wo natango ngele tashi ya kombinga yuutondwe, ashike oku li mo lela ta popi uudhigu we wopaumwene nomashongo ngoka ga palamena onkalamwenyo ye.” Omukuluntu gwopolisi yaAustin ta popi ngaaka mokulombwela aatoolinkundana.

Conditt, ngoka taku popiwa kutya osho oshikando shotango ta longo uuhwapindi wa tya ngeyi, okwa dhipaga aantu ye li yaali noku ehameka yatano okuza sho a li a tameke oshikonga she shomuyonena petameko lyaMaalitsa.. Aapolisi oya li ya hadha egumbo lye osho wo omahala gamwe momudhingoloko, noya lombwela aakwashigwana kutya kape na we oomboma dhimwe naantu oyehe oye li megameno ngashingeyi.

Omukonaakoni go-FBI, Christopher Combs, okwi itaala kutya omugundjuka nguka ngeno okwa li inaa kondekwa kopolisi ngeno okwa tsikila nokuninga omuyonena nguka.

Opolisi oya hitulula wo okamukanda hoka ke na omusholondondo gomahala ngoka ga li ge na okulandula ko. Nonando ongawo, okavideo inaka gandja nando omatompelo kutya omolwashike omahala ngoka ogo ge li momusholondondo. Nonando opolisi kwa li tayi fekele kutya omuyonena nguka ogu na sha nokatongotongo kopalwaala, oya ka mona kutya shika hasho nande.

Otaku fekelwa okavidio haka ka li ka kwatwa pokati kotundi onti-9 nonti-11 yuusiku mEtiyali. Manley ta ti Conditt okwa li e wete opolisi yi mu li mokashoko. MEtitatu, opolisi oya li yi idhenge kohotela hoka Conditt a li a tegelela iilongitho, elalakano oya li ye mu tule miipandeko, ashike Conditt okwa li a thenunuka mo mbala.
Opolisi oya li ye mu landula kongalama hoka a li ta hingi, ashike manga inaye mu kankameka, ohauto ye oya li ya topa nokuyangatapo thilu.

“Shika itashi nyanyudha, ashike ehulilo ewanawa kumboka ya ningilwa omuyonena,” Omutseyiveta gumwe moTexas ta popi ngaaka.
Aantu oyendji oya li ya popi kutya oya pepelelwa ngashingeyi.

Ngaashi naana haku ti uumbudhi ihau yothwa, opolisi oya li ya konaakona uumbapila womafutilo mboka wu ulike iinima mbyoka ya landwa komugundjuka nguka, osho wo uuvidio mboka tau mu ulike i izaleka omafufu omale negala komutse.
Aanambelewa ya pyokoka yopolisi oya li wo ya kutha mo iitopitha ayihe megumbo ndika.

“Itandi shi ithana kutya ofaabulika yokunduluka po oomboma, ashike omu na ngaa okanima kontumba taka ulike kutya iitopitha yontumba omo ya longelwa nokutulwa kumwe moka,” Fred Milanowski, ngoka ha longo mombelewa yi na sha niitopitha ta lombwele aatoolinkundana.

Ta popi wo kutya omugundjuka nguka okwa kala nokulanda iitopitha mbika nedhina Kelly Killmore, nokwa li he shi ningi okupitila
mehangano lyoFedEx.
Conditt, okwa li a shanga omukanda gumwe mo-2012 tagu ti ye nopolitika hayo naanaa ookuume.

LEAVE A REPLY

Please enter your comment!
Please enter your name here