‘Otushi owala Elelo lyoPamuthigululwakalo lyaNdonga limwe’ – Mushelenga

0
165
WINDHOEK, 07 December 2016 - Deputy Minister of International Relations and Cooperation Peya Mushelenga and outgoing Finnish Ambassador to Namibia Anne Saloranta at the Scandinavian country's 99th independence celebrations in Namibia. (Photo by: Etuna Shikalepo) NAMPA

Helvy Shaanika
OSHIKUKU

Epangelo itali ka gandja omayambeko galyo kombelewa ndjoka ya totwa po komalenga ngoka ga li ga kuthwa miilonga, molwashoka ombelewa ndjoka ya totwa po komalenga ngoka ga tsu mo oondjila dhago otayi longo shaa li paveta, onkene otashi ulike onkalo yakakombo ilitha.

Pethimbo a li ta popi naKundana, Ominista yi na sha nEyambulepo lyIitopolwa yokUushayi nOondoolopa, Peya Mushelenga ota ti ongundu ya kwatelwa komeho kuJohn Walenga, Joseph Asino, naVilho Kamanya inayi kuthwa natango oonkondo komukwaniilwa ashike natango oyo yi li tayi kikimba naangoka oye a li e ya pa oonkondo ndhika – Omukwaniilwa Kauluma Elifas.

“Epangelo oli li ashike melaka ndika kutya ope na owala omutse gumwe gweElelo lyoPamuthigululwakalo gwOndonga, ngaashi naana sha tulwa po mOntopolwa Ontine, yOveta yElelo lyOpamithigululwakalo yomumvo 2000, nomutse gwelelo nguka ogwa taambwa ko pamautho ge li mOkatendo Okatihamano, kOveta oyo tuu ndjoka. Momambo getu, omutse gwaakwashigana [yaOndonga] mbaka, ogwo Omukwaniilwa Immanuel Elifas. Kehe omuntu ta kutha omatokolo a lundulule ombelewa ndjika yopamithigululwakalo, omatokolo ngoka ka ge li pamulandu nenge paveta,” Mushelenga ta ti.

Iiwike yi li iyali ya piti, ongundu yaaleli mbaka ya kuthwa miilonga oya li ya patulula ombelewa yawo mOniipa, taya ti oya yi noombapila adhihe ndhoka tadhi ya pe uuthemba ya kuthe nokulonga iilonga mbyoka ya li hayi longwa nale kelelo ekulu. Taya ti wo oya yambekelwa oshilonga shawo kepangelo okupitila mUuministeli wUuyuuki.

Mushelenga ta koleke wo omapopyo kutya okwa li a shangelwa omukanda kongundu ndjika opo yi pewe omayambeko gepangelo yo ya tameke iilonga yawo.

“Onda yamukula nale. Onde ya lombwele kutya, nokwaagama ombinga, epangelo itali ke ya pa uuthemba lyo itali ka taambula ko iilonga tayi pitile mombelewa ndjika. Mokukandula po omukundu nguka, otandi hingwa nokuwilikwa koonkondo ndhoka ndi na okupitila mekotampango lyoshilongo. Onkene oompango otandi ke dhi gwanitha po pauyuuki,” Mushelenga ta koleke.

Kuyele omasiku ga yi, ngoka a li nale omukuluntu gwoshikandjo shaAmutenya, Vilho Kamanya, okwa li a lombwele aantu ya tameke okushangitha iipotha yawo noku eta omanyenyeto kombelewa ndjoka opo ya toto po mOniipa. Ta ti mboka ya tsuwa iilyaalyaka oya li ya mono omapukululo gopaali shi na sha niinima yoompangu.

Ashike Uuministeli wUuyuuki owa li wa nukile pomutenya kutya ombelewa ndji ya totwa po, noye li oyo haya futu oolente dhehala lyayo, kayi shi nande yooyene yomikunda mboka ya pelwe olukaku. Aniwa etungo moka ye li otali hiilwa ashike omolwompumbwe yehala tali opalele.

Kuyele, omukuluntu gwoompangulilo dhoshigwana mUuministeli wUuyuuki, Amelia Nathanael okwa li a lombwele oshifo oshimwayina naKundana shoNew Era ta ti yo kaye na mo sha monkalo tayi tengauka yaaleli yaNdonga. Ta ti yo oye na ashike oshinakugwanithwa shokukwashilipaleka kutya iipotha otayi tsikile noku uvika nonando pe na oshikumungu shika. “Okuza kombinga yetu, inaya kuthwa miilonga onga aakalekipo naatonateli yuuyuuki mompangulilo yoshigwana,” Natanael ta ti. Natanael natango okwa li e tu lombwele kutya ekutho miilonga lyawo itali yi iilonga yoompangulilo moshipala. “Uuna pwaa na ehala lyompangulilo, uuministeli ohawu hiila ehala mpoka tapu ka ningilwa iihokolola, sho osho nee tashi ningwa mompito ndjika ngele tashi ya kelelo lyopamuthigululwakalo lyaNdonga.

LEAVE A REPLY

Please enter your comment!
Please enter your name here