Aaniilonga mendiki lyaSelma Rainio inaya mona oondjambi dhawo dha gwana po

0
80

Maria Namupala
ONIIPA

Aaniilonga mendiki lyoshipangelo shaSelma Rainio Medical mOnandjokwe oya holola eyeme lyawo notaya nyenyeta ewiliko lyendiki ndyoka molwaashoka omwedhi gwa zi ko inaya mona oondjambi dhawo dha gwana po.
Endiki ndika oli li kohi yewiliko lyongerki ya-ELCIN.

Kuuyelele mboka ya gandja oshiwike shika oya holola okwaa uva nawa kwawo, sho ya totha mo kutya inaya pewa oondjambi dhawo dhi ihwapo omwedhi gwa zi ko, nomwedhi nguka kaye na omukumo ngele otaya ka mona ngaa oondjambi dhawo. Yamwe mboka twa kundathana nayo oya ti oya li ya tseyithilwa ku na ashike omasiku gaali omwedhi gwa zi ko kutya otashi vulika kaaya mone oondjambi dhawo nenge ya pewe ko omatata, shoka ya ti oshe ya yemateka noonkondo molwaashoka kaya li ye shi tegelela. Aaniilonga mboka oya kwatela mo aapangi, aayopaleki oshowo aaniilonga yomoombelewa, omwaalu gwawo otagu ihilile paaniilonga ye li omi-37, oya holola kutya yamwe oya kutwa taya kalelele omanga yamwe oyopakathimbo.

“Nkene owala twa kutilwe miilonga mbika ihatu pewa omikanda dhasha, olundji ohatu pewa owala omalombwelo pakana, otwa vulwa onkalo ndjika molwaashoka endiki ndika oli na iinima ya vundakana nokatu shi we kutya natu ninge ngiini,” taya popi ngaaka.

Oya yelitha kutya sigo oompaka etata lyawo lyoondjambi dhomwedhi gwa zi ko inaye li mona, noyena uumbanda ngele omwedhi nguka otaya mono sha ngaa yo yi ikwathe moompumbwe ndhoka ye na.

Taya gwedha po kutya moshigongi shawo sha hugunina oya li ya tseyithilwa kutya naya hogolole aakalelipo yaali mboka taya ka totha mo mboka taya kuthwa miilonga, nokugandja omathaneko kewiliko lyopombanda peha lyayakwawo.

“Oshinima shoka shekutho miilonga tali fofodholwa oshe tu ehameka, tse out na omagumbo notwa pumbwa okufutila aanona yetu oosikola, otatu uka peni notatu hupu ngiini akwetu natu popilwe otwa yemata noonkondo notwa hala endiki ndika lyi talulule omilandu dhalyo, yo ya kale taye tu tseyithile ku na ethimbo twaa kale owala tatu landithwa oondjodhi miinima itaatu yi mono”, taya ti neyeme.

Moshigongi moka otwa li natango twa tseyithilwa kutya oshipangelo kashi na oshimaliwa okufuta oondjambi dhetu dhi ihwa po, taya popi kutya oye na omaipulo ngele omayakulo ngoka taya gandja ogo ngaa yu uthwa ya gandje.

Otwa li twa yi moonkundathana dhopangodhi nomukuluntuwiliki gwendiki ndyoka omusita Willem Hainane, Hainane okwa koleke ashihe shoka sha popiwa kaaniilonga, ta ti oku uvite ohenda ashike kaye na shoka we taya vulu okuninga po molwaashoka oyi iyadha ye li mompumbwe yoshimaliwa okugwanitha po oompumbwe dhaaniilonga yawo.

Ta koleke kutya oya li ya tokola opo ya kuthe yamwe yomaaniilonga miilonga, kakele shika osha kalekwa manga otaya tala kutya omukundu ngoka gokwaahe na oshimaliwa taye gu kandula po ngiini muule wethimbo efupi.

Hainane ta gwedhapo kutya ompumbwe yoshimaliwa oye ya kwata molwaashoka epangelo sigo onena inali futa iimaliwa mbyoka hayi nanwa, ta ti epangelo oli na oondjo dhawo dhoshimaliwa shomiliona 1.6.

Okwa gwedha po onkalo ndjoka yi iyadha ye li ondhigu, kakele oye na omukumo kutya otayi galukile kuuwanawa, otaya longo ngaashi taya vulu ya hwepopaleke onkalo.
Ta pula elongelokumwe maniilonga.

LEAVE A REPLY

Please enter your comment!
Please enter your name here