Elongithonayi lyiimaliwa yaakulupe naanona lya vuka

0
81

Maria Namupala
OKATYALI

Kansela goshikandjohogololo Okatyali Joseph Mupetami, okuuvithwa nayi kelongithonayi lyiimaliwa yopenzela yaakokele oshowo yuunona mboka wu li monkalo tayi nyengathana.

Moonkundathana ndhoka twa ningi naye kuyele oshiwike shika, Mupetami okwa thamuna kutya oyendji yomaakulupe naanona otaya hupu shokadhila noye li monkalo yonkalakatenya nonande haya mono oshali shawo okuza kepangelo lyoshilongo.

“Otwa koneke oyendji yomaakulupe, aanona oshowo aayambidhidhwa mboka haya kwata okamaliwa kawo okuza kepangelo , taya liwa oshipungo momagumbo kwaamboka haye ya kwatele okashona kawo hoka, naashika otashi yemateke okutala onkalo moka ye li,” kansela ta ti.
Kansela ta ti okwa kala nokumona oolopota odhindji okuza ongele omaakwashigwana nongele okomanongelo hoka haku hiti aanona mboka haya silwa oshimpwiyu kepangelo. Okwa ti okuuvithwa nayi komahepeko ngoka taga ningilwa aayambidhidhwa.

Mupetami ta ti momagumbo ngoka a talele po mu na aakulupe oshe ya puuyelele kutya oyendji kaye na oombete nohaya langekwa owala puutalashe mbono waa na nomakumbatha ga kola, momagumbo kaye na mo esiloshimpwiyu oshoka mboka haya kwata iimaliwa ohaye yi longitha po owala momalovu, yo taya mono iihuna, niikulya ihaya pewa otaya hupu shokadhila.

Omupiya goshigwana moku uva ndhika okwa li a holola eyeme lye naasho a talele po yamwe yomaakulupe naayambidhidhwa okwa li a eta ohenda. Okwa pula ooyene yomikunda naakwashigwana opo ya lopote koombelewa dhookansela aakulupe, iilema, aavu,aayambidhidhwa naayehe mbono ye li monkalakatenya taya hepekwa nokuliwa oshipungo kwaambono haye ya taambele ooshali dhawo okuza kepangelo, yo ya longwe nayo noku tulithwa po oshinima shoka.

“Itatu ka idhidhimikila nande ayehe mboka taya li aakulupe yetu okapondamusita, aakulupe oyo oongudhi neho lyoshilongo, oya longo nale nonuudhiginini noyi ihepekelepo mokutekula nokuputudha oshigwana, onkene naya kwatwe nawa, iimaliwa yawo nayi longithwe pamukalo ngoka gu uthwa ihe hamomalovu, otatu ka longa naayehe mboka ya lopotwa poombelewa dhetu yo ya tulithwe po oshinima shoka,” ta popi ngaaka nomuthindo.

Ta ti ita ki idhidhimikila ombepo yeyonuko ya a mpoka, naangoka taka lopotwa nenge ta monika ta longitha nayi iimaliwa yopenzela ota kala a katukilwa onkatu yomeendelelo ye ta longwa naye, opo a tul epo omukalo ngoka omwiinayi.
Okwa uvaneke ta kala ta ningi iikonga momikunda dha dhingilila oshikandjohogololo shawo, nokutala ngele iimaliwa otayi longithwa ngaa momukalo ngoka gu uka, ta ti aanona naya landelwe omizalo dhosikola, iikulya momagumbo osho wo iipumbiwa yokoosikola.

LEAVE A REPLY

Please enter your comment!
Please enter your name here