Kashushu okwa hala oku imba oongalo dhi na etumwalaka tali tungu

0
11

Pinehas Nakaziko
Windhoek

Omwimbi gwoongalo dhoAfro Pop ngoka e li ha imbile oongalo dhe mOshakati shaNangombe gwedhina Ndjene Moses, nokwa tseyika nawa moongalo onga Kashushu, okwa ti ye okwa hala oku imba oongalo ndhoka dhi na etumwalaka tali tungu oshigwana, nodhi na omulyo omutoye.

Kashushu shika okwe shi popi sho a li a pititha oalbuma ye yotango oshiwike shika yedhina Pandula, ndjoka yi na ehwata lyoongalo ombwaanawa dhi li 12.

Noalbuma ye ndjika Kashushu okwa ti ye okwa hala okupandula ayehe mboka ya kala noku mu yambidhidha mondjila ye ayihe ndjoka a enda yoku imba.

Moalbuma muka oomoka tamu adhika oongalo ndhoka dha imbwa nawa notadhi hokitha  ngaashi Iihuna, moka ta imbi kombinga yemono lyiihuna, nankene omuntu e na okulonga nuudhiginini opo a adhe ondjodhi ye. Ongalo ontiyali oondjoka Believe (Itayela), ndjoka ta popi kombinga yoku itayela kukehe shoka omuntu to lombwelwa noshi li mondjila.

Moalbuma otamu adhika ishewe ongalo yedhina Pandula, moka Kashushu ta pandula Kalunga sho a kala nokukala pamwe naye mepititho lyoalbuma ye, noku mu pa oshitalenti shoka oshiwanawa sho ku imba.

Kakele kwaashoka, Kashushu okwa pititha ishewe okaviidio kongalo ndjoka Pandula, ka thanekwa kehangano dhingi lyokuthaneka uuvidio nuufeelema mOshakati lyedhina Racio Media Group.
Okavidio oke li nale taka topolelwa kooradio dhomuzizimbe dhomoshilongo ngaashi One Africa no-NBC.

Kashushu omuhikingalo ngoka a kala noku imba oongalo dhe okuza mo2010, nokwali a holokele mowela nongalo yedhina Back To School, ndjoka ya kala noku inyenga nawa monooli yoshilongo oomvula odhindji. Ongalo oya li ishewe ya mono ompito ombwaanawa sho ya kala noku inyenga nawa kooradio dhomoshilongo ngaashi Kati Radio, nOmulunga Radio.

Omvula oyo tuu ndjoka Kashushu omo a tameke oku ilongekidhila oalbuma ye yotango, moka a kwathelwa oku imba kuMushe, Buju Katjoko, Ndexland, Chika naPangwe.

Okwa kala ishewe noku imba nokunyanyudha piituthi yiipindi mOngwediva, Oshakati Totem Expo oshowo omahala ogendji gwokunwina monooli.

LEAVE A REPLY

Please enter your comment!
Please enter your name here