Moshitila Mwa Z’Ondjupa

0
45

Monkalamwenyo yomuntu, osha yela kutya, omuntu ta longo e na ombili yokomwenyo, iizemo ye ito vulu oku yi yeleka naangoka kee na ombili. Iita sho ya hulu nemanguluko lye ya, omadhiladhilo getu aanangeshefa, oga tameke okumanguluka, nokudhiladhila ongeshefa pwaahe na omapiyaganeko gasha. Nando ongawo, emanguluko olye ya li li iikuwali ngombangula.

Shotango, emanguluko nalyo wo olye etelele iinima yimwe, mbyoka ya ningitha okungeshefa ku kale kaaku shi okupu, sho oongeshefa dhimwe dha li inaadhi pitikilwa moshitopolwa shoka sha li hashi ithanwa nale Owambo. Shika osha ningitha wo aanangeshefa ya kale inaaya igilila omathigathanopo ga yaga kegonga. Sho nduno oshilongo sha manguluka, kehe gumwe okwa pewa uuthemba a ngeshefele mpoka a hala. Omangeshefa omanene nago oge ya wo kUumbangalantu woshilongo. Oshinima shika osha halutha aanangeshefa oyendji yomoshitopolwa, oshoka oya li ye shi tala itaashi vulika ya thigathane po nomangeshefa ngoka omanene. Epuko enene olya zi mpoka kutya , ethimbo sho lya lunduluka, omadhilaadhilo gaanangeshefa yokUumbangalantu inaga lunduluka, ishewe kape na ngoka a li e ya longekidhile elunduluko ndyoka.Aanangeshefa mbaka yokUumbangalantu, oya kala owala ya landula omukalo omukulu, ngoka ya kala haa longitha shito mokulanditha. Okwatya tuu, iinima mbyoka yi li moongeshefa dhawo kayi shi yoshinanena yo ishewe oya luudha noya kulupa. Kombinga yaayakuli, nayo oye ethiwa owala ya kale moonkalo dhawo oonkulu dhokuyakula. Aantu yaKalunga, inaku dhiladhilwa ootuu hewa, nda dhini okutumbula, ya dheulwe nkene ye na okuyakula aalandi pethimbo ndika. Aalandi, kuyo yene, oye ya thigi po nokuya ya ka lande koongeshefa ndhoka dhi na omayakulo omawanawa.

Okuza mpoka oongeshefa odhindji odha kanitha aayambidhidhi yadho, nodha gwile moluhepo nomomupya gweshunopevi, ano embangoloto, nadhimwe odha kana po thiluthilu.

Oshitiyali, emanguluko ishewe olye eta, opo oompito odhindji dhokungeshefa dhi patulukile wo naaluudhe, mboka ya li ya thindilwa kongudhi. Eliko lyaanangeshefa inali tshikila owala okuza mokulanditha , ihe emanguluko olye eta po wo oompito inaadhi kala ko nale.

Oshiholelwa ongaashi:Aanangeshefa ooyamweyamwe oya tameke nomikalo dhomaimangokumwe nomahangano omanene goohi, osho wo nomahangano galwe, hoka kwe ya zile oshimaliwa oshindji. Momukalo gwa tya ngaaka gweimangokumwe nangame wo onda kwatelwa mo
Nale oompito dhokungeshefa dhaaluudhe odha li dha ngambekwa. Aaluudhe wo kaya li ye na oompito dhokweenda, opo ya vule okwiilonga kaantu yokiilongo yilwe, ngaashi ye dhi na ngashingeyi. Sho wo nangame ndi li wo omunangeshefa paunafaalama, oshinima sha pupalekwa kemanguluko lyoshilongo shetu oshiholike, Namibia. Andola hamanguluko, ando epitikilo inandi li mona okukala nofaalama moshitopolwa shomuushimba moka ndi li ngashingeyi. Andola onda lombwelwa nale ndi shune kevigumbo lyetu lyAawambo.

Ofaalama oya pumbwa eitulomo enene, opo yi vule okweetela sha mwene gwayo, osho wo shoka tashi tungu oshilongo, onkene oya pumbwa okutonatelwa nuukeka nokukalekwa po. Pankalo yoshilongo shetu, ngele otatu popi oshili, ofaalama oyo ehukamugongo lyelikonolyomapendulopo goshilongo. Kapu na shoka oshindji omuntu ha longitha nenge hi ipalutha nasho, ihaashi zi mofaalama, kutya nduno oongaku, omayi, omagadhi gongundi (oombuta), niikulya yilwe, ayihe ohayi zi mofaalama. Iikutu twa zala, ayihe ohayi zi mofaalama. Onawa omuntu wu nyanyukwe ngele owa mona ofaalama, ihe hapo pu hulila enyanyu lyoye mpoka. Omuntu nyanyukwa ngele ofaalama otayi eta po sha shomungunda, meliko nomehumithokomeho lyoshilongo.

Aaluudhe oya kala ya thindilwa kongudhi miinima oyindji. Omoluukoloni noya kuthwa evi, naamboka inaaye li kuthwa, ngaashi kuumbangalantu woshilongo, oye li po ya thinana mo nenge ye li pevi lyaa na oonkondo dhasha. Omuthindo omunene gwekondjelomanguluko, ogwa li gu na elalakano lyokukondjela uuthemba wokwiimonena evi.

Ngashingeyi emanguluko sho lye ya, epangelo olya tameke okutopola evi. Shika oshinima lela tashi nyanyudha. Nando ongawo, otu na okutseya kutya, haaluudhe oyendji ya kala muunangeshefa woofaalama. Aakwashigwana yamwe ishewe inaya mona lela nando ompito ndjoka, oshoka oya kala ye yi tindilwa. Ishewe mboka ya li ye na evi, oya li owala haye li longitha mokwiipalutha kuyo yene, ihe inaye li longitha mokungeshefa. Kehe ngoka inaa mona ompito yokulonga oshinima shontumba, omuntu a tya ngaaka ito tegelele e shi longe nawa petameko.

Mokuninga oshinima lwotango, opu na okuningwa manga tango omapuko nokomapuko oko omuntu ti ilongele. Aniwa “Wa pukile wu til’ okuti” na “wag wile wu til’ okulonda.”

Ngame onda tameke uunafaalama momumvo 1993. Okuza momumvo ngoka onda kala ethimbo alihe ndi li moofaalama dhandje noku dhi longa. Onda mono ompito yokwiilonga kutya, ofaalama oshike noyi na uudhigu wa tya ngiini noyi na omauwananwa geni. Ngele otandi fatulula paufupi, uudhigu wofaalama ou li patatu, ngaashi: uudhigu wo ku yi mona, uudhigu woku i longa nuudhigu woku i wilika.

LEAVE A REPLY

Please enter your comment!
Please enter your name here