Nujoma ta indile omalelondoolopa ga tunge uupale womaudhano

0
51

Shipi Elago
OKAHAO

Omukokolipresitende, Omundohotola Sam Nujoma okwa li i indile omalelo goondoolopa opo ga tunge uupale womaudhano moondoolopa dhawo opo ku yambulwe po omaudhano miitopolwa ayihe moshilongo.

Dhika Nujoma okwa li e dhi popile mOkahao pethimbo a li ta patulula omaudhano gaamboka ya tsilika nale oongaku dhetanga mOkahao nomikunda dha dhingoloka ondoolopa ndjoka.

Nuujoma okwa ti omalelondoolopa naga se oshimpwiyu opo ga holole po omahala ngoka taga vulu okutungwa uupale wopamuthika omwaanawa moka uunona woshilongo shika tau kala nokudhanena.
Okwa ti omaudhano ohaga kaleke aantu ye na uundjolowele kamana notaga ngambeke omauvu, go otaga pe aantu oonkondo dhokulonga sha shomungunda.

“Ngele uunona owu na omahala gwokudhanena, nena uunona owe wu keelela pomahala gwomanwino mpoka olwindji ho adha tau longitha omalovu niingangamwithi sha pitilila, moka olwindji haye shi ningi molwashoka kape na sha tashi tungu shoka tashi kaleke uuluyi wawo wi ipyakidhila,”Nujoma ta ti.

Okwa ti omaudhano ohaga eta ombili nelandulathano mokati kaantu oshoka muudhano uunona otau longwa nkene wu na oku ihumbata komeho gaadhewuli, gaahikihiya nosho wo gaadhani aakwawo naashika otashi tungu po onakuyiwa yokanona yi na elandulathano nekota lya kola.

Ta ti omaudhano ohaga eta oompito moka aadhani haye ya pamwe nokuninga omathigathano pambili, na mboka haya dhana omaudhano olundji ohaya kala ye na omadhilaadhilo taga endelele okukandula po omikundu dha yoolokathana, miilonga nosho wo momangeshefelo.

Omukokoli okwa li a pupula kombunda Okahao Veterans Football Club sho ka li ki iyunganeke opo ke ete po ethigathano ewanawa notali hokitha lyo olyi na omalalakano omawanawa taga tungu okuyambula po uudhano noonkuluhedhi dhoshitunda Namibia.

Okwa li wo a pandula aanangeshefa yaali mOkahao nando ye li ya tetekela nale, Eddy Willibard Katuta naTobias Kashanu mboka ya li ya longitha oonzo dhawo ndhoka dha li inaadhi gwanena nawa okukwathela mependulepo lyomaudhano moshitopolwa.

Aanangeshefa mbaka oya li ya dhana onkandangala metotepo lyoosipana dha yooloka mOkahao noya li haya longitha oshimaliwa okuza moongeshefa dhawo okugwanithila po oosipana ndhika oompumbwe dhawo dhomawudhano.
Ta ti shoka ya ninga itashi ka dhimbiwa mondjokonona yoshitunda Ongandjera nondoolopa yaKahao.

Okwa ti omaudhano ihaga gandja owala uuwanawa kwaamboka taya dhana ashike woo otaga eta po wo oompito dhomangeshefelo moshigwana unene tuu kaanangeshefa aashona naamboka yopokati okungeshefa iilandithomwa yawo pethimbo lyomaudhano, naashika otashi kwathele meyambulepo lyeliko niipindi moshilongo.

Omukwaniilwa gwoshitunda shaNgandjera tatekulu Johannes Mupiya okwa li a kunkilile aalongekidhi yuudhano waMan of Action opo ya tale nkene taya eta mo wo uudhano wopamuthigululwakalo ngaashi onkandeka, omupembe nosho tu opo kaatu kanithe oonkuluhedhi dhoshilongo she.

Okwa ti omaudhano ohaga vulu okuhwepopaleka oonkalamwenyo dhaantu paliko oshoka monena aadhani ohaya vulu okukwatela membale unene tuu ngele ohaya dhana pamuthika gwopombanda.

Okahao oko kamwe komoondoolopa odhindji monooli kaa ke na okapale ke li pamuthika gwa egulukila aakwashigwana, nolundji ohaya longitha uupale mboka wu li moosikola.

Nakusa Man of Action okwa li e na ondjodhi yokutunga okapale ka fa koBarcelona mOkahao, onkene okapale haka oka li haka kala kondungu yelaka lye kehe mpoka tayi ashike okwa li a hulile muunyengwi molwa iikwa niipangitho.
Ashike nando okwa li a huulile muunyengwi oohiinina mboka a li a longo nayo pethimbo ndiyaka oye li ya hala okuyumudha po ondjodhi ye opo okapale haka ka tungwe.

Alexander Anguwo ngoka e li omunashipundi gwOkahao Veterans Club okwa li a holola nkene ye li moonkundathana nelelo lyondoolopa opo ya tale nkene taya tala mpoka tapu opalele okapale haka taka ka tungwa.

Oye li wo ya tsuwa epepe koluvalo lwaMan of Action ndoka wo lwa ti olwa hala okumona ondjodhi yahe ya tsa oshoka okwa li e na ohokwe okumona okapale kopamuthika mondoolopa yaKahao.

LEAVE A REPLY

Please enter your comment!
Please enter your name here