Ohole yoipala yapitilila omukifi, konga ekwafo

0
328

Oibofa yomakwatonghonga moshilongo oyo i li po tai londo efiku nefiku, oi li ondobwedi kutya oshilongo, unene tuu ovalumenhu voshilongo shetu ova pumbwa ekwafo lopaxungomwenyo.

Eshi shi li ondobwedi kutya oshiwana otashi vele, osheshi vamwe vomwaavo va ditikwa po molwa ekwatonghonga, ovanhu ovo ngeno ito teelele nande nande va kendabale okukwata omunhu keenghono.

Na otashi ulike kutya ope na omwakwa wakula moshoshilongo wa pumbwa okufitikwa, ngeenge tashi ya kexungomwenyo li na sha nomilele, nosho yo ehongo lomilele.

Luhapu meefikola detu, ounona ohava longwa ashike nghene ve na okuya momilele da amenwa, nghee ve na okuli keelela komaufimba inaa teelelwa nonghee ve na oku li keelela kombuto yoHIV/Aids. Ashike melongo omu inamu kwatelwa nande omukifi woipala oo hau tameke pamadilaadilo, nongeenge omunhu ina kwafelwa ohe ke li hanga te uya fiyo oponghatu opo ta kwata ovanhu onghonga.

Oshiwana shetu nokuli osha tukula ovaholi voipala meengudu mbali. Imwe oyo yo omunhu oo e hole oipala a talika ko onga ombwada yokovakainhu ile yokovalumenhu, naau oha talika ko onga oshififahoni, ha kala ashike ta popilwa konima yomakuma, ile te shi ulwa kondadalunde, ashike nande na kale ha shekwa ngaho omolwa ohole yoipala, ke na nande efiku a lombwelelwe kutya okwa pumbwa ekwafo. Hinga oshiwana kashi shi ngeenge omunhu ou okwa pumbwa ekwafo. Shapo ngeenge ota kwafelwa ongeenge ta kumaidwa meumbo, ashike e li halo ekwafo lexungomwenyo lopaunamiti olo la pumbiwa komunhu ou. Ope na yoo ongudu imwe yovaholi voipala, unene ovalumenhu, ovo to hange tava tangwa omolwa ohole yavo yoipala.

Ashike eshi itashi ti kutya ovo ve hole oipala epitilila ohava kala va hafela omalihumbato avo. Ohashi ya fiyo oponghatu opo omunhu te li dimbulula kutya okwa pumbwa ekwafo ashike mupya munene, omunhu ou ke na naanaa kutya oudjuu waye ote u lombwele lyelye shaashi ohole yoipala ohoni, ye ke wete naanaa kutya ota yuka peni ngeenge ota pumbwa ekwafo. Nokuli vamwe ove shi tambula ko kutya ohole yavo yoipala ya pitilila eshito lavo.

Onghela inya omunamido 40, ondohotola koshipangelo shaShakati ya hombola, oya holoka momhangulilo yaMangestalata mOshakati, tai pangulilwa omolwa ekwatonghonga lokakadona keedula 19. Ko vali okwa hololwa yoo kutya eedula nhano da pita, omukainhu umwe okwa li a kufa mo oshibofa shonghendabala yekwatonghongo osho sha li sha ningilwa omundohotola oo tuu ou.

Odula yadja ko omushiviveta, a li nokuli mangestalata Jaco Kennedy (a li e na eedula 29 pefimbo olo) naye okwa kwatwa po omolwa oibofa aishe ivali yekwatonghonga. Omuinginiia, Epafroditus Unengu, omonamati waumwe womovapangulindjai moshilongo naye yo okwa li a pewa ehandukilo lomido 12 neehani hamano molwa shimwe shomoibofa ivali yekwatonghonga oyo ta pangulilwa. Odula ya dja ko Omupanguli Diina Uusiku okwa li a undwila oo a li omukwatakanifi woSwapo moshitukulwa shaKavango Vincent Likoro, eedula 10 konima yekumba. Ei oimwe ashike yomoibofa ihapu yonghonga moshilongo ya pambula ovalumenhu oohashike shalye moshiwana, ve na ondjelo, hano vehe na ngoo ngeno omhumbwe yokumona ovakainhu, ashike otava kwata ovakainhu keenghono.

Moilongo ei ya putuka omu na ovahongwanhu, nghee ve lihonga, ove lihongela exungomwenyo lopaunamiti, okuhakula nokukwafela shi na sha noipala. Mo moilongo omo omukifi ou woipala ya pitilila inau talika ko onga ohoni ile etumba, ashike owa talika ko onga omukifi oo hau pangwa, novanhu ovo veli hanga moudjuu woludi eli ohava mono ekwafo. Hano ovaNamibia navo ova pumbwa oku uda ko oudjuu watya ngaho, opo nounona ovo ve li meefikola va tameke okupupa omahalo avo, vo va pewe omakwafo manga inave ke li hanga monghatu omo tava kwatakwata ovanhu keenghono.

Ashike itashi ti kape na ekwafo lasha ngeenge omunhu e li hange monghalo ya tya ngaho, moshilongo omu na ovaxungimwenyo vopaunamiti ovo natango tava dulu okukwafa. Hano ovanhu nava konge omakwafo fimbo pepi.

LEAVE A REPLY

Please enter your comment!
Please enter your name here