Okahao Veterans ki ifola ekopi lyaakokele oshikando oshitiyali

0
58

Shipi Elago
Okahao

Osipana yaadhani aakulu mOkahao oyo enyakwa lyuudhano waMan of Action Annual Tournament wonuumvo konima sho ya li ya dhenge Onemanya FC nookoola 3-1 koopelenti sho oosipana dhika dha li dhi ithigi othika mokapale 0-0.

Okahao Veterans hoka ka li ke ya muudhano wonuumvo okugamenena po epapapa ndyoka ya li ya sindana omvula ya za ko oka li ka tameke nuunkundi konima sho ka li ka dhana shi thike pamwe yimwe muyimwe nosipana yOshiteyi noyendji oya li yu uvite kutya onkoshi oya kulwa omayego.

Ashike hoka oyendji ya li ya fala omeya hako kwa li taku hangwa oshoka omanga in ya konda omuthitu gwaniimbungu yo iimbungu otayi lili nale sho Okahao ka li ka galukile muudhano uutiyali ka kenyeka omayego noka li ka halakanitha po Uukwalumbe nookoola 3-0, omanga ina ka hanagula po Uukwandongo ishewe nookooola 3-0 nokuyauka mo mongundu ya-A.

Mongundu ya-B Oluteyi Legends olwa li lwe ya noshilundo lwa hala okoopaleka omapuko ngoka ya li ya ningi omvula ya za ko moka ya li ya dhengwa shi sitha honi naka ya li ya sindana po nando uudhano wumwe.

Ondjodhi yoku sindana po ekopi yOluteyi oya li ya dhengwa ondhimbo onene koInfantry Veterans Club konima sho ya li ya dhenge Oluteyi Legends 1-0 muudhano wawo wotango wongundu ya B noku ya tula mpoka ya li ya nambele omvula ya za ko.

Ashike aamati yeembindja eembulawu dhekonda etokele oya li ya galukile muudhano wawo uutiyali nOnemanya ya kwata onyambi taya komandwa kukakukutu komatanga Iiyambo Eliazer opamwe nomupeha gwe Inodhimbwa Shaanika noya li ya tompola okudhenga Onemanya 1-0.

Kapundja ho tondoka shito notala owa logelwa oonkwengu, esindano lyOluteyi olya li lye ya pe oonkondo dhi vule dhondjamba naashika osha li she eta opo ya dhenge osipana ndjoka ya li tayi tilika muudhano awuhe wekopi ndika, osipana yEkwalyamushemo natango okoola yimwe nomevi.

Okuya pehulilo lyOlyomakaya ga za ko Oluteyi olwo lwa li pombanda yongundu yoosipana dha B sho lwa li lu na iitsa ihamano.
Infantary Veterans FC okwa li a lalelekwa mo muudhano mbuka konima sho a li a kanitha uudhano we nOnemanya nando okwa li e ya nosipana yi na aadhani dhingi. Aakokele oya li taya dhana nuudhiginini shili ndele noohiinina mboka ya li ko oya li ye shi mono nkene okatanga haka undulwa. Okahao oka li ke shi pondola okusindana po uudhano mbuka oshikando oshitiyali muule womimvo mbali dha landulathana konima sho ka li ka dhenge Onemanya koopelenti nookoola 3-1 nokutoola po ekopi ndika noombandi dhoshingoli.
Onemanya ndjoka opo tayi kutha ombinga muudhano mbuka lwotango oya li ya toola po ehala etiyali lyo Ekwalyamushemo tali ya puutitatu omanga Omuthitu gwe ya pehala etine.

Uudhano mbuka ohawu unganekwa omvula kehe ongegongelo lyoshimaliwa okutula moshiketha shOkahao Veterans Club hoka ke li ka hala okuhwepopaleka oonkalamwenyo dhuunona uuthigwa naamboka wu li moluhepo, unene tuu okufuta oosikola dhopombanda .
Okahao Veterans oke li wo haka longitha oshimaliwa shika okukwathela osipana onshona ndjoka hayi dhana moSecond Divison Okahao FC moompumbwe dhawo dhomaudhano.

Uudhano mbuka owa lukilwa Eddy Willibard Katuta, a tseyika nawa Man of Action ngoka a li a longo mokati koshigwana shaKahao nokuyambula po omaudhano ngaashi gwokatanga kokoompadhi, oombasikela, oongonyo, nosho wo omathigathano gwoogwamululu.
Nando Man of Action oku li a thiga po uuyuni mbuka egumbo lye olya li lye mu kalele po puudhano mbuka moka ya li ya gandja okapandi koondola 5000 koomuma.
Omonakadhona gwaMan of Action ngoka a tseyika nedhina Oteya mokuhika oongalo okwa li a mwenyeke aatali oshali noongalo dhe ongulohi yetihamano lya za ko pokapale kaShaanika Nashilongo mpoka opo pwa li tapu dhanewa uudhano mbuka.
Uudhano owa li wa patululwa pambelewa komukokolipresitende omundohotola Sam Nujoma.

LEAVE A REPLY

Please enter your comment!
Please enter your name here