Okondjatu oyo enyakwa epe muudhano waRuacana

0
47

Shipi Elago
RUACANA

Ethigathano lyomaudhano ndyoka hali nana aantu oyendji okuza kiitopolwa ya yooloka moNooli pethimbo lyiituthi yaPaasa naandyoka hali unganekwa kelelondoolopa lyaRuacana lya mono ishewe omusindani omupe konima sho lya kala noku sindanwa po kOkambembe oomvula mbali dha za ko.

Okambembe oka li ke ya muudhano mbuka nelalakano lyokugalula ekopi ndyoka ya kala nokusindana omimvo dha za ko na kaya li ya ongaonga oku ulika kutya yo kaye shi okatana konima sho ya li ya hanagula po DAPP nookoola 5-0 muudhano wawo wotango.

The Drivers Team oya li ya dhengwa mo ko ST.Bennedict Oshikuku 1-0, Okafa oka li ka dhenge moAfro Cats FC nookoola 3-0. Uuministeli wIikwameni owa li wi ithigi othika 2-2 naThe Heroes, moka Uuministeli wa li wa sindana po uudhano mbuka koopelenti 5-4.
Epupa Zebra Stars olya li lya dhenge mo IUM Ongwediva 2-1 yo Damara 11 tayi ithigi othika 0-0 nOkondjatu White moka Okondjatu White ya li ya sindana koopelenti 5-4.

Okafa FC oka li ka dhenge mo ST. Bennedict 2-0 noku ya kedhingoloko lya landula ko nesindano ndika olya li lye ya pe omukumo omupe oshoka esindano olya li ta li nika.

Epupa Zebra Stars olya li lyi ithigi othika 0-0 nOkambembe A moka Okambembe A ka li ke shi pondola okusindana po uudhano mbuka koopelenti 4-3. Etoto FC olya li lyi idhenge mOkambembe B hoka ke li oko omukwaniilwa guudhano mbuka na oya li yi ithigi othika 0-0 mokapale na Okambmbe B oka li ka dhenge mo Etoto 3-1.

Oosipana odhindji odha li dha ende nokugwa mo mondambo nomwa li ashike mwa thigala oosipana mbali, Okambembe A nOkondjatu ndhoka dha li dha yi mondambo komatango gOmaandaha ga za ko.

Okambembe oka li ka kondjo noonkondo okukwatela po ngeno epapa lyawo ashike oya li ya sindika nOkondjatu FC olyo enyakwa epe lyuudhano woRuacana womumvo 2018.

Okondjatu oya li ya toola po ekopi, oombandi dhoshingoli, nokapandi ko-N$ 15000, Okambembe oka li ka hekelekwa nokapandi ko N$ 10 000 nosho wo oombandi dhoshisiliveli.

LEAVE A REPLY

Please enter your comment!
Please enter your name here