Oonakulwa aakulu ya yambidhidhwa noshimaliwa

0
245

Victoria Kaapanda
OSHAKATI

Omupeviminista mUuministeli Woonakulwa Aakulu Hilma Nicanor okwa ti kutya ooployeka ndhoka hadhi pewa oonakulwa aakulu odha lundulula oonkalamwenyo dhawo. Shika omupeviminista okwe shi popi oshiwike sha zi ko mOshakati moshitopolwa shaShana.

Oonakulwa aakulu moshitopolwa moka ye thike pomwaalu 1,381, oya li ya pewa oshimaliwa koshikondo shoonakulwa aakulu muuministeli mboka opo ya tote po ooployeka dhawo, dhono tadhi vulu oku ya etela oshimaliwa shokwiikwathela mokukalamwenyo kwawo.
Naashika osha hokololwa kutya ngashingeyi otashi kwathele oonakulwa aakulu mboka kwa li taya hupu shokadhila. Uuministeli mbuka owa li wa toto po oopoloyeka odhindji dha yooloka, ngaashi oployeka yoondjuhwa. Aayambidhidhwa mboka okupitila muuministeli mboka ohaya landitha nee omayi gwoondjuhwa dhoka ya pewa okupitila mooployeka.

Osho wo oployeka yiimeno ano mono ye na omiti dhi ili nodhi ili yo taya landitha. Yalwe oya toto po oongeshefa dhoku opaleka oondolopa. Oyendji mboka ya li ya kwathelwa noshimaliwa shino osha eta lela elunduluko moonkalamwenyo dhawo neeployeka dhawo otadhi ende lela nawa. Nicanor okwa popi woo kutya monooli oshikondo shoka osha li sha kwathela woo oonakulwa aakulu yomoshitopolwa shaHangwena. Onakulwa aakulu yethike pomwaalu 1.364 mOhangwena oya li ya kwathelwa oshimaliwa shoku totapo oprojeka dhawo. Naminista okwa li a tsu omukumo kutya mboka inaya mona ekwatha natango oyeli taya nyenyeta ihe uuministeli inawu ya dhimbwa, otaya mono omakwatho gawo muule wethimbo efupi. “Inamu hupa ko oshoka epangelo olya pitika nale oshimaliwa sheni, ashike oshimaliwa osho ashike tashi shongola moshiketha shepangelo, ihe ngele epangelo lya kala nawa pashimaliwa, iimaliwa yeni otamu yi pewa mu ka tameke ooployeka dheni “ omupeviminista ta yelitha.

Ta gwedha po kutya uuministeli woonakulwa aakulu owa longitha oshimaliwa oshindji lela oku kwathela eetepo lyooployeka dhoka.
Oshimaliwa shi thike poobiliyina 2.1 osha kwathela oyendji mboka ya li ya pewa oshimaliwa kuumisteli owo tuu mboka.

Nicanor ta kumagidha woo aakondjelimangulo mboka ya longe neyitulemo, kaya hepeke nando oshimaliwa shoka ya pewa kepangelo opo ooployeka dhawo dhi koke dho dhi kute wo aakwashigwana mboka yaa na iiyemo, dho dhi fute wo iifuta yepangelo yokomvula.
Okwa ti shoka otashi yambidhidha ehumokomeho netaandeleko lyoshimaliwa moshilongo.

“Toteni uungundu wokulongela kumwe, moka tamu kala tamu popi omaupyakadhi geni, naampoka mwa nyengwa mehumokomeho lyooployeka dheni, e tamu dhi tumu kutse kuuministeli tse tu tale mpoka tatu vulu oku mu yambadhidha,” Minista ta ti.
Oyendji ohaya vulu okupewa iimaliwa mbika yokutota po ooployeka, ashike ohaya ke yi longitha oompumbwe dhawo dhimwe dhi ili nodhi ili, kadhina shilonga dho itadhi ya etele ekwatho lyasha.

Minista ina hulila ashike mpoka okwa ti wo oku na oku enda a tale ooployeka dhoka opo a koleke shili kutya oonakulwa aakulu otaya longitha ngaa oshimaliwa nkene shi na okulongithwa.

Mboka inaya mona natango ekwatho ndyoka oye li onga aanelago oshoka ope na okambo hoka taka ka pitithwa, ta ka ithanwa “Guide Book” . Okambo hoka ota ka kala ke na omaludhi gooployeka moka taya vulu oku hogolola oployeka ndjoka ya hala nokuwete kutya otayi vulu okulonga nayo.

LEAVE A REPLY

Please enter your comment!
Please enter your name here