Oongangala meyugwo kwa homatiwa dha kalekwa mondjedhililo

0
251

Loide Jason
WINDHOEK

Oongangala dhoka dha li dha yaha nokuehameka omukulukadhi gwomunangeshefa mboka haya munu iikwamboga moshikandjohogololo shaShikuku osho dha dhitikwa, nodhaa holoka mompangu oshiwike shika.

Oongangala dhika dhi li ne odha li dha adhika mondoolopa yaRundu moka ya mangwa sho ya li ya ka talela po ongangala onkwawo ndjoka ya mangwa moRundu shina sha woo natango neyugo.

Uuyelele mboka wa gandjwa komupevipopiliko gwopolisi moshitopolwa shaMusati Seargent Anna Kunga otawu ti kutya yaali yomoongangala dhoka oya holoka mompangu mondoolopa yaRundu oshiwike sha zi ko omanga gumwe gwomuyo a holoka mompangu yaShakati.
Mboka ya holoka koRundu oshipotha shawo osha undulilwa komasiku ge li 12 gaApilili yo oyo nee Moses Venokanya Shiimi, 25, naMondlane Alex Ananias 39.

Omanga ngoka a holoka mompangu yaShakati oshipotha she aniwa sha undulilwa momasiku ge li ga-5 Apilili, moka woo ategelelwa a ka holoke kompangu yaOutapi. Ye oye nduno Johaness Ndasala 39 .

Oongangala adhihe ndhoka dha popiwa pombanda odha tindilwa oku ifutila mo mondholongo, niimaliwa inayi monikwa.
Okwa hokololwa kutya gumwe gwomoongangala ndhika sho ya thiki moRundu okwa li a longo oshimbuluma e ta mangwa meendelelo.
“Sho nduno a mangwa okwali a dhengele yakwawo kutya oku li mongali, ookuume ke miilonga sho ye dhi uvu oya mbulukuta opo ya ka gandje eyambidhidho lyopauntu kumukwawo omanga inaya konima yekumba,” osho onzo yomauyelele ya inekelwa kuKundana ya hokolola ngaaka.

Onzo oyo tuu ndjoka inayi pitika edhina lyayo li tumbulwe, oya tsikileko kutya molwaashoka opolisi oya li yi na po ethano limwe lyongangala, ongangala ndjoka oya li ya dhimbululwa ndele taya dhitikwa ethimbo olyo tuu ndyoka.

Mbaka oya hokololwa kutya gumwe gwomuyo oku li omonamati gwanakuningilwa omuyonena, taku hokololwa kutya shika oshikando oshitiyali ta yugu he iimaliwa momukalo ngoka e li netanga lye ndyoka lyokulonga iimbuluma.

Oshiningwanima shika osha ningilwa komukunda gwedhina Embumba moshikandjohogololo shaShikuku uusiku wokupendukila ohela.

Okwa hokololwa kutya oongangala ndhika dhi vulithe pune odha ponokele egumbo lyomunafaalama ngoka, moka mwa adhika ashike omukulukadhi gwomimvo 56 e tadhi mu yaha mokooko opo nduno ya wape okufadhuka po noshimaliwa koomuma shi thike poo-N$ 200 000.
Kakele koshimaliwa shoka opolisi oya ti mbaka oya li woo ya fadhuka po noradio yomuzizimbe ndjoka yopashinanena lela noshowo ondjembo yomuyakelwa.

“Omukulukadhi ngoka a dhika megumbo okwa yahwa nondjembo mokwaako sho oombudhi dhika dha umbu lwiikando itatu mondunda yawo ndjoka yokulala.

Oya pondola okuya mo e taya zi mo niimaliwa mbyoka koomuma,” osho omupopiliko gwopolisi a hokolola ngaaka.
Ashike kalunga sho iha dhipagelwa oyana, gaali gwomomahauto goongangala ndhika oga li ga dhama, nani aniwa oya li ye na po ehauto limwe etitatu ndyoka olyo ya matuka po nalyo.

LEAVE A REPLY

Please enter your comment!
Please enter your name here