The Young Host a pititha oalbuma ye ontiyali

0
61

Maria Namupala
OMUTHIYA

Tobias Fillepus, 23, ngoka a tseyika nawa mokuhika oongalo nedhina The Young Host, okwa yambukile mOnalunike mOndonga, nokwa tameka okuhika oongalo manga a li penongelo pOnalunike. Moonkundathana naye okwa holola nenyanyu kutya ota lalakanene okuyambulapo iipewa niitalenti yawo, oshowo okukwashilipaleka kutya oondjodhi dhawo mokuhika nokwiimba oongalo odha pya.

Konima ashike sho a li a pititha oalbuma ye yotango mo 2016, okwa li natango a tokola opo a shune mokombitha ye a tale kutya ota teleke mo nokudhunga mo ngapi, oku li gumwe gomoonekandangala lyombandje moshilongo mboka taya longo nokuyambulapo ehangano lyoongalo moshilongo.

“Sho twa tameke okwiimba oongalo otwa tamekele tu li yaali ashike molwa uunyengwi naasho twa topoka twa kala moondoolopa dha yooloka osha kala oshidhigu okukwatathana, naashika oshe tu eta tu topoke ye kehe gumwe ta kala ti imbi oongalo kuye mwene, nangame ngaashingeyi ohandi imbi oongalo dhandje ndi ithikamena,” Ta ti ngaaka. Oalbuma ye ontiyali oya piti oshiwike sha zi ko ndjoka tayi ithanwa Tota Nuupenda, otamu adhika uungalo wu li 12, moka a kwathelwa kaahikingalo ooyakwawo ngaashi Ndawana, Dama Monique, Kallefa, Nilton naahikingalo yalwe ya za moshilongo.

“Kamwe komuungalo mboka tawu adhika moka ongaashi Mukadhona Gwandje hoka taka popi kombinga yoomeme taya hengana aasamane yawo nemono lyiihuna lyomaluvalo momagumbo, omu na Lumoho Ilonga hoka ka tala unene ombinga yomayeletumbulo,” The Young Host ta gwedha po ngaaka.

Okwa ti aluhe etameko ohali kala edhigu kakele uuna omuntu e na elalakano noku shi shoka a hala okwaadha unene iilakanenwa ye, nena ayihe ohayi ende nawa, ta ti okwa tamekele ta shongola ashike pethimbo ndino oku na omukumo, nokwiitaala mehangano lyaahikingalo aaNamibia unene sho oyendji ye na elongelokumwe.

Ta gwedha po kutya monkalamwenyo omuntu gomwenyo owu na okutsakanena omashongo mpaka naampeya, naashike kuye okwa kala e wete kutya opo a hume komeho nenge a longe nuupenda nonuudhiginini oku na okutsakaneka omashongo gontumba nogongandi, noye ashike e wete mwene kutya ote ga sindi ngiini.

Oalbuma ye yotango otayi ithanwa Oshike she tu eta, moka mu na oongalo 15, ndhoka a holola nenyanyu kutya onkene tadhi dhana onkandangala moshilongo ashihe, Kakele kokuhika oongalo The Young Host oku li ta opaleke iilongwa ye kOvenduka, molwaashoka okwa hala okutsikila kiiputudhilo yopombanda, ye ta kala ta hiki oongalo nokuulika oshipewa noshitalenti she.

Molwaashoka onkalo yombepo oya piyagana nayamwe yomaahikingalo ya teya omitse okwa pula aahikingalo aaNamibia ya kale haya longele kumwe, yo ya paathane omayele ya vule okuyambula po ehangano lyaahikingalo moshilongo, yo taya kala taya gandja etumwalaka tali vulu okupulakenwa komapipi agehe moshigwana.

Olundji oha kala ta nyanyudha pomahala ga yooloka, nokwati ota tsikile nokunyanyudha aaholi yoongalo dhe , ye a kwashilipaleke kutya oku na elongelokumwe nekwatathano ewanawa naaholi yoongalo dhe moshilongo. Oku uvaneke oshindji okuza kuye omumvo nguka.

LEAVE A REPLY

Please enter your comment!
Please enter your name here