Aakwashigwana ka taleni ko omauthemba geni – Kapofi

0
49

Maria Namupala
ONDANGWA

Minista Yiikwameni Yoshilongo Frans Kapofi, okwa kunkilile aakwashigwana mboka inaaya ka tala ko omauthemba gawo, ya longithe ethimbo ngashingeyi opo ye ke ga tale ko, omauthemba ngoka ongaashi uumutse woshilongo, oonzapo dhomavalo oshowo oopaspota.

Kapofi ndhika okwe dhi popi mehuliloshiwike lya piti pethimbo a li a pewa ompito a popithe engathithi lyaakwashigwana mboka ya li ya gongala pOnandova. Okwa ti otashi yemateke okutala oombelewa dhiikwameni moshilongo ashihe dha ndumbalala uuthemba waakwashigwana nonande ya li taye wu kongo nomalalakano.

“Konima ashike sho nda li ndu ulikwa nondi inekelwa komupelesidente goshilongo ndi ninge minista onda li nda mono ompito okutalela po dhimwe dhomoombelewa moshilongo, sho nda kundathana naanambelewa oya tseyithile ndje kutya oombelewa odhu udha uuthemba mboka wumwe aantu ya thanekwa nenge ya ninga oonzapo dhomavalo konima yoomvula ashike ihaya ile ko omauthemba gawo,” Kapofi ta ti.

Okwa ti ayehe mboka inaaya ka tala ko omauthemba gawo naye shi ninge opo ya pupaleke iilonga yaanambelewa, yo kaaya kale ya ndumbalelwa komikanda yaa na mpoka taye dhi fala, ta ti ohashi gandja iilonga iidhigu kaananmbelewa uuna omauthemba ga ninga ko ethimbo, molwaashoka oye na okukonga nuudhigu sigo ta ye wu mono.

Ta ti oshi li oshinakugwanithwa shaantu yoyene ya kwashilipaleke kutya omauthemba gawo oye ga kutha ko, molwaashoka pethimbo ndika ihashi kutha we ondjila onde okumona uuthemba ngaashi sha li nale omuntu ha tegelele oomwedhi odhindji opo a kale i imonena omauthemba ge.

Kapofi okwa tsikile ko ta ti pakotampango lyoshilongo omuntu kehe oku na uuthemba okukala i imonena omauthemba uuna e na omaukwatya nomikanda adhihe dha pumbiwa, nonkene naya kale yi imonena ngele uumutse nenge omikanda kehe ndhoka ya hala hadhi monika koombelewa dhawo, ta ti aanambelewa yawo oyi ilongekidha ethimbo kehe.

Okwa pula aavali ya kwashilipaleke kutya aanona oya ningilwa oonzapo dhomavalo omanga opo ya monika, ta ti miipangelo oyindji omu na oombelewa dhuumutse nomauthemba, shoka ta ti osha pupaleka onkalo yaavali opo sho taya mono ya longithe ompito nokuningila aanona oonzapo omanga inaaya za mo miipangelo, shika ta ti uuministeli owa tala koondjila molwaashoka yamwe ohaya ende iinano iile okuya koombelewa ndhoka.

Minista ta ti okwa konekiwa oohe yuunona oyendji haya fadhuka po iinakugwanithwa yawo, yo inaya hala okuningila uunona oonzapo dhomavalo, ta ti aalumentu oyendji oye na iinakugwanithwa yokusila aanona oshimpwiyu ashike oyendji iha ye yi gwanitha po.

Kapofi ta tsikile ko ta ti kakele kwaashoka okwa tsakaneka omanyenyeto ogendji ngoka taga nyenyeta aaniilonga moombelewa dhawo miitopolwa ya yooloka, yamwe taya yamukula aantu nayi nayamwe itaaya gandja omayamukulo gu ukilila unene kaakokele, okwe ya pula ya longe iilonga yawo nondjungu nokugandja eyakulo ngaashi ye shi uvaneka.

Okwa uvaneke ta tsikile nokutalela po dhimwe dhomoombelewa nokukwashilipaleka kutya okwa talela po aakwashigwana noku ya tseyithila yi imonene uuthemba noku ka tala ko omauthemba gawo koombelewa dhopashitopolwa.

LEAVE A REPLY

Please enter your comment!
Please enter your name here