Aaleli aakulu yaBrazil, South Korea naSouth Africa oye li ya taalela okalimosho

0
65

Zuma okwa tulwa moompangu omolwa oombubo dhiimaliwa

Omuplesidente gwaSouth Africa Jacob Zuma, kolumoho, a kuutumba mompangu moDurban mo06 April shi na sha neuvathano lyiilwitho moomvula dho 1998. Kolumoho omukulukadhi ngoka ha longele ehangano Thales, Christine Guerrier, ehangano ndoka ta li popiwa lya gandja oombubo kuZuma.

Omuplesidente omukulu gwaSouth Africa Jacob Zuma okwa li a holoka mompangu mEtitano moka a li a taalela iipotha yi na sha nokutaamba oombubo, nelongithonayi lyeuvathano li na sha niilwitho momimvo dho 1990 nasha. Zuma, ngoka a li a thiminikwa a thige po oshilonga shuuplesidente konyala iiwike yi li iheyali ya ka dhilongela lwaampoka, okwa li a kuutumba mokaketha kepangulilo manga aayambidhidhi ye ye li eyovi lwaampoka ya li ya gongala pondje, moshipotha shoka tashi ulike onkalo yomatopoko gopapolitika. Otaku popiwa a taalela iipotha yi li 16 yi na sha neuvathano ndyoka lya kotha oobiliona, manga a li ina ninga omuplesdinte gwaSouth Africa. Konima yominute dhopetameko 15 dhetameko lyepulakeno lyoshipotha mompangulilo yopombanda yaDurban, ompangu oya li ye ya pehulilo sigo omu ga-8 Juni. Zuma, ngoka a li i igongalelwa kengathithi lyaantu, okwa li a popitha aayambidhidhi ye konima yompangu, ta ti iipotha mbika oyo omatamaneko giipundjamenye. “Kandi na ondjo manga inaashi kolekwa kompangu, ashike ope na aantu yamwe taya tala ndje nda fa ndi na ondjo,” Zuma osho a ti manga aayambidhidhi ye ya li taye mu tsu omukumo.

Moshipotha shika, shoka tashi ithanwa pambelewa onga oshipotha shaZuma a taalelathana nepangelo, omuplesidente omukulu oye ti ithanwa omutamanekwa gwotango. Aakalelipo ye yopaveta oya li ye shi koleke mompangu mEtitano kutya ota ka ninga eindilo oshipotha shi talululwe noshi ekelwehi opo kaa pangulwe. Mompangulilo, aayambidhidhi ye oya kala noku igidha edhina lye, omanga mboka ya li pondje ya li taya imbi “Tulombweleni kutya okwa ningi shike sha puka, osho wo Etheni Zuma.” “Ota vulu okukala a ninga omapuko ge, ashike natu etheni omukokele a vululukwe nombili,” omunangeshefa gomimvo 29, Sphelele Ngwane ngoka e li omuyambidhidhi gwaZuma ta lombwele AFP ngaaka. Muusiku wEtine lya za ko, aayambdidhi ye vule 100 oya li ya gongala moAlbert Park moDurban moka ya li taya pataneke nokupula epangulo ndika li ekelwehi.

Park gwaSouth Korea a dhengwa oomvula 24 mondjedhililo
molwa okulunga
nokwiitapula

Oshiike sha zi ko ngoka a li nale omuplesidente gwaSouth Korea Park-Geun-hye okwa li a tulwa mondjedhililo yuule woomvula 24 shi na sha nokudhengela ondhi peho.

Ngoka a li omuplesidente gwaSouth Korea Park Geun-hye okwa li a tulwa mondjedhililo yoomvula dhi li 24 mEtitano molwa okulunga nokwiitapula, shoka sha li she eta pehulilo okugwa noku idhenga ombunda pevi komuleli gwotango omukiintu goshilongo shika, ngoka a li a ningi oshihakanwa shongeyo nokushekwa kaakwashigwana. Epangulo lye olya li lya kwata oomwedhi dhi vule 10, nolya li lya eta koontundulu omauvathano inaga yela pokati koongeshefa oonene moSouth Korea naanapolitika, shika osha li sha hulu naPark a monika ondjo miipotha yuungangala, mwa kwatelwa oombumbo osho wo okulongitha oonkondo dhombelewa nayi. Ngoka a pingena po Park okwa ndjandjukununa efalo mondjedhililo ndika onga oshinima tashi teya omitima kaaku na we, komuleli osho wo koshigwana. “Omutamanekwa okwa longitha nayi oonkondo ndhoka a tsikwa kaakwashigwana, mboka oyo ye li aaleli yoshili yoshilongo, opo a ete evundakano melelo lyopashigwana, “ Omupanguli Kim Se- yoon ta ti ngaaka pethimbo a li ta gandja etokolo lyompangu. Park, 66, okwa li a monika ondjo mokutambula nenge mokuthindila kongudhi a pewe iimaliwa yi vule oomiliona US$20 komahangano, okutaambathana omikanda dhomauyelele ge na sha iiholekwa yepangelo, okukeelela oonkulungu ndhoka itadhi tsu kumwe noompango dhe, osho wo okutsa iilyaalyaka aanambelewa mboka ya li ya tindi okutambula ko elongithonayi lye lyoonkondo. “Nonande pe na iimbuluma mbika, omutamanekwa okwa li a tindi iipotha ayihe mbika a li ta tamanekelwa, ina ulika eiyalombedhi lyasha ye okwa ulika wo omukalo omuwinayi moku pa Choi naanambelewa yamwe uusama,” Kim ta ti, ta popi kuume kaPark Choi Soon-sil. Park okwa li a pewa elombwelo opo a fute egeelo lyoomilliona US$17.

Konima sho oshikumungu shokudhengela ondhi peho sha li she ya montaneho yoshigwana , osha li she etitha opo aantu ya ye momapandaanda okuhololoa omadhiladhilo gawo ye li ompinge naPark. MEtitano, oshizemo osha li sha kundwa kaakwashigwana omathele mboka ye li aayambidhidhi yaPark mboka ya li ya gongala pondje yompangu. Aahololimadhidhilo yamwe oya li ye li omutumba nayamwe ya li ya lala mopate taya lili, omanga yamwe ya li ya ningi oshigongi moka ya li taya pula opo a mangululwe.

“Elelo lyooveta moshilongo muka nena olya sa,” Han Geun-hyung, 27, ta ti. Park ye mwene ka li mo mompangu ndjoka ya li yu ulikwa pethimbo yi li metifa kooradio dhomuzizimbe. Okwa tindi iikando oyindji okuya kompangu ongomukalo gokupataneka ekaleko lye modholongo. Okwa li a tseyithilwa oshizemo she shomompangu pondjedhililo yomoSeoul, moka a li a kuutumba mosaala yokutaambula ko aatalelipo, a li a kuutumba nomukalelipo gwe gopaveta. Oshikundaneki sho Yonhap osho sha li sha lopota ngaaka. Ngashingeyi oku na omasiku ge li gaheyali moka ta vulu okuninga eindilo lyetalululo. Park okwa ningi omuleli omutitatu omukulu gwaSouth Korea ta monika ondjo miipotha yuungangala konima sho a thigi po ombelewa, yalwe ongaashi Chun doo-hwan na Roh Tae-woo, mboka ya li ya monika ondjo miipotha yokudhengela ondhi peho moomvula dho-90 nasha. Omupanguli Kim okwa ti okwa gandja etokolo lye lya yaga kegonga opo ku keelelwe iimbuluma yoludhi nduka konakuyiwa.

Egumbo lyepangelo olya li lya gandja etumwalaka ndika konima yoshizemo: “Kehe omuntu oku na omaiyuvo ge kombinga yaangoka a li omuplesdidente Park-Geun-hye. Ashike ombepo ondhigu oya li ya pepe momitima dhetu atuheni nena.”Oshiningwanima otashi teya omitima moshigwana osho wo monkalamwenyo yomuntu ngoka. Ondjokonona ndjoka itayi dhimbulukiwa otayi vulu oku i yendulula. Itatu dhimbwa esiku lyonena.”

Aayambidhidhi
yaLula taye mu tsu omayele a yande okukwatwa po

Ngoka a li nale omuplesidente gwaBrazil Luiz Inacio Lula da Silva ta minike aakwashigwana okuziilila mondholongo sho a li i igandja momake gopolisi opo a ye mondholongo uule woomvula 12 omolwa sho a li talungu ti itapula.

Ngoka a li nale omuplesidente gwaBrazil Luiz Inacio Lula da Silva, endangalati mopolitika yoshilongo shoka ye oku li wo omukomeho momahogololo gopauplesidente moBrazil taga ka kala ko muKotomba, okwa li a pewa oowili 24 opo i igandje momake gomiya dhaShinana ye a tameke okulongela egeelo lye lyoomvula 12 ndhoka a li a tentekwa shi na sha nokulunga ti itapula. Okwa li i igandja nokwa tameka okulongela egeelo lye ndyoka. Ashike aayambidhidhi ye mondoolopa moka a yambukile yedhina Sao Bernardo do Campo oya li taye mu pe omayele a tinde ekwatepo ndika.

Aayambidhidhi mbaka 2000 yOngundu Yaaniilonga (Workers’ Party) oya li taya ningi ekudhilo sho ya li ya thikama pondje yetungo lyaaniilonga mondingandinga yondoolopa onene yaSao Paolo, moka yamwe ya li ya gana oku mu keelela ka ye momake gopolisi. “Otu wete eyedhililo ndika lyaa li paveta.” Omukuluntukalelipo gwOngundu Yaaniilonga Lindbergh Farias ta ti ngaaka. “Omolwashike ya hala oku mu manga noku mu kwata po monkalo ya tya ngeyi? Ngele oya hala oku mu manga po noku mu fala mondholongo, na ye ye huka. Lula, 72, okwa li ta molola aayambidhidhi ye okuza pekende lyopombanda, ashike sigo omEtitano ka li a popya nande moshigwana.

Lula okwa li a monika ondjo omvula ya zi ko sho taku popiwa kutya okwa li a pewa omagumbo gopashinanena ge li komukunkulofuta ongombumbo, okwa li a kambadhala oku uvitha ko ompangu yopombanda mEtitatu yi mu pe emangululo ye a tsikile nokuninga omaindilo getalululo lyoshipotha, osho wo okuninga oshikonga shokukutha ombinga momahogololo. Ompangu oya li ye ekelehi eindilo ndyoka mEtine, shoka sha thigi Lula a kale a taalela ondholongo. Eyedhililo lya Lula otali ka patulula okapale kuundemikoli.

Ngashingeyi, Jair Bolsonaro, ngoka a li omunambelewa metanga lyegameno nokwa li omuyambidhidhi e li puuwayela gwepangelo lyuukayamukulwa lyo 1964-1985, oku li oye omutiyali a landula Lula momagololopulo ngoka ga ningwa moshigwana. Lula okwa li a lele okuza mo 2003-2011, noku li a hala oshikako oshititatu shuuplesidente momahogololo ngoka taga ka ningwa muKotomba. – AFP

LEAVE A REPLY

Please enter your comment!
Please enter your name here