Chiefs Santos okwa manga ndele inaa tumba owala

0
46

Shipi Elago
ONGWEDIVA

Onakuyiwa yoChief Santos moPremier League oyi li monkalo itayi nuwa omeya konima yuudhano wehulilo shiwike lyazako sho ya li ya pewa oodhimbo kuYoung Chiefs pUukwangula Olyomakaya ga za ko.
Chief Santos ngashingeyi oku li e na okamwenyo ta ka talwa pothingo nota shi ka pula iinyengandunge niikumithalonga opo a hupe ekuya lyoliha ndjika.

Chief Santos oku li a kuutumba pekota lyoliha yaMTC Namibia Premier League niitsa 16 konima yomaudhano 26 gomomaudhano 30.
Oosipana ndatu dhoka tadhi ka mana oliha ndjika dhi li pevi lyoliha ndjika odha tegelelwa opo dhi ka pewe olukaku nokushuna kooliha hoka dha yambukile.

Mokati koosipana dhoka dhi li pevi Chief Santos ota vulu owala okulapa ko oosipana mbali nando okwa pumbwa oku lapa ko oosipana dhi li ndatu opo andola a kale e li pehala etine okuza pevi lyositaafula.
Uudhano mboka wa hupa ko wu li une otawu vulu owala okupa Chief Santos iitsa 12 ngele okwe wu sindana po awuhe nota wu ke mu pa iitsa 28 okuya pehuulilo lyoliha, iitsa mbika 28 oyo nee yi niwe kosipana ndjoka yil i pehala etine lyahugunina pethimbo lyongashiingeyi ndyoka lya pumbiwa kuSantos opo a hupe.

Omukundu omutiyali ogo ngoka kutya nando Santos a thike pamwe nosipana ndjoka okwa pumbwa a tule mo ookoola dhakonda po 37 muule wuudhano we une wa hupako, noosipana adhihe ne dhoka dhi li pevi lyoliha nadhi kanithe uudhano wawo awuhe mboka wa hupa ko.
Oosipana mbali dhoka dhi li pombanda ye, Young Chiefs noCivics ngele odha sindana po omaudhano gawo ngoka ga landula ko nenge Pirates a dhana ashike shi thike pamwe nena Chief Santos ota ka gwa mo moliha ndjika nando ina thanga nando etanga limwe.
Chief Santos oku li ta dheulwa komudhani omukulu a tseyika nawa gwoBrave Warriors naangoka a li omudhani dhingi moKaizer Chiefs yaSouth Africa Mohammed Slice Auseb.

Young Chiefs oku li a yoga u uka koontuni nongele okwa kwata nawa uudhano we une mboka wa hupa ko nena ota ka hupa okakuya koliha oshoka oku na ngashiingeyi iitsa 27 nokwa kuutumba natango pehala etitatu lyahugunina nosipana ndjoka yi li pombanda ye yoCivics oyi na iitsa 28.

Orlando Pirates oyi na iitsa 29 omanga Eleven Arrows naye oku na iitsa 29, oosipana ndhika ngele inadhi ikwata nawa nena nadho otadhi ki iyadha dha gwila mokakololo koku gwa mo moliha.

Uudhano wa hugunina une woliha ndjika itawu vulu okupitilila po omuntu oshoka oosipana otadhi ningi sha namutango kesindano .

LEAVE A REPLY

Please enter your comment!
Please enter your name here