Etalolopo lyopapangelo lyaplesidente Hage Geingob koKiina

0
26

• Netumbo Nandi-Ndaitwah

Omuplesidente gwaNamibia okwa li a hiywa kuPlesidente gwaKiina, Xi Jinping, nokwa li a ningi etalelopo ndika lyopapangelo okuza momasiku 28 Maalitsa sigo 2 Apiilili 2018. Limwe lyomesimano lyetalelopo ndika lyopapangelo olyo ndyoka kutya Kiina, ngoka e li gumwe gomiilongo iinankondonkondo muuyuni, okwa li a gandja ompito kuNamibia e mu talele po konima yomutumbahogololo gongundu tayi pangele yoCommunist Party of China (CPC).

Omuplesidente Geingob okwa li a tambulwa ko pambelewa kumbushe miilonga, Xi Jinping mehala tali ithanwa Great Hall of the People moBeijing mo 29 Maalitsa 2018. Molweendo nduka, Plesidente Geingob okwa li a yi mo nomunyekadhi Monica Geingos, Netumbo Nandi-Ndaitwah ngoka e li Omupeviprima osho wo Ominista Yomakwatathano nElongelokumwe Lyopaigwana, Omundohotola Albert Kawana ngoka e li omukalelipo gopaveta gwepangelo, Ominista Yiilonga Niiyenditho John Mutorwa, Ominista yUunamapya, Omeya nOmakuti Alpheus !Naruseb, Ominista yIipindi nIikwafaabulika Tjekero Tweya, Ominista yEmona Calle Schlettwein, Omundohotola Ita Kandjii-Murangi ngoka e li Ominista yElongo Lyopombanda nOmadheulo, Ominista yokuninga Oondungethaneko dhopaliko Obeth Kandjoze. Molweendo omwa li wo mwa kwatelwa aagandjimayele yomuplesidente osho wo aanambelewa aakuluntu mepangelo.

Plesidente Geingob okwa li wo a yi moonkundathana dha yooloka naLi Zhanshu, omunashipundi goNational Congress Standing Committee(NPC), Omuprima Song Tao, Ominista yoshikondo Shopaigwana mongundu yoCommunist Party of China Central Committee (IDCPC), mboka ayehe ya koleke kutya otaya ka tula miilonga omatokolo ngoka ga tokolwa kaaplesidente ayehe yaali.
Etalelopo ndika lyopapangelo olya li lya tetekelwa komutumba omutitatu ngoka gwa konaakona omuthika ngoka gwa adhika kuNamibia naKiina ngele tashi ya komapingakanitho gopaipindi. Omupeviprima gwaNamibia nOminista yOmakwatathano nElongelokumwe Lyopaigwana, Netumbo Nandi-Ndaitwah, naFu Ziying ngoka oye omukalelipo gwaKiina momapingakanitho gopaipindi niilongo yilwe oya li oyo aanashipundi yokakomisi hoka ka li ka kuutumba. Okakomisi haka oka kolekulula elongelokumwe lyopaipindi pokati kiilongo mbika iyali.
Pethimbo lyetalelopo ndika, aaleli mbaka yaali oya ulika enyanyu lyawo ngele tashi ya komuthika gokupindika pokati kiilongo mbika iyali ngoka tagu kolo esiku kehe. Taya dhenge wo omuthindo kutya ope na ompumbwe opo ku nenepalekwe nokuyelula ekwatathano ndika miikondo yimwepo. Iikondo mbika oya kwatela mo uunamapya, oohi, elongo nomadheulo, uungomba nuutekinika, uupashiyoni, ependulepo lyolutenda, omatuliloskepa, uupale woondhila osho wo oopate.

Omitse dhiilongo mbika iyali odha tokola wo okuyambula po elongelokumwe pokati kiilongo mbika iyali pankatu ompe yondungedhilaadhilo yomuule ndjoka tayi kala yi ikwatelela kuuthikepamwe, esimanekathano, uuwanawa tau tyapulwa koombinga adhihe mbali osho wo ehumokomeho pokati kiilongo mbika iyali.

Plesidente Geingob okwa li a kuthile ko mbushe miilonga kombinga yondungedhilaadhilothaneko yaNamibia yokukala oye shikwete po ngele tashi ya komayakulo gomalweendo nokutaambathana kwiipindi moSADC, mushika omuplesidente gwaKiina okwa kolekulula kutya ota ka kwathela Namibia. Kombinga yimwe oya li ya kundathana nkene Namibia e na ompumbwe yokutamununa nokukokitha eliko lye pamukalo gokutuma iilikolomwa ye pondje yoshilongo, omanga kombinga yimwe ya kundathana nkene Kiina, ngoka e na eliko etiyali muunene muuyuni ta kwathele mokupindika iilikolomwa ya pwa nale okuongoshwa tayi zi moNamibia, osho wo okugandja uunongo nowino, eyambidhidho lyopautekenika osho wo eyambidhidho lyopashimaliwa. Namibia ota ka likola mo oshindji melongelokumwe lyopashimaliwa ndyoka lya ligamena koku andjaganeka iikwafaabulika, etanununo lyopaliko, uunamapya osho wo egandjo lyuunongo wopautekenika. Kiina ota nu mo wo mokambundju kaNamibia oshoka ota vulu okupitila moshilongo shika oku ya kiilongo yilwe pamukalo gwiipindi, unene tuu iilongo yi li moongongahangano dhoSACU, SADC, Africa nosho tuu.

Opo ku yambidhidhwe elongelokumwe lyopaigwana osho wo ehwahwameko lyelongelokumwe pokati kaKiina naAfrica nelongelokumwe pokati kiitopolwa yuumbugantu nuumbangalantu muuyuni, aaleli mbaka yaali oya tsu kumwe opo ya longithe omikalo tadhi kwatele mo iilongo yilwe, osho wo okukaleka po ongushu nokugamena uuthemba wiilongo opo tayi putuka. Taya uvathana ishewe ya kale ye na omakwatathano ngele tashi ya kiiningwanima iinene ngaashi omalunduluko mewangandjo nonkalo yombepo, okudhenga po iiningwanima yuukulo niimbuluma ya longekidhwa.

Ngele tashi ya keuvathanotsokumwe pokati kaAfrica naKiina (FOCAC), aaleli mbaka yaali oya ti otaya ka longa neitulemo opo ya pule komeho neuvathanotsokumwe ndika nokutula miilonga iizemo mbyoka ya li ya valwa komutumba ngoka gwa li moJohannesburg. Omuplesidente Xi Jinping okwa hiya omuplesidente Hage Geingob komutumba gwa landula ko goFOCAC ngoka tagu ka kala ko muSepetemba 2018 moBeijing. Plesidente okwa taambula ko ehiyo ndika.

Plesidente Geingob ta hiya wo mbushe miilonga nguka opo a talele po Namibia pethimbo lyo opala li li komeho pamukalo gopaudiplomate, Plesidente Xi Jinping ina ongaonga nokwa taambula ko wo ehiyo ndika.

Omuplesidente Geingob okwa li wo a talele po Nainjing, Suzhou naShanghai. Omahala agehe ngaka oga simana ngele tashi ya kelongelokumwe lyopaliko kuNamibia, naanangeshefa aaNAmibia oye na omakwatathano gopangeshefa momahala ngoka gatatu. Omuplesidente okwa li a talele po yamwe yomaanangeshefa osho wo okwa li i inika komilungu naaleli yepangelo yomiitopolwa mbika itatu. Ayehe oya li yu ulike ehalo lyawo okukwatela komeho elongelokumwe pokati kaanangeshefa aaNamibia naanangeshefa aaKiina.
Omundohotola Geingob okwa li a pewa onzapo ndjoka yi li oshishani shesimano yuundohotola koChina Geoscience University moBeijing. Omunyekadhi Monica Geingos okwa li wo a pewa onzapo yopombanda ndjoka yetumbaleko yuuplofesa koChina Women’s University. Oye omukwiilongo gotango a pewa onzapo yoludhi nduka muule woomvula 70 dhethikamepo lyoshiputudhilo shika. Oshiputudhilo shika osha li sha lukululwa mokutumbaleka ongongahangano yaakiintu ndjoka ya li moBeijing momumvo 1994.

Metalelopo ndika lyopapangelo, omauvathanotsokumwe taga landula mpaka oga li ga shainwa pokati kaNamibia naKiina:
Etamununo lyeuvathanotsokumwe ndyoka li li pokati kaNamibia naKiina opo ku totwe nokulongithwe osasiona yokushiilila ewangandjo nokugandja omalombwelo moNamibia ndjoka ya li ya shainwa komundohotola Itah Kandjii-Murangi, ngoka e li Ominista yElongo Lyopombanda, Omadheulo nOmananenapeko. Moka oshitopolwa shimwe shosasiona tashi kala tashi tambula uuyelele moNamibia. Nokuli aaNamibia oye li taya mono omadheulo guunongononi womewangandjo posasiona yokugandja omalombwelo. Onkene etamunununo lyeuvathanotsokumwe ndika otali ti aaNamibia oyendji otaya ka mona omadheulo muunongononi wewangandjo naaNamibia otaya vulu okudhana onkandangala meyambulepo lyewangandjo ndyoka tali ka kwathela aantu ayehe. Namibia ota ka andjagakaneka wo omayakulo ge gokuninga omapekaapeko miitopolwa yokuushayi nokumona uuyelele wa simana uuna osasiona yokutaamba omauyelele ya thikamekwa po. Nontseyo ndjika, Namibia ota vulu oku ka ungaunga nefuta lye, okuhwepopaleka omikalo dhokulonga niikumungu, okuninga omathaneko omawanawa moondoolopa nokutalela omudhingoloko gwe.

Omukanda gweuvathano kombinga yomukalo gwelongelokumwe pokati kombaanga yaKiina yomapingakanitho gopaipindi (Import-Export Bank of China) nUuministeli wEmona waNamibia, gwa shainwa kOminista yEmona Calle Schlettwein. Euvathano ndika olya kwatela mo egandjo lyiipumbiwa pamukalo goku iyamba, osho wo omikuli dhi na iihohela yi li pevi, omauvathano kombinga yomukalo gwiifuta yokomimvo. Ekwathelo lyopashimaliwa taku iyambwa nenge pamikuli otali ka ninga shi ikwatelela kondandalunde yopoloyeka kehe tayi ka ndulukwa po. Omukuli kehe otagu ka kala tagu pangelwa koompango nooveta ndhoka tadhi ka kwatela mo enkondopaleko lyontumba, egandjo lyuunongo nuutekenika osho wo oompango dhokumona omikuli ndhika opo ku kwashilipalekwe kutya iilongo ayihe otayi ka tyapula uuwanawa. Ashike ngashingeyi inaku shainwa nando omukuli gontumba. Omakwatathano kombinga yoshimaliwa pokati kaNamibia naKiina otaga kala taga ningwa poompito noompito.

Omukalo moka Uuministeli wUunamapya, Omeya nOmakuti waNamibia osho wo oshikondo shokutalela ongushu nuuyogoki (General Administration of Quality Supervision and Quarantine of the People’s Republic of China) otaya tala omikalo dhokutalela opo onyama yaNamibia yi tumwe koKiina. Omikalo ndhika odha li dha shainwa kuAlpheus !NAruseb, ngoka oye e li Ominista yUunamapya, Omeya nOmakuti. Kohi yewiliko lyomikalo ndhika, onyama yaNamibia otayi ka manguluka okuhita momangeshefelo gaKiina naNamibia ota ka kala oshilongo shotango shaAfrica shoka tashi ka tuma onyama yasho muKiina. Shika otashi ka pula aanafaalama aaNAmibia ye ete po omikalo omipe yo taya indjipaleke onyama ndjoka oshoka oshitopolwa shimwe shaKiina ohashi vulu okukala naantu ye thike poomiliona 20-80.
Egwedheleko lyethimbo lyokufuta omukuli gomagumbo gwaa na iishoshela meuvathano li na sha neliko osho wo ekwatathano lyopautekenika pokati komapangelo ngaka gaali, olya tsuwa opena kuCalle Schlletwein.

Euvathano lyopaliko nekwatathano lyopautekenika lyoshimaliwa shoomiliona(dhaKiina) RMB 300, lya li lya shainwa kuMinista Obeth Kandjoze. Euvathano ndika olya nuninwa okumbelewapaleka opoloyeka yimwe ndjoka yi li nale metifa. Onkene oshimaliwa shika oshi li oshitopolwa sheuvathano lyokunduluka po osasiona yepangelo yokutaamba omauyelele, oosikola 4, osho woo oopoloyeka dhimwe ndhoka tadhi ka uvathanwa.
Mosheendo she, Omuplesidente Geingob okwa li wo e na mo aanangeshefa 70, mboka ya li ye li mewiliko yOngongahangano yAanangeshefa aaNamibia (NCCI), mboka ya li ya longitha oshimaliwa shawo yene momukokomoko golweendo nduka. Aanangeshefa aaNamibia oya li ya kalela po iikondo yuunamapya noohi, iikwamina nepingakanitho lyoonzo, iikwankondo, etakamitho nelelo lyuupale woondhila, uupashiyoni, omayakulo gopaunamiti, iilongitho yomoolabola, okuhondja, iizalomwa, uungomba nokupangela, omagumbo, nosho tuu.
Pethimbo ndika lyetalelopo lyopapangelo, opwa li wo pwa ningwa omitumba dhomangeshefelo dhi li ndatu, mbali odha li moBeijing, nayimwe oya li moShanghai. Omitumba ndhika odha li dha unganekwa kOmbelewa yOmukalelipo gwaNamibia koKiina, Uuministeli Wiikwafaabulika, Iipindi nEyambulepo Lyoongeshefa Oonshona, osho wo NCCI ndjoka ya li yi imanga kumwe naayambidhidhi aaKiina. Omitumba ndika odha li dha gandja ompito yokuninga omakwatathano gopamangeshefelo pokati kaanangeshefa aaNamibia naanangeshefa aaKiina. MoShanghai, Plesidente Geingob okwa li a popitha aanangeshefa ayehe, moka mwa li aanangeshefa aaKiina ye vule po 300.
Aanangeshefa mboka ya li molweendo muka oya li wo ya holola euvonawa lyawo lyetalelopo lyokoKiina.
Omikanda dhomauvathanotsokumwe pokati koNCCI naanangeshefa Aakiina odha li dha shainwa pethimbo lyetalelopo lyopapangelo:
Omukandauvathanotsokumwe pokati koNCCI nEhangano lyIipindi moShanghai; Omukandauvathanotsokumwe gwelongelokumwe pokati kaNCCI naTouchroad International Holdings Group; Omukandauvathanotsokumwe pokati kEhangano lyIipindi moKiina noNCCI nelalakano lyoku eta po ekwatathano pokati komahangano ngaka gaali ga kwathele meyambulepo lyekwatathano lyiipindi, eliko osho wo omangeshefelo pokati kaNamibia naShanghai; oshowo Omukandauvathanotsokumwe pokati koNCCI nEhangano lyOmatungo gOopate nOontopa moBeijing.
Etalelopo ndika lyopapangelo olya li lyomupondo notali nkondopaleke omakwatathano ngoka ge li po miikondo oyindji ngaashi eyambulepo lyomatungilo, uunamapya, emona, elongo osho wo iikondo yilwe oyindji. Elelopangelo lyomundohotola Geingob olya patulula omiyelo. Kape na omalimbililo Kiina oku na eliko tali koko tali endelele nakasiku ota ka kala oye shikwete po muuyuni. Omangeshefelo gaKiina oge li ogo kadhenga ngele oto tala kutya omu na aantu ye li obiliona 1.4. Onkene uuyuni auhe, mwa kwatelwa niilongo mbyoka opo tayi putuka, oya ligamena kuKiina ngele tashi ya komangeshefelo. Onkene Namibia oku na okukotoka opo kaa thigwe monima. Iizemo yetalelopo ndika oyi li omutengi gwa tsikwa komapepe gaadhaninkandangala ayehe opo ku kwashilipalekwe kutya aaNamibia ayehe otaya ka tyapula omauwanawa ngaka. Mekwatathano lyopaigwana, kape na oshilongo tashi yi momauvathanotshokumwe gopaipindi ngele itashi mono mo uuwanawa washa. Onkene, ompito yaNamibia oya li ya holoka, notwa longitha ondungedhilaadhilo tu inike komilungu shi na sha nomakwatathano gopaigwana, moka tatu kongo iiyimati mbyoka iiwanawa kaantu yetu.
• Meme Netumbo Nandi-Ndaitwah oye Omupilima gwoPevi gwaNamibia, noshowo Ominista yIikwapondje yOshilongo.

LEAVE A REPLY

Please enter your comment!
Please enter your name here