Geingob a ti okulunga nokwiitapula na ku se

0
39

Desie Heita
OVENDUKA

Namibia okwi itula mo omutse nothingo ngele tashi ya kokukondjitha okulunga nokwiitapula, shika otashi ulikwa komuyalu gwiipotha yuulingilingi nootendela moshilongo momumvo 2017, omuplesidente Hage Geingob ta ti ngaaka pethimbo lyolopota yonkalo yoshigwana.

Omumvo twa zi, Okakomisi ke li Ompinge nUulingilingi kedhina Anti Corruption Commission (ACC) oka li ka ningi omakonaakono ge li 60 ge na sha nuulingilingi nomapeko agehe ngaka oga li ga gandjwa kOmbelewa Yomutamanekindjayi Martha Imalwa, opo ku ningwe omatamaneko. Kombinga yootendela dhepangelo, Geingob okwa totha mo kutya ope na aantu yamwe mboka haya nwetha mo oshizemo shootendela opo yi iyambapaleke. Ngashingeyi ope na iipotha 11 mbyoka ya li ya ningilwa omakonaakono, noshipotha shimwe oshi li momake gompangu ngashingeyi.

“Ope na omaiyuvo moka epangelo lya talelwa montalelo yokutya itali ningi sha ngele tashi ya kokukondjitha uulingilingi, shoka olundji sha kwatelwa komeho kiikundaneki, nonando pe na iipotha yomwaalu gontumba moka omatokolo ngoka taga ulike ehalo lyepangelo mokukandula po onkalo yuulingilingi,” Geingob ta ti ngaaka sho a li ta gandja Oshipopiwa shOshilongo shokOmvula mOmutumba gwOpashigwana.

Oshipopiwa shika shokugandja onkalo yoshigwana ohashi ningwa omumvo kehe, ngaashi shi li shu uthwa kekotampango lyoshilongo shetu, opo omuplesidente gwaNamibia a longithe ompito ndjoka okugandja uuyelele koshigwana kutya iilongadhalwa yini ya li ya longwa po momukokomoko gomumvo gwa yi, ye ta pulwa wo omapulo kiilyo yomutumba gopashigwna.

Geingob okwa li wo a nyenyeta kutya nonando ye nomukulukadhi gwe oya li ya gandja olopota yomaliko gawo moshigwana, onkee natango ye li taya li taya pi komalundilo ga nika uulingilingi nokukala a talika omeho gontsa. Omuplesidente ta ti ye ota tsikile nokuyamukula komalundilo ngaka opo a yelithile aakwashigwana kutya ye ita holeke sha. Ta lombwele wo oominista ndhoka tadhi iyadha dhi li montsi yomafinyaafinyo guulingilingi dhi yamukule. Ta totha mo kutya okwa kutha oominista dhimwe kuuministeli hoka dha li muFebuluali omolwa omafekelo guulingilingi nokwa li a pula oominista ndhoka dhi fatulule pamukalo gokushanga omikanda shi na sha nomafekelo ngaka guulingilingi.

Metyofululo lyoominista lya hugunina muFebuluali, Plesidente Geingob okwa li a lundulula Sakeus Shanghala okuza kOmbelewa yOmukalelipo gwOpaveta gwEpangelo noku mu fala kUuministeli wUuyuuki, Obeth Kandjoze okuza kUuministeli wIikwamina nOonkondo okuya kOkomisi Yokuninga Omathaneko, naAlpheus !Naruseb okuza kUuministeli wIilonga nIiyenditho okuya kUuministeli wUunafaalama. Oominista ndhoka, osho wo Ominista yUundjolowele Omundohotola Bernard Haufiku oya li taya fekelwa taya longitha oombelewa dhawo pambambo. Nonande ongawo, Bernard Haufiku ka li i inyengithwa nando okuza kuuministeli wuuhaku.

“Onda ulike kutya onda hala okukandula po omapopyo gomafekelo guulingilingi sho nda pula oominista dhi yamukule komafekelo ngoka taya ningilwa petameko lyo 2018. Shika itashi ti oominista ndhika odhi na ondjo mokulonga uulingilingi. Etompelo lyandje olya li lyoku ya pa ompito opo ya yamukule,” Geingob ta ti ngaaka ohela.

Omapopyo ngaka Geingob okwa li e ga popi pethimbo iikundaneki muuyuni ya li ya lopota kutya aakonaakoni yopolisi moFrance otaya konaakona omapopyo kutya Geingob okwa li a pewa oshimaliwa shoomiliona odhindji koAreva, ehangano lyepangelo lya France ndyoka lya li lya landa po omina youranium yedhina UraMin moNamibia. Taku popiwa kutya Areva okwa li a futu Geingob iifuta komwedhi yi vule poo N$100 000 (US$ 0,000) pokati komumvo 2008 no2009, sho a li ominista yiipindi, mpoka taku popiwa aniwa a li a pe Areva omauwanawa gamwe ga gwedhwa po, omanga oomina dhilwe moshilongo inaadhi matha omauwanawa ga tya ngaaka. Momasiku 29 Maalitsa, ngoka a li nale omukuluntu gwaAreva Sebastien de Montessus okwa li a tamanekelwa oshipotha shegandjo lyoombumbo, oshikundaneki shepangelo sho AFP tashi lopota.

Moshiwike shika, Geingob okwa li a lombwele iilyo yomutumba gopashigwana kutya ye okwa li ashike a longo onga omugandjimayele koUraMin, ndjoka ya li ya landitha po omina kuAreva, nethimbo ndyoka okwa li oshilyo shaa na oonkondo dhasha momutumba gopashigwana, omanga ina ka ulikwa kuPlesidente Hifikepunye Pohamba ongaMinista gwIipindi. Ta ti ethimbo ndyoka opo ashike a li a galuka koAmerica hoka a li a ya pethimbo sho a li a tsuwa iilyaalyaka miilonga onga Omuprimaminista.

“Onda li nda futwa oshimaliwa shi thike po US$300 000 (shoka ngashingeyi shi na ongushu yoomiliona N$3.7) okuza koUramin sho nda kwathele UraMin a mone omukanda guuthemba womina. Iimaliwa onde yi topola naaSouth Africa yaali mboka nda longa nayo. Iinima ayihe onda li nde yi popi megumbo lyomutumba gopashigwana moka nda li oshilyo shaa na oonkondo,” ta ti ngaaka.

“Iimaliwa yandje onde yi likola moomvula dha ka dhilongela. Iimaliwa yandje onde yi longela ngame mwene, sho osho wu wete nda longa ongomugandjimayele. Kandi na mo onyala muulingilingi wa longwa koEuropa,” ta tsikile.

Plesidente Geingob ta ti sho a ulikwa a ninge Ominista yIipindi mo 2008, etotepo lyombaanga yaanangeshefa aashona (SME Bank) olya li nale lya puma ko. Onkene, ita vulu okupewa ombedhi muulingilingi woomiliona N$ 200 ndhoka SME Bank a kanithila momangeshefelo inaaga yela koSouth Africa. “Itapu vulu okukuthilwa nando ogumwe onkatu manga, oshoka ope na iiningwanima yimwe yi li mompangu yi na sha nembangoloto lyombaanga,” ta ti ngaaka nokutsikila ko kutya ita gamene nando oye omuntu ngoka e na mo onyala menenopo lyiimaliwa yo-SME Bank.

Geingob ta indile wo aaNamibia ayehe ya longe okuhulitha po omikalo dhuulingilingi mokulopota kehe shoka ye shi. “Ngele otatu ka sindana olugodhi nduka luulingilingi, nena atuheni natu topolelathaneni oshinakugwanithwa shokufudhila okahiya. Onkene aakwashigwana otaya indilwa ya lopote uulingilingi.” Ta ti ngaaka.

LEAVE A REPLY

Please enter your comment!
Please enter your name here