Natu imbeni oongalo tadhi hokitha-Gallo 7

0
28

Pinehas Nakaziko
OVENDUKA

Omwiimbi goongalo dhoAfro Pop, Gospel noKwaito,  Kandye Silas a tseyika nawa nedhina moongalo Gallo 7 okwa kunkilile aahikingalo ooyakwawo opo ya imbe oondjimbo dhawo tadhi hokitha, dho tadhi tungu.

Gallo 7 oku li gumwepo gwomaahikingalo dhingi mboka ye li ye shi gamena monooli, noku li ha ningile nokwiimba omaimbilo ge okuziilila moshitopolwa Ohangwena, muHelao Nafidi.

Gallo 7 ekunkililo ndika okwa li e li popi oshiwike shika pethimbo a li ta ilongekidhile oku eta po oalbuma ye ontiyali, ndjoka kwa tengenekwa yi ka pite pehulilo lyomvula ndjika ngele ayihe oya ende nawa. Gallo 7 okwa ti omaimbilo ogendji oga pwa nale, ashike oku li natango a tula ombunda moshihwa opo a kale a eta po oongalo ndhoka dhi na omulyo omutoye notadhi tungu.

“Oongalo dhandje okutunga oshigwana nodhi na etumwalaka lyu uka kaagundjuka naakuluntu, kombinga yiinima ayihe mbyoka hayi holoka konyala esiku kehe,” Gallo 7 ta ti ngaaka.

Okwa ti ye ina pititha natango okangalo okape, oshoka okwa hala manga okumana okukwatitha omaimbilo agehe ngoka ga gwana oku eta po oalbuma ya igwana po. “Otandi ka pititha ashike okangalo kamwe ngele nda mana omaimbilo agehe, onga ehwahwameko lyoongalo ndhoka tadhi ka adhika moalbuma, ngame ndi pe mo kashona aasapoti yandje,” Gallo 7 ta ti.

Okwa ti ngashingeyi oku li e na omaimbilo dhingi ngaashi Nghee Wayile moka ta kwathelwa kuJomolizo, nongalo otayi popi kombinga yomuholike gwe ngoka a li a hombola nkene a yile, ashike ine mu galukila we, ye oku li e mu yuulukwa noonkondo.
Ongalo onkwawo oondjoka yopambepo, yedhina Ondjila, notayi popi kombinga yohole yaKalunga.

Gallo 7 oku li a shainwa kehangano lyomwiimbi goongalo dhoKwaito Kavax, lyedhina Lamafo Entertainment uule woomvula dhi li ne (4). Oomvula dha piti okwa kala noku imba noku nyanyudha konyala moshilongo ashihe ngaashi moondolopa dhaGobabis, Helao Nafidi, Eenhana, Tsumeb, Rundu nomoshilando.

Oongalo okwa li e dhi tameke mo 2007, pethimbo a li ashike ta kwathele momaimbilo ngaashi gaPablo naahikingalo ya yoolokathana. “Petameko kakwa li oshipu, nonkalo okwa li tayi nyengana noonkondo oshoka kapwa li oshimaliwa shokutamekitha okwiimba nokukwatiha omaimbilo gandje,” Gallo 7 ta ti ngaaka.

Mo 2008 opo a li a tameke oku eta po omaimbilo ge, nekwatho okuza mpaka naampeyaka. Okwa li a eta po ongalo ye yotango yedhina Mkwanangobe, ndjoka a li a imbila meme gwe. Ongalo oyo tuu ndjika okwa li ya kwatelwa moalbuma ye yotango yedhina Money, Power, Respect, ya li yi na ehwata lyoongalo 15, ndhoka dha dhindwa nawa. Moalbuma muka omwa li ishewe ongalo ndjoka yedhina Darling, ya li ya hokiwa koyendji noya li yi inyenge nawa kooradio dhomoshilongo odhindjji. Oku li ishewe a thanekitha okavidio kongalo ye Tate.

Nuumvo Gallo 7 okwa hala oku ala oongalo dhe pondje yoshilongo, nokwa hala oku imba pamwe naahikingalo yopondje yiilongo, naaningi yomikwelengendjo ngaashi Mabolisa naRun Town. Okwa notheleko aaholi yoongalo dhe opo ya kankame noku tegelela shoka te ya etele po methimbo efupi lela.

LEAVE A REPLY

Please enter your comment!
Please enter your name here