Ombelewa yoshikandjo shaNandova ya egululwa pambelewa

0
47

Maria Namupala
OKAKWA

Omukwaniilwa goshitunda shUukwanyama Martha Mwadinomho yaKristian Nelumbu, okwa patulula pambelewa ombelewa yoshikandjo shaNandova Olyomakaya, sha ningilwa pomukunda Okakwa.

Oshikandjo shaNandova osho oshitiyali melelo lyopamuthigululwakalo lyUukwanyama tali tungu ombelewa yi li pamuthika goshinanena, konima sho yotango ya li ya tungwa koshikandjo shEudaneko shi li mewiliko lyaGeorge Nelulu.

Mepopitho lye Omunyekadhi Mwadinomho okwa pula aanamukunda ya longele kumwe naaleli yopamuthigululwakalo, yo ya kandule po omikundu uuna dha holoka pokati kawo, yo taya kala aluhe ye na ombili nohole yuumwayinathana.

Ta ti naya kale nokugandja omathaneko, yo ya longe ngaashi tashi vulika okukwashilipaleka kutya iikandjo oya tunga oombelewa dhi li pamuthika gopashinanena, yo ya kale taya pewa omayakulo ngoka ya pumbwa okuza kaaleli yopamuthigululwakalo yoondondo dha yooloka.
Okwa kunkilile yamwe yomooyene yomikunda ya hulithe po edhengelo lyondhi peho, yo yi iyageke okuthindila aakwashigwana yawo kongudhi, yo ya hanganithe aakwashigwana ya kale muukumwe yo taya yanda okushunitha pevi iimbuluma moshilongo.

“Otwa pumbwa okuhulitha po omukalo gokugongalela nenge gokugandja omayakulo kohi yomiti, unene mokutala onkalo yoshilongo shetu, unene woo ngaashi pethimbo lyomvula, sho kashi na egameno lyasha, iigongi yimwe ohayi kalekwa pethimbo lyomuloka naashoka osha konekwa tashi yi iilonga yelelo lyopamuthigululwakalo moshipala,” ta gwedha po ngaaka.

Elenga enene moshikandjo shoka Elias Waandja okwa yelitha kutya melelo lyopamuthigululwakalo gUukwanyama omu na iikandjo yi li 11, moka oshikandjo shawo shi na omikunda 33.

Waandaja okwa holola kutya oya kala haya gandja omayakulo kohi yomuti, shoka ya li yu uvu kelombwelo lyomunyekadhi sho a li a tseyitha kutya naku tungwe oombelewa dhi li pamuthika opo aantu kaaya yakulile we oshigwana kohi yomiti.

“Otwa pondola okuthikamitha po ombelewa yetu melongelokumwe noshigwana shetu, otwa longekidha iinyangadhalwa ya yooloka, negumbo kehe olya li lyi iyamba okugandja oshimaliwa shoka she eta opo tu sindane mwaashihe shoka twa li tatu lalakanene, sho osho mu wete twa gongala nena mpaka okutyapula iilongapondoli yetu,” Waandja ta ti.

Waandja ta ti oya li ya gongele oshimaliwa tashi ihilile poN$ 300 000, moka elenga enene lya gandja oshimaliwa shooN$185 000, sho a landitha yimwe yomiimuna ye nokugandja oshipambu shomeliko lye shi thikamithe po ombelewa, noye unene a dhana onkandangala methikamithepo lyombelewa yawo.

Ta ti etungo lyombelewa yawo olya tamekele pehulilo lyo2016, nolya pu okutungwa omumvo gwa zi ko natango pehulilo, ta ti otaya gandja omayakulo agehe ngoka haga gandjwa komalelo gopamithigululwakalo, ngaashi okugandja iifuta nenge iifendela yomagumbo nuundingosho, tapu kala tapu ningilwa oompangu dhopamuthigululwakalo ngaashi shi li paveta yomithigululwakalo moshilongo ashihe.

Esiku ndyoka opwa li pwa gongelwa oshimaliwa okulanda iipundi niipumbiwa yilwe mombelewa, molwaashoka oya pumbwa iipundi, iitaafula, ookomputa na yilwe mbyoka tayi kala tayi yakulithwa.

…Omunyekadhi goshitunda shAakwanyama ta popitha aakwashigwana pOkakwa pethimbo lyeegululo lyombelewa, omanga yalwe ya tala ko.

LEAVE A REPLY

Please enter your comment!
Please enter your name here