Omikalo dhaatali yomaudhano monooli dha dhenga Young Chiefs pomutima

0
150

Shipi Elago
ONGWEDIVA

Onkalo yomatukano nomalaka ga honga ngoka ge li ga lunda mokati kaayambidhidhi naatali yokatanga monooli otayi hokololwa kutya oyo yimwe yomiinima ya dhenga Young Chiefs pomutima muule woshikako shomaudhano ngoka ya dhanena megumbo.

Nicky Kapuka,ngoka e li omupehadheuli goYoung Chiefs okwa li e dhi mbothola mo Olyomakaya ya za ko pUukwangula konima yuudhano wawo noChief Santos yaShomeya.

Nicky ngoka a li ta monika u uvite nayi nando Young Chiefs okwa li a mono esindano, okwa li a holola kutya omakana gaayambidhidhi yomOshakati oga udha iitya inayi wapala nolundji ngele Young Chiefs ta dhana e li megumbo aadhani ohaya kala taya si omatukano okuza kokahiya kotango sigo okahugunina.

“Inandi shi mona nale nando omuntu ta tuku aadhani yosipana ndjoka ha yambidhidha nando omudhani a kale ta dhana nayi ashike mOshakati oshi li sha ninga omuthigululwakalo, ngele omudhani ota dhana nayi siku ndyoka nena oku na okuya kegumbo nokashako ka udha omatukano nomalaka ga honga,” Nicky Kapuka ta ti neyeme.

Okwa ti Young Chiefs okwa li e na ompito yokusindana omaudhano gomegumbo oshoka oosipana odhindji omo hadhi ilikolele iitsa oyindji oshoka oha dhi dhana nomukumo ngoka hadhi pewa kaayambidhdhi yawo.

Okwa ti ashike ngele otashi ya poYoung Chiefs, nando aayambidhidhi ohaya holoka momuyalu ogundji, olundji oya li ya ndopa okutsa omukumo aamati nolundji omatukano nomalaka inaga opala ogo haga kala taga dhana onkandangala kehe esiku ku na uudhano naashika ohashi tula aadhani monkalo yuutile nengwangwano ndyoka lya li lya etele Young Chiefs, ngoka a li a mana nokuli olweetho lwotango aluhe ina makela wo tuu nando esindano megumbo komeho gaayambidhidhi ye mboka olundji haya holoka mengathithi.

Onkene ota indile aaholi yomaudhano opo ya ethe po okukala taya ula aadhani omalaka omawinayi yo ya yande omatukano oshoka otaga mbandameke aadhani noku ya thiminika ya ninge omapuko giigalala.

“Onge aaholi yomaudhano mwe ya okutala okatanga nane wo omu na oshinakugwanithwa shokukumika osipana noku ninga ekudhilo li li mondjila okuza tuu pokahiya kotango sigo opokahiya ka hugunina,” Nicky ta ti.
Esindano lyotango lyaYoung Chiefs megumbo olya li lya holoka Olyomakaya ga za ko pUukwangula konima sho ya li ya dhenge Chief Santos 2-0.

Nicky okwa ti aatali naya kale haye ya nombepo yomaudhano kokapale yo naya kale ye shi kutya monkalamwenyo yomaudhano omu na omasiku omawanawa nomawinayi, naashika oshi li oshitopolwa shomaudhano.

Young Chiefs oku na ko omaudhano ge li gane moka gaali gomuudhano mboka te ke ga dhanena megumbo omanga gaali te ga dhanene pondje, nongele okwa mona omasindano omawanawa ota vulu okuhupa okakuya koPremier League.

LEAVE A REPLY

Please enter your comment!
Please enter your name here