Omuplesidente gwaBotswana a yeleka oompango dhoshilongo she

0
49

Komutoolinkundana
WINDHOEK

Omuplesidente gwoshilongo shaBotswana omupe, Mokgweetsi Masisi osho okwa patana thiluthilu kutya Namibia noshilongo she oye na omanyenyeto ngele tashi ya poongamba dhiishiindalongo mbika iyali.

Masisi ndhika okwe dhi popi Omaandaha goshiwike shika sho a talele po oshilongo shika nokuya moonkundathana oofupi nomplesidente gwoshilongo Hage Geingob.

Okwa koleke komupresidente Geingob kutya kapu na nando oontamanana pokati kiilongo mbika yi li iyali na kapu na esiku pu ka kale oontamanana.

Shika okwe shi popi sho yamwe yomaaNamibia ya li ya yahwa ketanga lyegameno moshilongo moka sho ya li taya fekelwa kutya oya li taya yaha iinamwenyo mbyoka ya gamenwa kaashi li paveta.
Okwa ti kutya aakwashigwana ote ya londodha kutya ngele otaya kambadhala okuyaha iinamwenyo ya gamenwa otaya ka ungaungwa nayo koveta.

Masisi okwa yeleke kutya oshilongo she oshi na omusindalandu gwa yela gwokuyaha nokudhipaga mboka taya yaha iimuna yawo ya gamenwa.
“ Ngele aantu yeni oya taaguluka oongamba kaye na uuthemba , shoka kashis hi iilonga yetu, ihe ngele ya gumu iimuna yetu nena mpoka opu na ashike eso nomwenyo,” osho a yeleke ngaaka kee na malimbililo.

Ashike omuplesidente gwaNamibia naye woo okwa patana kutya ope na oontamana pokati kiilongo mbika iyali.
Methimbo olyo tuu ndyoka Masisi okwa li a lombwele omutse gwoshilongo kutya aaNamibia mboka ye li kokamba yoontauki moshilongo she kaye shi we ontauki ihe oye li ongaa aakwashigwana ye li mo kaashi li paveta.

Omuplesidente gwaBotswana ngoka e li mo ashike omasiku ge li omulongo mombelewa okwa ti kutya aaNamibia ye vulithe 880 oya tinda okugalukila kegumbo nonande epangelo olya li tali kambadhala oku ya galulila kegumbo.
Okwa hokololwa kutya aaNamibia oyendji oya li ya mbombolokotele koshilongo shoka pethimbo gumwe gomiilyo yopalamente a li a kambadhala okuhwahwameka aantu ya tete ko oshitopolwa shaZambezi shoka sha li shi shiwike nedhina Caprivi ethimbo ndyoka.

Masisi mOmaandaha okwa ti otaya kambadhala ngaashi taya vulu opo mboka ye li moshilongo shawo ya kale ya galukila komagumbo gawo muka moNamibia.

“Otatu ka landula shoka shi li mondjila opo mbaka ya galuke. Oshoka mbaka kaye shi aaBotswana ihe aaNamibia. Yo kaye shi we oontauki ihe aakwashigwana kaa yeli paveta,” osho a yeleke ngaaka.

Omupelesidente nguka okwa ti kehe oshilongo oshi na omikanda dhooveta ndhoka tadhi landulwa opo aantu mboka ye li moshilongo kasha shi shawo shaali paveta ye na okulongelwa, onkene otadhi kalandulwa.

Okwa ti kutya ngele omu na aakwashigwana yaBotswana mboka ye li moNamibia kasha li paveta nena okwi inekela Namibia naye woo ota longitha oompango nelandulathano oku ya shunitha koshilongo shawo.

LEAVE A REPLY

Please enter your comment!
Please enter your name here