Score a tyapula esiku lyomaudhano muuyuni

0
45

Shipi Elago
OSHAKATI

Omasiku ga-6 gaApilili oge li haga tyapulwa muuyuni awuhe ongesiku lyomapendulepo lyomaudhano nekalekepo lyombili muuyuni awuhe.
Esiku ndika olya li lya tyapulwa mOshakati Etitano lya za ko kehangano lyaScore ndyoka lya li lya gongele uunona wa za moosikola dhomOshakati noku u pa omaudhano ga yooloka.

Omunashipundi gwoScore mOshakati, Monika Josephine okwa ti uunona wa za moosikola ngaashi Erundu, Oshakati West Primary, nOshakati Primary owa li wa kutha ombinga momaudhano gokatanga komokambamba nosho wo okatanga kokoompadhi moka kehe osipana ya li yi na aamati naakadhona.

“Kakele kuudhano mbuka womokapale otwa li wo twa pe uunona mbuka omaudhano ngoka taga pula okudhilaadhila opo tu pe uunona oonkondo dhopauluwi opo ya kale ya nkondopaleka omadhilaadhilo gawo nuuna ya ki iyadha monkalo moka taya pumbwa okwiimangulula nomadhilaadhilo ye ke shi ninge neendelelo yo taya kutha omatokolo ge li mondjila,” Monika ta ti.
Okwa ti elelakano lyopoloyeka ndjika olyo okudheulila uunona iikwamaudhano, oku ya longa ya kale ye shi shoka tashi inyenge momidhingoloko dhawo noku ya pa ontseyo yopankalathano.

“Opoloyeka yetu oya kwatelwa komeho kaamati naakadhona aagundjuka mboka haya longo iilonga mbika pakwiiyamba noya mona omadhewo ga kwata miiti okukwathela nokuhwepopaleka oonkalamwenyo dhuunona uuNamibia,” Monika ta ti.
Okwa ti kehe omudhingoloko gwoScore moshilongo ogwa pumbwa gu kale gu na oosipana dhomaudhano moka aadhani mboka ya tegelelwa ya kale haya dhana omaludhi gomaudhano ga konda pugane.

Aadhani mboka haya kutha ombinga muudhano waScore oye na okukala ye li kohi yomimvo 17 nongele oya gwanitha omimvo 18 yamwe ohaya wayimine oKalaba yaScore omanga yamwe haya wayimine osipana yaayiyambi mboka ye li ehukamugongo lyokukala po kwaScore.
“Oosikola odhi li odho othithiya moka Score ha teke aadhani nodhi li hadhi dhana onkandangala mokukala po kwaScore wo, opoloyeka ndjika oyi li ya simana unene tuu sho hayi kaleke aanyasha yi ipyakidhila niikwamaudhano nohayi kaleke uunona omathele kokule nomapandaanda,” Monika ta tsikile.

Okwa ti oye na omasiku ngoka ga simana mokaliindeli kawo nomasiku ngaka ogo ngaashi, Esiku lyokanona okAfrika, Esiku lyoAIDS Muuyuni,omasiku ga-6 gaApilili, Esiku Lyemanguluko – 21 Maalitsa, nosho wo Esiku Lyohole.
Ta tsikile ko ta ti kakele kokutyapula esiku lyomapendulepo gwomaudhano muuyuni oye li wo taya ilongekidhile omaudhano ngoka taga ka kala koSouth Africa moka Namibia ta ka kalelwa po komidhingoloko dhaScore dhi li mbali ndhoka dhi li hadhi ningi iinyangadhalwa yomaudhano oyindji.

“Oosipana ndhoka tadhi ka kalela po Score Namiba koSouth Africa ohadhi hogololwa shi ikwatelela komwaalu gwiinyangadhalwa yomaudhano mbyoka ya ninga muule womukokomoko gwokaliindeli kaScore, onkene Oshakati Score otatu kambadhala opo tu kale tu na iinyangadhalwa oyindji opo tu mone ompito yoku ka kalela po oshilongo koSouth Afrika,” Monika ta kuthile ko Kundana.
Kuyele petameko lyomumvo nguka aadheuli yaScore oya li wo ya kala momadhewo ga kwata miiti ngoka ga li ga ningilwa kondoolopa yaMariental hoka ya li ya wayiminwa kosipana yoAdidas, ya kalelwa po kaantu ya za miilongo itano muuyuni.

LEAVE A REPLY

Please enter your comment!
Please enter your name here