Tu leni mo mokatungwa kaTsikitsiki a pitithe oalbum ye ontitatu

0
79

Shipi Elago
ONGWEDIVA

Johannes Uukongo, ngoka a tseyika nedhina lye lyokwiimba oongalo ‘Tsikitsiki’, oku li ta tsu nodhikwa opo a manithe oalbuma ye ontitatu molwompumbwe yoshimaliwa.

Omuhikingalo ngoka e li e na uulema noku li kokatemba oku li ta nana nondatu nokwa holola kutya okwa hala eyambidhidho opo ondjodhi ye yokupititha oalbuma ye ontitatu yi tse.

Tsikitsiki ngoka i ihokolola kutya oha dhana oongalo dhoAfro Pop ina shuna nando omutse miipeta molwa uulema mboka a lumba nawo ashike oku li ta mbwangula nota pula komeho noshitalenti she shoongalo konima sho a li a wayimine ofambilika yokunduluka oongalo mo 2015 moka a li a pititha oalumbuma ye yotango yedhina Under Correction.

“Ngame evi lyIimpungu onde li yambukile kOnamatanga noha ndi kala mOvenduka oshoka omo mu na omahala gaandjuka gwoku ambula iihikomwa notaga endele pamwe nethimbo, onkene otandi indile kehe ngoka ta vulu okukwathela ndje nokashona hoka e na opo ndi wape okupititha oalubuma yandje ontitatu ngame ndi shuwe oku pa mo aaNamibia mokatungwa kandje koongalo,”Tsikitsiki ta ti.
Uukongo ngoka ke na iilonga mbyoka tayi mu zile othilinga okwa ti okwa li a longo nuudhiginini mooalbuma dhe mbali dha za ko na ka li nando a mona eyambidhidho lyasha, ashike payife oku li a pumbwa eyambidhidho lyaaNamibia opo oalbuma ye yi ze momvugo.
“Ondi li nale nda hambudha iihikomwa yi li ihetatu mbyoka nda nunina moalbuma yandje ompe na ngele kakwega ina tse ye kathindi ina pundula oalbuma yandje otamu ke yi mona momapandaanda muule womasiku omashona ge li komeho,”Tsikitsiki ta tumbula.
Okwa ti iihikomwa ye oya nuninwa aantu ayehe, aanona naakuluntu, noyi na omayinyanyudho ga tsa kesipa.
Tsiki oku uvite kutya onge aahikingalo opo ta ye ya mondambo oye li ya taalelwa komashongo ogendji ngaashi iihikomwa yawo okumona ompito miitaasi yooRadio moshilongo, ashike ota kombo kombunda oshitaashi shOmulunga Radio shoka hashi dhana oongalo dhe nota indile wo iitaasi iikwawo opo yi kale hayi kambadhala okuyambula po oongalo dhaahikingalo mboka opo taye ya mondambo.
“Oalbuma yandje ontiyali onda li nde yi tula momapandaanda mo 2016 onkene ondi wete kutya opwa pita ethimbo nuule inandi tulilako aaholi yoongalo dhandje.” Tsikitsiki ta ti ngaaka.
Okwa ti moalbuma ye ontiyali okuhole mo okangalo kOnganda hoka taka dhimbulutha noku pa mboka ye li muuhwi kutya ngele ya longo sha pama na ya kale tuu haya dhimbulukwa kiihwa hoka ya yambukile, naahingi yoombetsa opo ya hinge nuukeka ya ka thikithe aantu komagumbo yo ya ka yakule aavali nomaluvalo gawo.
Johannes Uukongo okwa li a nana omeho gaKundana pethimbo a li ta nyanyudha pethigathano lyethamba dhingi mondoolopa yaKahao.
Mukweni mu uvila ta lika ino mu uvila ta li, onkene kwatheleni Tsikitsiki opo a humithe komeho oshitalenti she shoongalo.

LEAVE A REPLY

Please enter your comment!
Please enter your name here