Tuhafeni a kwafela okafikola oko ke li mbushaye

0
89

Tuulikki Abraham
ONAKATUMBE

Naftali Tuhafeni Haindongo, odalele yomomukunda Onakatumbe moshikandjohoololo Eenhana moshitopolwa Ohangwena, Olomakaya la dja ko, okwa li a kufa olweendo okuya komukunda oko a dalelwa noku ka tunga oshipeleki omo tamu kala hamu longelwa ounona ovo va kala hava longelwa koshi yomuti.

Oshikunino shounona eshi osha totwa po muMaalisa 2017, sha hovelele nounona ve li 17, oya lukilwa odalele yomomukunda Onakatumbe Naftali Tuhafeni Haindongo.

Okudja e shi oshikunino eshi sha totwa, ounona ova kala hava longelwa koshi yomuti tava lokwa kodula vo tava lafulwa komhepo.
Mbushe woTuhafeni Kindergarten, okwa ninga onghedabala okupopya nookaume kaye, ve mu yambidide, opo a fikamife po oshipeleki omo tamu kala hamu longelwa ounona.

“Olo olili ashike etameko, okutala eshi nda lukilwa mbushe ndele ounona ottava longelwa ashike koshi yomuti. Onda hovela ashike manga nakanini oko nda toola po shaashi inandi hala mbushange a wanifa odula ndele ounona ottava longelwa ashike koshi yomuti.” Haindongo osho a tumbula.

Okwa tumbula kutya osho sha longwa po mokufikamifa po oshipeleki osho, oshalongwa mevatelo lookaume kaHaindongo, ovo ve mu vatela kohandja oipeleki navamwe ova yandja oshimaliwa, oipundi younona, eepena noilongifwamambo nosho tuu.
Haindongo oku na eindilo koshiwana, opo shi va yambidide va ye komesho monakwiiwa va ka fikamife po lela ekuma la kola omo tamu dulu
okukalongelwa omapupi nomapupi tae ke ya.

Omulongi poTuhafeni Kindergarten Klaudia Nghuulili okwa pandula eshi mbushe woKinder e vatungila ongulu yoshipeleki omo tava longele. Nghuulili okwa tumbula kutya odula yoneudo ova hovela nounona ve li 14, ashike omwaalu wounona ohau ende tau hapupala okuya pokwenye.

“Ondi wete kutya paife ovakulunhu vahapu ohava kala ve lipyakidila noilonga yomomapya, navahapu ihava mono naana omhito yokufindikila ounona koKinda. Ashike pefimbo lokwenye, ovadali vahapu ohava tumu lela ounono opo veuye kofikola,” Nghuulili osho a ti.

Okwa tumbula kutya, naashi nee va mona etungo omo tamu longelwa ounona, okuwete kutya nasho oshimwe osho tashi ka nana ovadali va tume ounona vavo kofikola, shaashi itava longelwa vali koshi yomuti.

Matheus Kandjabanga oku li umwe womovadali, naye ota pandula mbushe waTuhafeni Kindergarten, opamwe nookaume kaye ovo ve mu yambidida mokufikamifa po etungo omo tamu dulu okulongelwa ounona vomomukunda Onakatumbe nomikunda dopoushiinda.

Kandjabanga okwa tumbula kutya voo onga ovadali, ova mona kutya ova ninga ehoololo li li mondjila mokulukila Naftali Tuhafeni Haindongo, oo e va tungila etungo omo tamu ongala ounona wavo.

Haindongo oku na etumwalaka la yukilila moshiwana ta ti ovakwashiwana nava tale momidingonoko davo opo va dule okuyandja omavatelo opo tashi pumbiwa.

“Inatu teeleleni ashike tu lukilweni ngaashi ame nda lukilwa oshikunino eshi, ndele tu taleni ovanhu ovo va pumbwa eyambidido momidingonoko detweni, tu taleni kutya ohatu va yambidida nomukalo watya ngahelipi.”

LEAVE A REPLY

Please enter your comment!
Please enter your name here