Geingob, nuuyuni ya thindikile nakusa Winnie-Madikizela Mandela

0
19

Komutoolinkundana

Ovenduka-Omuwiliki gwongundu tayi kondjele onkalonawa yaakwashigwana moAmerica Reverend Jesse Jackson ota ti ekondjelomannguluko li li ompinge nuuhupilo wokatongotongo nali tsikile moSouth Africa. Ta ti emanguluko lyopapolitika halyo ashike lya li elalakano lyokukutha ko epangelo okatongotongo. “Otwa li tu na okumanguluka tu adhe uuthikepamwe. Ngele okapale oka elekana noompango odhi shiwike kukehe gume oshowo omalalakano ga yela, nena iizemo ohayi kala ya yela,” ta ti ngawo mOmaandaha kongulohi.

Jackson, 76, okwa li ta popi konima yefumviko lya Winnie Madikizela-Mandela mehuliloshiwike lya za ko moSouth Africa.
Plesidente Hage Geingob, ngoka wo naye a li pefumviko ndika, okwa ti osha li ethimbo lyokulila nokutumbaleka onkalamwenyo yokanona okamvalele kaAfrica hoka ki ifupupike monkalamwenyo yako ayihe, ashike omolwa omatokolo ge, okwa ningi gumwe oshilyo sha simana mokukondjela emanguluko. “Okwa li omukulukadhi ngoka a li onga endhidhiliko lyaaluudhe okutinda ethindilokongudhi, okatongotongo kopalwaala, osho wo uukoloni,” Ta gwedha po ngaaka.

Nonande mwa kala omaudhigu mekondjelomanguluko, okwa zi mo a tanganana ye ta welima nehalo nohokwe yoku eta elunduluko moonkalamwenyo dhaamwayina,” Geingob ta ti. Madikizela_Mandela, 81, okwa li ependafule moku hulitha po epangelo lyokatongotongo, osho wo omukulukadhi [oya li ya hengana] gwomuplesidente gotango omuhogololwa paudemikoli moshilongo moka- Nelson Mandela. Okwa hulithile moJohannesburg iiwike yi li iyali konima yuuwehame uululu.

Omvula ya za ko, Geingob okwa li a tumbaleke Madikizela-Mandela noshishani, ashike omupya omunene ka li a vula oku shi taambula ko ye mwene. Madikizela okwa li a tumbalekwa noshishani tashi ithanwa Most Brilliant order of the Sun first class momasiku 26 Aguste 2015, ano mEsiku Lyomapendafule koHeroes Acre. “Onkene otandi hiyi aamwamemekadhona yandje mu ye koNamibia mu tambule ko oshishani shika opo tu mu tumbaleke ngaashi shu uka, “ osho a ti.

Geingob ta tsikile ishewe ta ti Madikizela-Mandela okwa thiga po etindi lyokulonga pwaa na ondjambi yasha, eiyitulemo osho wo omukumo. “Ongomugandji gwiiholelwa iiwanawa, ota thigi poo okapeko kuukwatya wa nkondopala, moka aanyasha yanakanena taya vulu okuteka mo opo oondjodhi dhawo dhi tse. Omundilo gwe otagu tsikile nokuminikila oonkalamwenyo dhetu, sho tatu tsikile nekondjolemanguluko lyetu etiyali-ndyoka lyokumanguluka paliko,” ta ti ngaaka.

LEAVE A REPLY

Please enter your comment!
Please enter your name here