Muni gwaNgwediva a teyagula po omatungo mOmatando

0
25

Victoria Kaapanda

ONGWEDIVA-Muni gwaNgwediva okwa teyagulapo egumbo mOmatando ongula yEtine omasiku 12 Apilili 2018 pethimbo lyotundi ontimugoyi yongula, moshikandjohogololo shaNgwediva. Muni gwaNgwediva okwa teyagulapo noku mbonyonapo thiluthilu omatungo ngoka ga li ge li pokupwa okutungwa. Omatungo ngoka oga li ge li gane, ano kehe etungo olya li lyi na oseti, okombitha, ondunda yokulula oshowo okandjugo. Taya teyagulapo wo okapeliki hoka ka li pooha dhomatungo.

Aayonenwa oyo Jonas Elia 25, Beatha Thomas 24, uunona wawo uyali, kamwe koomvula mbali, nokakwawo komvula yimwe noomwedhi heyali. Omatungo ngoka oya li ya tameke oku ga tunga omvula ya zi ko muAguste noya li ya longitha iimaliwa ya vule N$90 000.
Thomas, ta popi neyeme nomahodhi taga mbomboloka, okwa ti: “O ye tu tenteka pomutenya sho ya teyagulapo omatungo getu oshoka omo kwali twa inekela okuhupila opo wo tu vule okukwatha uunona wetu, oshoka elalakano lyokutunga olya li lyokuyapo noohila dhi tu pe oshimaliwa.”

Ta gwedhe po kutya yo ihaya longo noya kala yi inekela mokataxi kawo hoka ya kala haya longitha opo ke ya etele po oshimaliwa shoka ya li ya longitha okuthikamithapo omatungo ngoka. Ashike ngashiingeyi okataxi kawo oka teka noshimaliwa shokulongitha okataxi kawo kashi po.

Nonando ya kala nokupewa oombapila kumuni kutya mpoka taya tungu kapeshi pehala lyawo, opehala lyamuni no inaya pumbwa okutunga po, oya tsikile okutunga oshoka oya li ye wete kutya hayo ayeke ye na okukala ya za po. Ope na omagumbo gamwe pushiinda wawo ngoka ga tungwa po hugunina nokuli.

“Muni gwaNgwediva okwa popi kutya oye tu longitha ongoshiholelwa sha kehe ngoka a tunga pehala kali na kutungwa, yi imonene kwaashoka taye tu ningile,” Elia osho a popi ngaaka. Taya gwedha po wo kutya kehe shoka ya li ya longitha sho ya mbonyonapo omatungo ngoka oye na oku shi futa Muni ta lombwelwe oonakuyonenwa.

Oonakuyonenwa taya hokolele onzokundaneki yakundana kutya, osha li ongula yEtine sho ya mono ongundu yaamati ye li naMuni oshowo aapolisi taya konkola pegumbo lyawo noku ya lombwela kutya otaya ka teyagulapo omatungo gawo. Elia okwa li she mu uvitha nayi nokugeya kutya ye omatungo ge itaga teywa po naapolisi oya li ya hala oku mu fala kondjedhililo medhina ta keelele omatungo ge kaga teyagulwepo.

Oonakuyonenwa oye li ya yemata noonkondo kutya omolwashike oyo taya ningwa oshiholelwa shaamboka ya tunga pomahala gamuni, omolwaashoka yaa na iiyemo ya gwana okukwata oohahende nenge omolwashike? Taya popi neyeme kutya yo oya li taya kambadhala oku ihupitha oshoka ihaya longo ihe muni okwa hanagulapo shoka ya li taya kambadhala nasho.

LEAVE A REPLY

Please enter your comment!
Please enter your name here