Namibia: ootundi dhokutonatela omeya miilongo mbyoka yaa na omuloka nawa muAfrica

0
12

Leonie Joubert

Iilongo yuumbugantu waAfrica otayi ka taalela onkalo yoshikukuta, ndjoka tayi ya palamene omolwa onkalo yi na sha nekwatonawa lyomeya, onkene oshitopolwa sho tashi ende tashi pupyala notashi kukuta, eandjaganeko lyomeya eshongo enene. Okupitika opo aakwashigwana yi imange uukuni nomapangelo gawo otashi ka kwathela omapangelo opo ga gandje omayakulo omawanawa ngele tashi ya kokutonatela omeya.

Ashike aakwashigwana oya pumbwa omadheulo, oonzo, osho wo omakwatho opo ya vule okukwata nawa omeya nokugandja omayakulo gomeya ga kehe esiku.

Mbika oyo iizemo yolopota yomapekaapeko goAfrican Climate and Development Initiative (ACDI) Univesiti yaCape Town moSouth Africa, mboka ya li ya talelepo iitopolwa yontumba muumbangalantu waNamibia pokati komimvo 2015 no 2017 nelalakano ya mone kutya omusindalandu gokulongitha nokukwata nawa omeya otagu sindana ngiini okuza sho oshilongo sha manguluka mo 1990.

Ongundu ndjika yaapekaapeki okuza ko-ACDI oya li ya longo pamwe naapekaapeki ooyakwawo ya za koUnivesiti yaNamibia (UNAM) opo yu uve ko omashongo ngoka ga palamena iilongo mbyoka ya kukuta ngaashi Namibia, sho onkalo yombepo newangandjo tayi tsikile nokulunduluka.
Okuza pemanguluko, epangelo lyaNamibia olya li lya andjaganeke omalongekidho giikwa niipangitho opo li vule oku eta omayakulo gomeya kiitopolwa yokuushayi, okupitila moopaipi dhomeya, oomboola, uupomba waayehe, osho wo omatemba gaayehe gokunwina iimuna.
Omanga oonkatu dhopombanda dhepangelo dha li dhi na oshinakugwanithwa shiikwa niipangitho, omusindalandu gwepangelo otagu kwandjangele netonatelo lyomeya gesiku nesiku osho wo oku andjagakaneka nokufuta oondjambi dhaaiyambi moshigwana.
Omusindalandu nguka ogu li monkatu yimwe naashoka shi li muuyuni opo ku longithwe omukalo gwa andjuka nawa okukale ka po oonzo noku dhi tonatela. shika osha popiwa komuplofesa gwo-UCT Gina Ziervogel.

Aapekaappeki mbaka yo-ACDI oya li ya talele po omikunda dhi li moshikandjohogololo shaNesi muumbangalantu waNamibia opo ya ninge omalolelo ngele omeya otaga thiki tuu hoka ga nuninwa.

“Shoka twa adha kuumbangalantu waNamibia osho shoka kutya omikalo dhoka tadhi longithwa moku andjaganeka omeya moshigwana itadhi kandula po lela oompumbwe dhaakwashigwana,” osho Irene Kunamwene, ngoka e li omulongwa ponkatu yopombanda ta ningi omapekaapeko ge no-ACDI a fatulula.

Konima sho ya li ya ningi omapulaapulo niilyo yookomitiye yomeya mbyoka tayi iyamba momikunda ndatu, Kunamwene okwa mono kutya iilyo yookomitiye yomeya kayi na naanaa uunongo wothaathaa, nashika otashi imbi opo ya vule okufala noku andjaganeka omeya kaantu mboka ye ga pumbwa unene.

Aaiyambi oya kutha po oshinakugwanithwa shoku inika komilungu naakalimo kutya oye na okufuta ngiino omeya gawo, ongele pamwe okufuta esiku kehe nenge otashi ikolele kuuwindji womeya ngoka taga landwa. Oye na wo okukwashilipaleka kutya ope na omuntu i ilongekidah esiku kehe opo a patulule uupomba womeya, okugandja omeya, osho wo okukoneka nokutula pamishangwa kutya egumbo kehe olya kutha omeya ge thike peni esiku kehe. Amushanga gwokomitiye oha ka gongela nduno iifuta kehe kehulilo lyomwedhi

Shika osha hala okutya aayiyambi mbaka oye na okukala ye shi okulesha nokuyalula, ashike oya pumbwa wo okukala ye shi okukandula po omahilathano osho wo okuya moonkundathana. Oyendji oya li ya mono omadheulo inaaga gwana nawa opo ya vule okugandja omayakulo golela, yo kaya li natango ya dheulwa nkene ye na okukwatakanitha omikalo dhokupangela uuna pwa teka sha.
“Miitopolwa mbyoka ya kukuta yokuumbugantu waAfrica, ngaashi Namibia, oonzo dhomeya odhi li nale dha tsa ongolo,” Zievogel ta fatulula, “yo iinima otayi ningi ashike iidhigu konakuyiwa sho onkalo yewangandjo tayi ende tayi pupyala, taku kukuta oshowo sho tayi dhigupala okutengenekwa.”

Oshizemo shawo tashi ulike kutya uuna tashi ya kokupangela mokutonatela omeya, aakwashigwana naya kwatelwe mo mepangelo ndika, ashike oya pumbwa omadheulo osho wo aantu ya gwana pamuyalu. Aatokoliveta oya pumbwa oku uva ko kutya kehe aakalimo yomoshitopolwa kehe oye na oonkalo dhawo dha yooloka. Aakuthimbinga ayehe oya pumbwa okukala haya tsakanene olundji opo ya vule oku eta po einekelathano pokati kawo, osho wo ya zimine kombinga yomatonatelo. Iikondo ayihe yepangelo oya pumbwa wo okulongela kumwe opo yi kwatakanithe omayamukulo gawo, oshoka oshizemo shonkalo yewangandjo tayi lunduluka ihayi dhenge ashiko oshikondo shimwe shoka osho shi na oshinakugwanithwa shoka.

• Oshinyolwa shika osha mona eyambidhidho lyopashimaliwa kehangano lyo-ASSAR (Adaptation at Scale in Semi-Arid Regions), ndyoka hali ningi omapekaapeko taga tala komalunduluko gonkalo yombepo miitopolwa yimwepo muIndia naAfrica

LEAVE A REPLY

Please enter your comment!
Please enter your name here