Ohungi yomagongo ya pita ko

0
11

Loide Jason

OVENDUKA-Ohungi yokugongela oshimaliwa shoshituthi shomagongo shoka sha tegelelwa shi ka holoke kUukwaludhi osho ya piti ko.
Ohungi ndjika oya li ya longekidhwa kokakomitiye hoka ke li mOvenduka ka inekelelwa oshinakugwanithwa shokulongekidha oshituthi shika shokomumvo.

Ohungi oya li nduno mehuliloshiwike sha zi ko, moka mwa gongelwa oshimaliwa okupitila mokulanditha omathano gaaleli aakuluntu yUukwaluudhi ngaashi Mwaala gwaNashilongo, omukwaniilwa gUukwaluudhi Shikongo HoseaTaapopi noshowo yakwawo oyendjiyendji.
Omanga Omuprima gwoshilongo Saara Kuugongelwa Amadhila ngoka woo naye a enda ohungi ndjoka a gandja ongombe koshitunda shoka.
Ngoka a popi pehala lyomukwaniilwa gwoshitunda shoka Johanes Ndundu okwa ti kutya omuthigululwakalo ogwo omushi gwelandulathano moshigwana onkee yo oyu uvite etumba sho oshituthi shomagongo tashi dhanenwa mUukwaluudhi omumvo nguka.

Ndundu okwa ti shika osha za nale sho aakuluyonale ya kala nokugongala pamwe opo ya tyapule eteyo lyomagongo omumvo kehe. Okwa ti woo monale omanga omagongo inaga nuwa pamwe pu ili nena oge na okunuwa kombala tango.
Kuugongelwa Amadhila sho a pewa ompito yokupopya okwa tsu kumwe na Ndundu ta ti aniwa oohedhi dhomuthigulwakalo odha shuna pevi nangashingeyi oshigwana kasha na we esimaneko.

“ Nalenale omagongo oga li taga nuwa kaakuluntu opo ya nyanyukwe nokukala pamwe menyanyu, ihe ngashingeyi omalovu otaga nuwa okutidha po omikundu moshigwana,” osho a tsu omuthindo ngaaka.
Okwa popi nokuli kutya aniwa yamwe yomaagundjuka ngashingeyi oye li taya iningitha kutya aniwa kaye shi iikulya yOshiwambo sho ye ya muushimba shoka a ti kutya osha puka.

Ominista onkuluntu oya hokola kutya omuthigululwakalo ogwa li tagu kwathele momaputudho gaanona ihe ngashingeyi sho gwa shuna pevi omadhipagathano mokati kaagundjuka oga londa pombanda.

“ Ngashiingeyi aanona mboka ya li ya gamwena kaaya nwe iikolitha oyo taya tumwa ya kalande omangandja nenge ye ga landithe. Shoka kasha li mondjila,” osho ominista ya ti ngaaka.
Molwokunwa iikolitha sha pitilila nena iimbuluma oya londa yili pombanda ya pitilila noshigwana kasha na we ombili ngaashi nale.
Oshituthi shomagongo ohashi dhanwa aluhe kehe omumvo nohashi kala nduno hashi dhanenwa komagumbo gwapamuthigululwakalo nonuumvo, oondjila odha taalela koshitunda shUukwaluudhi.

Oshitunda shoka ngashingeyi otashi lelwa komukwaniilwa ngoka e li omutimulongo 12 gwomaakwaniilwa yomoshilongo shoka.
Hosea Shikongo Taapopi oku li gumwe gwomaakwaniilwa mboka ya lela olule moshilongo shoka sho a landula Mwaala gwaNashilongo ngoka a li hekulu na okwa li a kululwa ko keso.

Taapopi oku li e hole ehumokomeho lyoshilongo onkene okwa gandja omavi koshigwana opo shi ga longithe ooproyeka ndhoka tadhi humitha oshilongo komeho.

Dhimwe dhoomopoloyeka ndhoka ongaashi uushana wiimuna yopaushitwe wu li utatu mboka wu li moshitunda shUukwaluudhi.
Mohungi omo tuu moka omwa li mwa gongelwa oshimaliwa koomuma shoka tashi ka kwathela moku enditha nawa omalongekidho gomagongo.
Omathano gaaleli aakuluntu yomoshitunda moka oga li ga landithwa. Ethano lyaMwaala gwaNashilongo olya li lya landithwa koondola omayovi geli omulongo nomakwawo ga landithwa woo kondando yi li pombanda.

Ominista onkuluntu ndjoka ya tumbulwa metetekelo oya li wo nayo ya gandja omutunda gongombe yi ka liwe koshituthi hoka.
Omunashipundi gwokangundu hoka omundokotola Albertina Shilongo okwa ti kutya omwaalu ngoka gwa gongelwa moshituthi moka inagu tseyika natango onkene nduno taya ka kala omutumba opo ya ka tule kumwe yo ya wape okutseyithila oshigwana.

LEAVE A REPLY

Please enter your comment!
Please enter your name here