Omukulupe e li moluhepo lunyanyaleka

0
36

Victoria Kaapanda

OMAAMBO-Omukalimo gomukunda Omaambo moshikandjohogololo Elim moshitopolwa shaMusati ota hupu shokadhila. Omukulupe Monika Jeseya gwoomvula 60 okwa yambukile momukanda Omaalala mOndonga.

Jesaya oku li monkalo ondhigu noyi nyanyaleka. Omukulupe ngoka ha lala monduda yiihwali yi li monkalo ombwiinayi, negumbo olya teka po noshikombo otashi vulu ashike okupita ngaashi sha hala.

Oshikwiila shepangelo ota ti ke shi shi nando, ando osho ngaa hi ikwatha nasho, ashike uuthemba we woshilongo ke wu na. Aatekulu yaamati ye mboka ye li yaali ota ti nayo inaya shangithwa iimaliwa yaamboka ye li moluhepo oshoka kaye na oonzapo dhomavalo omolwa oohe kaye na mpa taya adhika.

Okwa yambekwa naanona yahetatu, naatekulu ye mboka ha zi nayo ye li yatatu, moka mu na omukadhona gumwe gwoomvula 18, omumati goomvula 11 oshowo okatekulumati koomvula ntano. Aanona ye mboka yahetatu, ope na omonamati ngoka ta ti ota hu muushimba ashike iha yambidhidha nando osha.

“Aamwandje yamwe omo ngaa ye li moondoolopa ngaashi Oshakati nOhangwena, yalwe kandi shi mpa taya dhumwa nando” Omukulupe ta ti.
Omukulupe nguka oku li mepipi lyopenzela ihe ihe yi mono, omolwa uthemba mboka ke na. Uuthemba aniwa owa kana sho a tembuka a zi kOndonga e ya kUukwambi hoka a li e ya kaakwanezimo lye sigo a mono ko epya lye mwene. Shika osha ningwa pwa pita oomvula ndatu ngashingeyi.

“Ondi li moluhepo olunene kandi shi noku lu hokolola, epya lyandje olyo nda inekela ihe ohali liwa po kiimuna unene uusiku.Omolwa odhalalate yandje ndjoka inayi kola nawa niimuna ohayi taaguluka owala,” Jesaya ta gwedha po.

Jesaya ta ti kombinga yomweelelo oha nyanyukwa ngele omvula ya loko oshoka omboga ohayi mene, ye ta ningi omakaka. Ihe okwenye nge kwe ya, ohaya ka tha oombuku opo ya mone omweelelo. “Omushiinda shandje oye wo ha yambidhidha ndje nokashona hoka e na po, ashike iha longo okwa ikwatelela owala mopeenzela,” omukulupe ta yelitha.

Omeya gokopomba kaye ga shi nando, ota ti ohaya ka teka momadhiya, ngele omvula ya shuna, ohaya ka koonona momithima. Omeya ngoka inaga yela nokunuwa nokulongithwa okutelka, otashi vulu oku ya etela omikithi oshowo oshimela.
Kaye na omakumbatha ga gwana okwiisikila ngaashi ya taalela uutalala, iikumbatha oyo haya yala pevi ya lale. Ombete kaye dhi shi ohaye dhi mono owala momagumbo gopushiinda.

Kansela goshikandjohogololo shaElim Gerhard Shiimi , sho a li a lopotelwa oshinima shi li ngeyi, okwa kutha onkatu opo ya kwathele omukulupe ngoka e li moluhepo olunene. Ombelewa yoshikandjohogololo shaElim oya li ya gandja iipeliki 20, omitengi ndatu, oopala 26, oosamende ne, oongonga ndatu dhoondhalate dhooshipa oshowo iinima yilwe.

Jesaya okwa li a memehamo noku uvite ombili kwaashoka oshikandjohogololo shaElim sho she mu kwatha, a pandula noonkondo nota hambelele Pamba.

Pethimbo lyoonkundathano noshifokundaneki shaKundana, kansela okwa ti ye hapo a hulila mpoka, natango otaya tsikile mpoka ya hulila. Oshoka ita vulu okutega omulandu ngoka hagu landulwa opo omukulupe a monenwe ekwatho, omanga e li monkalo ndjoka.
“Ondi wete kutya omukalo nguno ogwa pumbwa okulundulundulwa gu ningwe omufupi opo mboka ye li mompumbwe ya ninge haya mono ekwatho mbala,” Shiimi ta ti.

Kansela ta ti omukulupe omunankondo lela noku li monkalo ombwinayi yoluhepo, ota ti ota shuna ko ye ke mu kwathele nondhalate oku yi ninga nawa opo iimuna kayi pite we. Okwa tega owala osikola yi fudhe a fale omukulupe koombelewa opo a ka mone uuthemba, ye a ka shangithwe openzela.

LEAVE A REPLY

Please enter your comment!
Please enter your name here