Omuthigululwakalo gwoshiSetswana tagu etwa montaneho yaayehe

0
14

Ongundu yoshiSetswana ndjoka hayi ningi iiteyo niiyimbo yopamuthigululwakalo oya dhimbulula kutya natango ondjila onde opo ku dhimbululwe iiteyo, iiyimbo nonomuthigululwakalo gwawo muumbugantu waAfrica. Onkene ongundu ndjika ya za koBotswana otayi ka ya molweendo lokutalelapo iilongo ayihe yi li 15 yo-SADC, moka tayi ka gandja iitewo yoshiSetswana, uudhano wopamuthigululwakalo, oondaanisa osho wo oondjimbo dhawo.

Moroka Moreri, ngoka oye e li omutoti gwongundu ndjika, ota ti momasiku 11 no 12 gaMai ongundu otayi ka kala moNamibia moka tayi ka ya kelukululo yoradio yopashigwana ya_NBC. Moreri okwa kala nekwatathano ewanawa noshitaasi shoradio ya-NBC yoshiSetswana ethimbo nuule, ye okwa kala omuyenda iikando oyindji nelalakano lyokuyambulapo elaka lyoshiSetswana moshilongo.

Omvula ndjino, otaku gandjwa omuthindo keyambulepo lyomuthigululwakalo oshowo okufala uutewo kaantu, tashi ningwa pamukalo goondjimbo. Onkene oya ninga omakwatathano naantu nomahangano ga yooloka mboka taya ka longa nayo meyambulepo lyomuthigululwakalo gwoshiSetwana.

“Omuthigululwakalo ogwa andjuka nogu na okuyambulwa po kaantu ayehe. Otwi itaala kutya ongeleka otayi vulu okudhana onkandangala mokuhumitha komeho oohedhi dhomithigululwakalo, osho wo okusimaneka omithigululwakalo dhetu, okupitilia miikulya nomiihongomwa yetu,” Moreri ta ti.

Ohotela yedhina Cresta, oya pyakudhukwa notayi ilongekidhile esiku lyoohotela tali ithanwa lyoLetlhafula, ndyoka lya nuninwa o-SADC ayihe.

“Otwa tameka nale okulongekidha esiku lyaLetlhafula naCresta Phikiwe ndyoka tali ka kala ko muMai. Oshituthi shika otashi ka yambulapo omatalelopo guupashiyoni moshilongo, oshoka otashi ka kwatelwa komeho kohotela. Iikulya yoshiSetswana otayi ka monika esiku alihe, naantu otaya ka tyapula nokupulakena oongalo dhetu osho wo iiteyo yetu.”

Esiku ekwawo lyopamuthigululwakalo otali ka kala ko ishewe muAguste moMaunatlala, ndyoka tali ka kala oshikando oshitiyali mondjokonona esiku ndika tali dhimbulukiwa, oshikando shotango osha li omvula ya za ko. Ta gwedha po kutya oosikola dhi li mbali, Oodi noTsholofolo Primary School nayo wo oye li ya tula ombunda moshihwa taya longekidha iituthi ngambika.

Kakele kokudhimbulukwa omuthigululwakalo, Moreri ota ti ope na wo omathaneko opo ku ka tumbalekwe oohandimwe, pamukalo guutewo mboka taya ka pewa. Omulongi gomoRadio omukulu, Lesego Mohutsiwa oye gumwe gomwaamboka taya ka faalelwa okatewo komukunda gwawo gwedhina Kanye. Gumwe ngoka ta ka tumbalekwa omutotiitewo omugundjuka. Kabarileng Advocate Keitaile gwokoDiloro. Diloro okwa li u ulike uupenda we pethimbo gomapingakanitho goSetswana naSweden.

“Omugundjuka ngoka okwa li a fuula ndje oshoka okwa li ashike a uvu opolohalama ndjika yokupingakathana koradio nokwa li a pula oshimaliwa sholefa kuyina opo a vule oku tu waimina koGaborone. Yina okwa li a ningi omakwatahano natse, notwa li twe mu taamba ko, okwa li e tu waimine nokwa li nokuli e tu pe mo mokatewo ke,” Moreri ta ti. Moreri ta ti wo ongundu yawo yolwiimbo oyo tayi ka kwathela okutseyitha oalbum yawo yotango, “Nkokowe.”

Ongundu ndjika otayi ka tameka okunyanyudha okutameka ehuliloshiwike ndika moBobonong pamwe naLister Boleseng poshiindingili tashi ithanwa “Taking albums to the people.” Olweendo otalu ka tsikila ishewe lu uka koSefhophe, Mogoditshane, Molepolole oshowo Orapa. Talu tsikile ishewe koSouth Africa koMafikeng Recreational Centre momasiku 15 Sepetemba moka taya ka imba pamwe naCultural Spears.
Lwahugunina, ongundu ndjika otayi ka hulitha olweendo lwayo muNovomba moMmakanke moka aahikingalo dhingi moshilongo taya ka ya mondambo pamwe nayo. Aahikingalo omwa kwatelwa Sereetsi and the Natives, Lizibo, Cultural Spears, nayalwe wo.

LEAVE A REPLY

Please enter your comment!
Please enter your name here